Монгол Улсын Ерөнхийлөгчийн Тамгын газраас нийгэм, эдийн засаг, оюун санааны ертөнцөд шинэ жишиг гаргаж, олон улсын стандартад хүрсэн, улс орныхоо өрсөлдөх чадварын нэрийн хуудас болж чадсан, бизнесийн шинэ чиглэлийн хөгжилд хувь нэмэр оруулсан дэд бүтэц, үйлдвэрлэл, хөдөө аж ахуй, газар тариалан, аялал жуулчлалын салбарын үйлдвэрлэл, барилга байгууламж, Улсын нэр хүндийг өргөсөн, өв соёл, үндэсний уламжлалыг сэргээсэн бүтээл туурвилыг шалгаруулж, жилд нэг удаа, билгийн тооллын он солигдохын өмнө "Үндэсний бүтээн байгуулалтын дээд шагнал-Төрийн гэрэгэ” шагнал олгодог билээ.

 "Үндэсний бүтээн байгуулалтын дээд шагнал-Төрийн гэрэгэ” шагналын журмын дагуу Ерөнхийлөгчийн Тамгын газар, Шинжлэх ухааны академи, Монголын үндэсний худалдаа аж үйлдвэрийн танхим, Үндэсний хөгжлийн хүрээлэн,   Үндэсний бүтээмжийн төв, Өрсөлдөх чадварын төв, Нийслэлийн засаг даргын тамгын газраас төлөөлөл оролцуулсан ажлын хэсэг байгуулагдсан бөгөөд 2015 оны 1 дүгээр сарын 14-нд эхний хуралдаанаа хийж зохион байгуулалтын асуудлыг хэлэлцэв.

 ”Үндэсний бүтээн байгуулалтын дээд шагнал Төрийн гэрэгэ” шагналд Аймаг, нийслэлийн ИТХ, Засаг даргын Тамгын газар орон нутагтаа тухайн жилд бий болсон бүтээн байгуулалтыг, Төрийн яамд салбартаа тухайн жилд бий болсон бүтээн байгуулалтыг, иргэд, төрийн бус байгууллагууд дэмжиж буй бүтээн байгуулалтыг нэр дэвшүүлэх эрхтэй бөгөөд холбогдох бичиг баримтыг Ерөнхийлөгчийн Тамгын газарт 1 дүгээр сарын 25-ны өдрийн дотор ирүүлж байхаар боллоо.

 Уг шагналыг олгох тухай Монгол Улсын Ерөнхийлөгчийн зарлигийн бичвэр бүхий цомыг сар шинийн баярыг тохиолдуулан Монгол Улсын Ерөнхийлөгч зарлиг гарган Төрийн ёслол хүндэтгэлийн өргөөнд гардуулах юм. Шагнал хүртсэн бүтээн байгуулалтыг бий болгох ажилд идэвх санаачилгатай оролцсон, гардан бүтээсэн, зохион байгуулсан хүмүүсийг төрийн алдар цол одон медалиар шагнаж болох бөгөөд эдгээр шагналыг цом олгох ёслолтой хамтатган зохион байгуулж гардуулна.

Монгол Улсын Ерөнхийлөгчийн Олон нийтийн харилцааны бодлогын зөвлөх А.Ганбаатартай сар шинийн баяраар олгодог "Үндэсний бүтээн байгуулалтын дээд шагнал-Төрийн гэрэгэ" шагналын тухай ярилцлаа.

-Монгол Улсын Ерөнхийлөгчийн зарлигаар сар шинийн баяраар олгодог "Үндэсний бүтээн байгуулалтын дээд шагнал-Төрийн гэрэгэ"-ний талаар уншигчдад мэдээлэл өгнө үү?

