Дархлагдсан буюу даргын сандал дээр хадаатай мэт суусан эрхмүүд нэлээдгүй байх юм. Хамгийн гол нь тийм эрхмүүд эрүүл өрсөлдөөн өрнөдөг гэх спортын салбарт нэлээдгүй байх нь хачирхалтай. Жишээлбэл Монголын Үндэсний Олимпын Хорооны дарга Д.Загдсүрэн. Цаг ямагт бөхчүүдээс гомдол, шүүмжлэлийг хүртэж байдаг Монгол Үндэсний бөхийн холбооны тэргүүн Р.Нямдорж нарыг нэрлэж болно. Д.Загдсүрэнгийн асуудлыг өнгөрсөн оны сүүлээр болсон МҮОХ-ны хурлаар авч хэлэлцээд олонхын саналаар үүрэгт ажлаа үргэлжлүүлэх нь зүйтэй гэж үзсэн. Уг хуралд Р.Нямдорж өөрийн биеэр оролцож харагдсан. Тэгвэл энэ удаа МҮБХ-ны "дархан" тэргүүн Р.Нямдоржийн асуудлыг шийдэх цаг ирсэн бололтой. Ойрын үед тус холбооныхон өргөтгөсөн хурал зарлаж асуудлыг хэлэлцэхээр төлөвлөөд байгаа гэнэ.
             Дархан аварга А.Сүхбат тэргүүтэй хэсэг бүлэг бөхчүүд хэвлэлийн бага хурал зохион байгуулж “Монголын Үндэсний Бөхийн холбооны тэргүүнийг өөрчлөх нь зүйтэй. Р.Нямдорж хууль зөрчсөн үйлдэл маш их хийж байна. Бөхийн спортын төлөө тэмцэх цаг боллоо” гэх зүйлийг ярьсан. Мөн “Үндэсний бөхийн хөгжил шинэчлэлт” ТББ гэх газраас мөн л адил холбооны тэргүүнийг буруутгаж, ажлаа хүлээлгэх өгөхийг шаардсан юм. Тэгвэл энэ мэтээр бөхчүүд болон бөх сонирхогчдын зүгээс хүчтэй эсэргүүцэлтэй тулгарч байгаа Р.Нямдорж дахин нэг удаа өөрийн байр сууриа хадгалаж үлдэхээр шийдэв бололтой. Шүүмжлүүлээд буй асуудлуудад өөрийгөө буруугүй хэмээж, түүнийгээ нотлох гэж хичээж эхэллээ.
                   Тодруулбал өнгөрсөн наадмын үеэр хамгийн их шуугиан тарьж, олон нийтийг хооронд нь нэлээдгүй талцуулсан асуудал болох дархан А.Сүхбат, Г.Өсөхбаяр нарын цолны эрэмбэний талаар мэдэгдлийг өчигдөр хэвлэл мэдээллийн хэрэгслүүдээр цацсан юм. Ерөнхийлөгч Ц.Элбэгдоржийн зарлигаар наадмын өмнө дээрх хоёр эрхэм нэг өдөр, нэг цаг мөчид дархан  аварга цол хүртсэн. Бөхийн уламжлал, ёс жудгаа бодвол зүүний магнайд аварга, далай болон даян аварга цолуудыг түрүүлж хүртсэн жижиг хэмээх А.Сүхбат манлайлах ёстой гэж олон хүмүүс үзэж байсан. Тэр ч утгаараа наадмын зүүний магнайд дархан аварга А.Сүхбат гарч дархан аварга Г.Өсөхбаярыг амласан сонин тохиолдол гарсан юм. Харин наадмын дараа дархан аварга Г.Өсөхбаярыг эхэнд  нь эрэмбэлэх нь зүйтэй гэх шийдвэрийг МҮБХ гаргасан. Энэхүү шийдвэрийг нь цолны асуудлаар Р.Нямдоржтой таарамж муутай явдаг А.Сүхбат өлгөж аваад “Цолны асуудалд хамгийн их өртсөн хүн бол би. Хөлсөө хатчихсан байхдаа буюу машин дотроо явж байгаад гэнэтхэн дархан аварга болсон. Энэ мэтээр бөхчүүдийн эрх ашгийг МҮБХ ноцтой хохироодог” гэх зэргээр олон нийтийн өмнө Р.Нямдорж болон МҮБХ-г хатуухан шүүмжлээд авсан. Эдгээр шуугиантай холбоотойгоор бөхчүүд ч эвлэлдэн нэгдээд тэргүүнээ буулгаж авахаар шийдээд байгаа аж.  Энэ мэтээр байдал буруу тийшээ эргэж буйг харсан МҮБХ-ныхон өөрсдийгөө өмөөрөх зүйлийг олон нийтэд нэлээдгүй гаргаж байна. Ямартаа л долоо, найман сарын дараа гэнэтхэн ухаан орсон юм шиг дархан аваргуудыг хэрхэн эрэмбэлсэн тухай мэдэгдлийг сонин хэвлэлээр гаргаж байх вэ дээ.
