МАХН-ын нарийн бичгийн дарга Ц.Шаравдоржийг намаасаа гарах гэж байгаа гэх яриа гарах болсон. Мөн түүнийг намынхантайгаа таарахгүй,   дотоод дүрэм журмаа зөрчсөн тул намаасаа хөөх гэж байгаа гэх шум ч байгаа. Тэгвэл энэ талаар Ц.Шаравдоржтой ярилцлаа.

-Таныг МАХН-аас гарах гэж байгаа гэх яриа байна?

-Шинэ засгийн газар бүрдэн бий болоод ажлаа эхэлж байгаа. Энэ Засгийн газрын үйл ажиллагаа сайн байгаасай гэсэн үүднээс мөн ард түмний амьдралыг дээшлүүлэх, улс орны эдийн засгийг хүнд байдлаас гаргах, хямралт байдлаас гаргахын төлөө Эвсэлийн засгийн газар байгуулахаар болсон. Өөрөөр хэлбэл, улсад хүч нэмэхээр МАХН эвсэлд орсон. Манай хоёр ч сайд томилогдож ажлаа эхэллээ.

Тэгэхээр МАХН-ыг энэ эвсэлд оруулахгүй байх, орсон ч үйл ажиллагааг нь хязгаартай байлгах, бүр МАХН-тай тоглолт хийх гэсэн тодорхой хүчнүүд ажлаад байгаа нь харагдаж байна. Тодруулбал, МАХН-ыг аль болох эв, эегүй байлгахын төлөө, энэ намд ажиллаж байгаа, энэ намын төлөө сэтгэлтэй гэсэн гишүүд дэмжигчдийн дунд яс  хаях гэсэн бодлого  зориуд зохион байгуулж байгаа нь харамсалтай.

Ц.Шаравдорж МАХН-аас гарна гэсэн мэдэгдлийг өгнө гэдэгт хүмүүс итгэхгүй байх гэж бодож байна. Би өөрийнхөө итгэл найдвараар энэ намд ирсэн. Тодорхой хэмжээнд төрд алба хааж байгаад ирсэн. Би өнөөдөр энэ улс төр хүчний үйл ажиллагааг дэмжиж, итгэж байдаг.

-Магадгүй намаас чинь ийм мэдээлэл зориуд тараагаад байж болох уу?

-Магадгүй. Хэрэв тэгсэн бол би хэн ийм мэдээлэл тарааж болохыг ч таамаглаж байна.

-Нөгөө талаасаа таныг намынхаа эсрэг турхирсан. Дотоод журмаа зөрчсөн гэх асуудлууд их гардаг. Энэ ч үүднээс таныг намаасаа хөөнө гэх яриа ч гарч байсан?

-Би МАХН-д гишүүнчлэл сэргээгээд намдаа ирсэн цагаасаа хойш хамт олонтойгоо эвтэй л байгаа. Бидний дунд ямар нэг эв эе, санал зөрөлцсөн маргаантай зүйл байхгүй. Харин ажлын төлөө бид ярилгүй л яахав. Чанга, сул дуугаралгүй л яахав.  Бид байдгаараа л байгаа. Намдаа ажиллаж байна. Өчигдөр гэхэд гүйцэтгэх товчооны хурлаа хийгээд намынхаа дотоод ажил амьдралын асуудлаа хэлэлцээд л сууж байна.

-Өндөр албан тушаал дээр очих гэж байгаа гэх шум ихээр тарж байна?

-Хардах эрх нь хэнд ч бий. Би ний нуугүй хэлэхэд ямар нэгэн өндөр албан тушаалд очих асуудал байхгүй. Хүн өнөөдөр албан тушаалын төлөө явдаг цаг үе биш. Энэ намыг улс төрийн орон зайд нь жинхэнэ нам байлгахын төлөө л намынхаа журмын нөхөдтэй хамтран ажилладаг. Надад албан тушаал сонин биш.

-Өчигдрийн Гүйцэтгэх товчооны хурлаар ямар асуудлыг хэлэлцсэн юм бол?

-Гүйцэтгэх товчооны хурлаар Батлан хамгаалахын сайд, Эрүүл мэндийн сайд нар маань ажилдаа орсонтой холбогдуулж тодорхой зөвлөмж өглөө.Эд нартаа хэрхэн яаж ажиллах талаар ярьлаа. Цэвэр нам дотроо ярилцсан яриа. Цаашид ажил сайн байх ёстой, нэгэнт энэ засгийн газарт ороод ажиллаж байгаа юм бол энэ засгийн гишүүний хувьд сайн ажиллах ёстой гэдгийг хэлж зөвлөсөн.

Нөгөө талаасаа сайд нар тавигдсан боловч дэд сайд, төрийн нарийн бичгийн дарга, агентлагуудын удирдлагын тухай асуудал ид яригдана. Энэ үед МАХН-ын байр суурийг зөв илэрхийлж, өөрийн хүмүүсийг зохих шаардлагатай газар нь ажлуулахын төлөө манай удирдлага ажлаарай гэдгийг бид ярилцсан.

-Удахгүй дэд сайд нар томилогдох байх. МАХН-аас хэдэн дэд сайд гарч ирэх байх гэж бодож байна?

-Энэ талаар ярьсан ч зүйл алга. Өнөөдрийн зарим хэвлэл мэдээллийн хэрэгслийг харж байхад АН, МАН хоёр гэрээ хэлэлцэл хийгээд зарим дэд сайдуудынхаа нэрийг хүртэл тодорхойлсон гэх мэдээлэл байна.