- Монгол Улсын Ерөнхийлөгчийн Тамгын газраас нийгэм, эдийн засаг, оюун санааны ертөнцөд шинэ жишиг гаргаж, олон улсын стандартад хүрсэн, улс орныхоо өрсөлдөх чадварын нэрийн хуудас болж чадсан, бизнесийн шинэ чиглэлийн хөгжилд хувь нэмэр оруулсан дэд бүтэц, үйлдвэрлэл, хөдөө аж ахуй, газар тариалан, аялал жуулчлалын салбарын үйлдвэрлэл, барилга байгууламж, улсын нэр хүндийг өргөсөн, өв соёл, үндэсний уламжлалыг сэргээсэн бүтээл туурвилыг шалгаруулж, жилд нэг удаа, билгийн тооллын он солигдохын өмнө "Үндэсний бүтээн байгуулалтын дээд шагнал-Төрийн гэрэгэ” шагнал олгодог уламжлалтай.

-"Үндэсний бүтээн байгуулалтын дээд шагнал-Төрийн гэрэгэ"-г үндэсний бүтээн байгуулагчдаа дэмжсэн, урам зориг өгсөн шагнал гэж үнэлдэг. Өмнө нь уг шагналыг ямар ямар бүтээн байгуулалтад хүртээсэн бэ?

-2011 онд Нэпко хэвлэлийн газраас эрхлэн гаргасан “Британника” нэвтэрхий толь,  2012 онд Үндэсний Энержи Ресурс компанийн Өмнөговь аймаг дахь Ухаа Худаг уурхайн бүтээн байгуулалтууд Үндэсний бүтээн байгуулалтын дээд шагнал “Төрийн Гэрэгэ”-г хүртэж байсан. Улсын нийгэм, эдийн засаг, оюун санааны ертөнцөд шинэ хандлага, дэвшил авчирсан гэж эдгээр бүтээн байгуулалтуудад энэхүү шагналыг хүртээсэн юм.

-"Үндэсний бүтээн байгуулалтын дээд шагнал-Төрийн гэрэгэ"-д нэр дэвшүүлэх журам гарсан юм байна. Ямар журмаар энэ шагналд нэр дэвшүүлэх вэ?

-”Үндэсний бүтээн байгуулалтын дээд шагнал Төрийн гэрэгэ” шагналд Аймаг, нийслэлийн ИТХ, Засаг даргын Тамгын газар бол орон нутагтаа тухайн жилд бий болсон бүтээн байгуулалтыг, Төрийн яамдын хувьд  салбартаа тухайн жилд бий болсон бүтээн байгуулалтыг, иргэд, төрийн бус байгууллагууд дэмжиж буй бүтээн байгуулалтыг нэр дэвшүүлэх эрхтэй. Эдгээр байгууллага болоод иргэд холбогдох бичиг баримтыг Ерөнхийлөгчийн Тамгын газарт 1 дүгээр сарын 25-ны өдрийн дотор ирүүлэх ёстой. Ирүүлсэн бичиг баримтыг Ерөнхийлөгчийн Тамгын газрын даргын захирамжаар байгуулсан ажлын хэсэг авч хэлэлцэн шалгаруулалтад оруулна. Энэ жилээс урьдчилсан шалгаруулалтад санал өгөх эрхийг мэргэжлийн экспертүүдэд өгсөн. Зохион байгуулалтыг ЕТГ, МҮХАҮТ, Монголын бизнесийн зөвлөл, www.news.mn сайт зэрэг байгууллагууд шинэлэг хэлбэрээр хийхээр ажиллаж байна. Сар шинийн өмнө бүтээн байгуулалтыг Монгол Улсын Ерөнхийлөгчид танилцуулах юм.

-Бүтээн байгуулагчдыг алдаршуулах, шагнал гардуулах ёслолыг ямар журмаар хийх вэ?

-Шагнал хүртсэн бүтээн байгуулалтыг хийх ажилд идэвх санаачилгатай оролцсон, гардан бүтээсэн, зохион байгуулсан хүмүүсийг төрийн алдар цол одон медалиар шагнаж болно гэж холбогдох журамд заасан. Шагнал олгохын тухай Монгол Улсын Ерөнхийлөгчийн зарлигийн бичвэр бүхий цомыг сар шинийн баярыг тохиолдуулан Монгол Улсын Ерөнхийлөгч зарлиг гарган Төрийн ёслол хүндэтгэлийн өргөөнд гардуулна. Холбогдох журмыг www.president.mn цахим хуудсаас үзэж болно.