                       Мөн бөхийн холбооны тэргүүн Ерөнхийлөгчийн дэмжлэгийг  авахыг зорьж байгаа бололтой. Тэрээр ирэх 4-5 сард Монгол Улсын Ерөнхийлөгчөөр бөхчүүдэд лекц уншуулах гэнэ. Энэ ажлынхаа хүрээнд 1000 бөхөд номын дуу сонсгох зорилготой байгаа аж. Энэхүү саналаа олон нийтийн мэдээллийн хэрэгслээр дамжуулан Ерөнхийлөгч Ц.Элбэгдоржид албан ёсоор хүргүүллээ. Яагаад гэвэл жилийн гаруйн өмнө энэ саналаа өөрийн биеэр Ерөнхийлөгч Ц.Элбэгдоржид хэлсэн ч одоог болтол тоогоогүй. Тийм болохоор олон түмний өмнө гуйж Ерөнхийлөгчөө барьц алдуулах бодлоготой шийдвэр. Бас л сонирхолтой шийдвэр. Сонирхол татахуйц сонголт. “Ерөнхийлөгч ба 1000 бөхчүүд” арга хэмжээ магадгүй нийгэмд  хүлээлт ч үүсгэж болох юм. Хамгийн гол нь Ерөнхийлөгч бөхчүүдэд хандаж чухам юу ярих вэ гэдэг ихээхэн анхаарал татаж байна. Монгол Улсын Ерөнхийлөгч төрийн ордны индэр дээрээс аварга, арслангуудад “дархан мэх”-ээ заахгүйн лавтай. Төрт ёсны маань бахархал болсон үндэсний бөхийн ёс жудгийн талаар онцгойлж ярихгүй нь тодорхой. Тийм зүйлийг бөхчүүд хэнээр  ч хэлүүлэлтгүй мэдэх хүмүүс. Энэ талаар ярих нь төрийн тэргүүн хүний хийх зүйл ч биш байлтай. Эсвэл 1000 бөхөд Монгол орны өнөөгийн улс төрийн нөхцөл байдал, эдийн засгийн хямрал макро болон микро төвшинд хэрхэн нөлөөлж байгаа, бөхчүүдийн амьдралд таналт, хасалт, хэмнэлтийн горим цаашдаа хэрхэн нөлөөлөх вэ. Улс орныхоо ирээдүйн төлөө Ерөнхий сайдын гаргасан уриалгыг хэрхэн дэмжиж ажиллах талаар лекц уншиж болох юм. Эдгээрийн аль нь байсан үнэхээр утгагүй зүйл. Харин үүнийхээ оронд даяар дуурсагдах аваргуудынхаа үнэн үгийг сонссон бол нэн хэрэгтэй мэт. Гэхдээ үүний цаана төрийн тэргүүний дэмжлэгийг авч дахин хэсэг зуур суудалдаа үлдэх санаархал л байна гэж учир мэдэх хүмүүс ярилцаж байна.  МҮБХ-ныхон өөрсдийн ажилдаа үлдэхийн тулд эцсээ хүртэл тэмцэхээр шийдсэн бололтой. Гэхдээ нэг хүний эрх ашиг биш, нийтийн эрх ашгийг нэн түрүүнд тавих хэрэгтэй гэдгийг бодолцох цаг болсон. Магадгүй хүсэлтийг нь хүлээн авч ардчилсан Ерөнхийлөгч маань бөхчүүдтэй уулзвал холбооныхонд ардчилсан нийгэмд өөрийн тань эрх бусдийн эрхээр хязгаарлагдаж байдаг юм шүү гэдгийг сануулаасай. Суудлынхаа төлөө үхэн хатан тэмцсээр байгаа эрхмүүд одоо болих хэрэгтэй. Бөхчүүд болон бөх сонирхогчдын итгэл найдвар ч аль хэдийнээ алдагдаж гүйцлээ шүү дээ.