Уг нь Засгийн газрын нэг субьект болж ажиллаж байгаагийн хувьд Шударга ёс эвсэлтэй түүний дотор МАХН-тай яриа хэлэлцээ хийгдэх л ёстой. Одоогоор чимээгүй байна. Ойрын хугацаанд хэлэлцээ хийгдвэл бид хуучин байсан орон тоогоо авч үлдэх, болвол нэмээд орон тоо олдох болов уу л гэж бодож байна. Энэ дээр манай МАХН-ын удирдлагууд ажиллах байх.

-Танайхаас шинээр томилогдсон хоёр сайдын хувьд мэргэжлийн бус хүмүүс. Энэ ч үүднээс багагүй шүүмжлэлийг дагуулж байгаа. Зарим хүмүүс танай намыг боловсон хүчний дутагдалд орчихсон гэж хардаж байгаа нь ч нууц биш?

- МАХН-аас Батлан хамгаалахын болон Эрүүл мэндийн сайдад тавигдах хүмүүсээ санал хураалтаараа шийдсэн. Тиймээс бид энэ хүмүүсээ шахан ажлуулах ёстой. Нэгэнт намын нэрийн өмнөөс ажиллаж байгаа бол тэр эрүүл мэндийн болон батлан хамгаалахын хамт олныг удирдан чиглүүлж, үйл ажиллагааг нь зөв голдиролоор явуулж, тэр салбарын өмнө тавигдсан асуудлыг шийдвэрлэхийн төлөө манай сайдууд хүчээ дайчлан ажиллах ёстой. Энэний төлөө нам шахна, шаардана.

-Мэргэжлийн бус хүн тавилаа гэсэн шүүмжлэлийн тухайд?

-Бүх л намуудад энэ асуудал яригдана. Жишээ нь Хөдөө аж ахуйн яамыг Р.Бурмаа гуай, Байгаль орчин, ногоон хөгжлийн яамыг Д.Оюунхорол даргалахаар болсон. Ингээд яривал бүгд л мэргэжлийн бус байгаа биз дээ. Уг нь бол мэргэжлийн Засгийн газар ажлуулна гэсэн ч мэргэжлийн бус байна. Дан дээлтэй сайдууд ажлуулна гэсэн ч давхар дээлтэй байна. Ингээд яривал урьд нь яригдаж байсан зүйлсийг сайн биелүүлж өгөхгүй л байна. УИХ-ын гишүүдийн дунд ам, ажил зөрөхийг алийг нь тэр гэхэв дээ.

-Таны нэр шадар сайдад хүчтэй яригдаж байсан. Тэгэхээр та нэрээ татаад авчихав уу. Намын бодлого байв уу?

-Шадар сайдын асуудал дээр миний хувьд яригдсан зүйл нэг их байхгүй. Хэвлэл мэдээллээр л намайг нэлээн рекламдах шиг боллоо. Миний ретинг л сайн өсөх шиг боллоо.

-Хамтарсан засгийн газрыг ер нь юу гэж дүгнэж байгаа вэ?

-Энэ Монгол Улсын түүхэнд байгаагүй бүдүүн засгийн газар. Шийдлийн засгийн газар гэх сайхан нэрийдлээс илүү урд хожид байгаагүй бүдүүн засгийн газар бий болсон гэж үзэж байна. Энд хамгийн сонин нөхцөл байдал бол Засгийн газрын үйл ажиллагаанд бодитой шүүмжлэл тавих сөрөх хүчин байхгүй болсонд хамгийн аюул байгаа. Одоо тэгэхээр МАХН-ын байр суурь бол хэдийгээр хоёр сайд томилогдсон боловч энэ засгийн газрын хэлсэн амалсан болгоноо биелүүлж байвал бид дэмжинэ. Харин ажил муу байвал ард түмнийхээ талд байна. Өөрөөр хэлбэл, Сөрөх хүчний үүрэг гүйцэтгэхээс өөр арга байхгүй. Гэхдээ энэ засгийн газарт ард түмэн маань итгэж байгаа болохоор давхар харж байна.

-Н.Энхбаяр даргын хувьд хоёр сайдаа дэмжсэн юм болов уу. Та холбоотой байгаа юу?

-Би Н.Энхбаяр даргатай байнгын холбоотой байгаа. Дэмжиж байгаа байх гэж бодож байна. Би бол хувьдаа энэ хоёрын дэмжиж байна уу гэж тусгайлан яриагүй.

-Таны хувьд яагаад МАН биш МАХН-ыг сонгосон юм бэ?

-Би 1983 онд МАХН-д элссэн хүн байгаа юм. Сэлэнгэ аймгийн шүүхийн орлогч даргаар ажиллаж байхдаа элссэн. Тэр үед боловсон хүчнүүдийг бүгдийг нь л МАХН-д элсэх ёстой гэж шаарддаг байсан. Их ч өндөр шаардлага тавьдаг байсан. Түүнээс хойш 12 жил шүүгч, 16 жил парламентийн гишүүн хийлээ. Тэгээд УИХ-ын тамгын газрын ерөнхий нарийн бичгийн даргаар ажиллах үедээ хуулинд зааснаар намаасаа гарсан. Ингээд МАХН гэсэн батлахаа хураалгасан. Улмаар ямар намд элсэхээ би өөрөө шийдэх байсан.

Миний батлахаа хураалгасан нам нэг нам байсан. Дөрвөн жилийн дараа 2 нам болсон байсан. Нэг нь миний анх элссэн нам МАХН. Нөгөөх нь шинэ нэртэй нам байсан. Ингээд анх элссэн намдаа итгэл үнэмшлээрээ элссэн. Би МАХН-даа намын гишүүнчлэлээ сэргээсэн явдлаа их буруу үйл ажиллагаа болсон гэж бодохгүй байна.