Өнөөдөр ЦЕГ-ын хэвлэл мэдээллийн төвд Улаанбаатар хотын цагдаагийн газар, нийслэлийн хүүхэд хөгжлийн газар, Монголын сурагчдын холбоо хамтран насанд хүрээгүй хүмүүст архи согтууруулах ундаа зарж борлуулах, төрөл бүрийн шоу цэнгээн зохион байгуулж байгаатай холбогдуулан хэвлэлийн хурал хийлээ.

Энэ үеэр Монголын сурагчдын холбооны тэргүүн О.Сэлэнгэ  зарим зүйлийг онцоллоо. Тэрбээр “Баярын үеэр бага насны юм уу насанд хүрээгүй хүүхдүүд баяр тэмдэглэх зорилгоор янз бүрийн зүйл хэрэглэх тохиолдол гарсаар байна. Ялангуай манай эцэг эхчүүд ч гэсэн баяр гэхээр ширээн дээрээ ямар нэг архи согтууруулах ундаа тавиад баярлах ёстой юм шиг ойлгодог. Тэгвэл баяр наадам гэхээр л хүүхдийнхээ дэргэд архи согтууруулах ундаа хэрэглэдэг байдлаа болих хэрэгтэй. Хоёрдугаарт, фэйсбүүкээр сурагчид өөрсдөө шинэ жилийн баяр, парти зохион байгуулж байна. Тухайлбал, “Масс”, “Турбо”, “I Loft” бааруудад хүүхдийн парти зохион байгуулсан. Тэгвэл энэ асуудлаар хүүхдүүдээс өөрсдөөс нь гомдол хүсэлт ирсэн. Цаашлаад 500 гаруй хүүхдүүдийн мөнгийг авчихаад өгөөгүй асуудал ч байна. Түүнчлэн бага насны хүүхдүүдийг оройны 22:00 цаг хүртэл баар цэнгээний газраар үйлчлүүлэхийг холбогдох газрууд зөвшөөрч байгаа юм уу? гэдэг асуудал сонин байна.

Дээрх газруудад биднийг очиход гурван төрлийн парти зохион байгуулсан байсан. Тухайлбал, single party, Christmas party, kiss me partу зэрэг төрлүүдээр хүүхдүүдийн дунд шоу зохион байгуулсан байсан. Энэ нь эргээд хүүхдүүдийг ямар зүйлд уруу татаад байна вэ гэдэг асуудлыг үүсгэж байгаа. Хүүхдүүд энэ партигаа тараад шөнө орой гадуур явж байгаад гэмт хэргийн халдлагад өртвөл хэн хариуцлага хүлээх вэ?. Энэ хагассайн өдөр л гэхэд 500 гаруй хүүхэд Модны 2-т цугларч хаана очихоо ч мэдэхгүй, зохион байгуулж буй хүмүүс нь ч тодорхойгүй ийм арга хэмжээнд очсон байсан. Тухайн хүүхдүүд 10 мянган төгрөгөөр билетээ авсан хэдий ч мөнгөө буцааж авч чадалгүй цагдаагийн байгууллагад хандсан. Энэ хэрэг фэйсбүүк ашиглаж үйлдэгдсэн байсан. Өөрөөр хэлбэл, цахим ертөнцөөр хүүхдүүдийг уруу татаж, хариуцах эзэн, хуулийн этгээдгүй хэрэг гарч байна. Баар цэнгээний газрууд ч зарим хүмүүстэй үгсэн хуйвалдаж ийм зүйл хийж байна. Хүүхдийг ингэж буруу зүйлд урайлах нь юунд хүргэж болохыг ч холбогдох албаныхан ойлгох хэрэгтэй байгаа юм. Өдөрт 3-4 газар энэ төрлийн хүүхдийн партиг зэрэг зохион байгуулж байна. Улмаар уг шоун дээр хүүхдүүд хоорондоо үнсэлцэхээс эхлээд нийгэмд маш буруу зүйлүүд сурталчилж байгаад санаа зовж байна. Бид энэ арга хэмжээг зохион байгуулахгүйн тулд цагдаагийн байгууллагатай хамтарч олон зүйл хийхээр төлөвлөж байгаа” гэв.