Чуулганы үдээс хойшхи хуралдаанаар Ерөнхий сайд Ч.Сайханбилэг УИХ-ын гишүүдэд мэдээлэл өгч байна. Тэрбээр сонгуулийн амлалтуудаас болж Монгол улс халамжийн орон болж хувирсан гэв. Тиймээс халамжийн хавтгайруулсан бодлогыг цэгцэлж шаардлагатай хүнд нь төр халамжаа үзүүлэх хэрэгтэй байгаа гэдгийг онцоллоо.

Тэрбээр энэ талаар үргэлжлүүлэн ярихдаа “Өнөөдөр хүүхэд бүр 20.000 төгрөг авч байна. 1.500.000 төгрөгийн орлоготой айлын хүүхэд ч тэр амьдрал ахуй нь хүнд байгаа хүмүүсийн хүүхдүүд ч адил энэ мөнгийг авч байна. Тэгэхээр баян айлын хүүхдүүдэд бус ядуу, тарчиг амьдралтай хүүхдүүддээ л мөнгийг нь өгдөг болъё. Мөн оюутан бүрт 70 мянган төгрөг өгөх бус онц сурсанд нь өгдөг болох хэрэгтэй. Шөнөжин хичээлээ хийсэн оюутан бааранд сууж байгаад ирсэн нэгэнтэйгээ адилхан 70 мянган төгрөгийг авч байна. Тэгэхээр бид одоо энэ мөнгийг зааг ялгаатай өгдөг болмоор байна” гэсэн саналыг хэллээ.

Тэгэхээр эдийн засгийн хямралын хүнд хэцүү энэ цаг үед бүсээ чангалч халамжийн бодлогоо цэгцлэх нь чухал гэж Ерөнхий сайд үзэж байгаа бололтой. Тиймээс энэ чиглэлээр судалгаа хийж удахгүй УИХ-ын чуулганаар хэлэлцүүлэхээр оруулах юм байна. 

Т.Энхэлээ