МҮОХ-ны ээлжит хуралдаан маргаан мэтгэлцээн дунд болж өнгөрлөө. Өнөөдөр болсон хурлын үйл явц сэтгүүлчдэд хаалттай байсан бөгөөд зөвхөн МҮОХ-ны гишүүдийг л хурлын танхим руу нэвтрүүлсэн байна. Харин хурлын үйл явцын талаарх мэдээллийг мэргэжлийн сумогийн 68 дахь их аварга, Монголын чөлөөт бөхийн холбооны ерөнхийлөгч Д.Дагвадорж өөрийн твиттер хуудсаараа жиргэсэн. Их аварга ойрын өдрүүдэд “МҮОХ-ны үйл ажиллагаа болон ерөнхийлөгч Д.Загдсүрэнг ажлаа хийж чадахгүй байна. Мөн шүүхийн шийдвэр гарч ял авчихаад ажлаа үргэлжлүүлж байна” гэж байр сууриа илэрхийлж байгаа. Үүнтэй нь холбоотойгоор олон нийтийн дунд Д.Дагвадорж аваргыг МҮОХ-ны ерөнхийлөгчийн суудалд санаархаж байна гэх хардлага ч бага зэрэг төрж байгаа юм. Харин аварга энэ талаар “Надад МҮОХ-ны ерөнхийлөгч болох гэсэн ямарч амбиц алга. Спорт эрүүл, нээлттэй байгаасай гэсэндээ ингэж ярьж байна” хэмээн тайлбарласан.
                   Ингээд МҮОХ-ны хурлаар Д.Загдсүрэнгийн асуудлыг авч хэлэлцэж цаашдаа түүнд итгэл хүлээгэх талаар санал хураалт явуулахад хуралд оролцсон нийт гишүүдийн 96.9 хувь түүнд итгэл хүлээлгэх нь зүйтэй гэж үзжээ. МҮОХ-ны хуралд нийт 64 хүн оролцсон бөгөөд ердөө хоёрхон хүн л түүний эсрэг санал өгсөн байна. Д.Загдсүрэн нь МҮОХ-г 2001 оноос хойш өдийг хүртэл тэргүүлж байгаа юм.