Жил бүр нөөцийн махны асуудал яригддаг. Энэ жил хувьд нийслэл болон Дархан, Эрдэнэт нийтдээ 14 мянган тонн нөөцийн махыг худалдаалах юм байна. Тухайлбал, нийслэл хотод “Эй Эн Ди Эм” ХХК, “Баатарууд тэнгэр” ХХК, Мах импекс” ,“Мах маркет ХХК-иуд нөөцийн махыг худалдаална. Харин Дарханд “Дархан мийт фүүдс” ХХК,   Эрдэнэт хотод “Эрдмийт мийт фүүст” ХХК  тус бүр нэг мянган тонн  мах нөөцлөх юм байна.

Гагцхүү нөөцөлж бэлтгэсэн мах  туранхай, дан яс болчихсон, хатуу байдаг гэх шүүмжлэлийг дагуулдаг. Харин энэ жил ийм асуудал гаргахгүй байх тал дээр холбогдох газрууд нь анхаарч ажиллаж байгаа аж.

Нөөцийн махны асуудлаар Үйлдвэр хөдөө аж ахуйн яамны Хүнсний үйлдвэрийн бодлогын хэрэгжилтийг зохиоцуулах газрын мэргэжилтэн Ц.Цэцэгдариас дараах зүйлийг тодрууллаа.

-Өнгөрсөн жил 14 мянган тонн мах нөөцөлсөн байдаг. Энэ жилийн тухайд?

-Өмнөхтэйгээ адилхан. Нөөцийн махны тонн нэмэгдээгүй байгаа. Нийслэлийн иргэдийн хаврын улирлын хэрэгцээнд зориулж 14 мянган тонн мах нөөцөлсөн байгаа.

-Энэ жил хэдэн компани нөөцийн махыг худалдаалах вэ?
-Нөөцийн махны менежерээр нийслэлд дөрвөн компани шалгарсан байгаа.  Харин Дархан, Эрдэнэт тус бүр нэг нэг компани шалгарсан. Нийслэлд нөөцийн мах нийлүүлэх дөрвөн компани тус бүр гурван мянган тонн махыг худалдаана. Харин Дархан, Эрдэнэ хот тус бүрт нэг мянган тонн мах худалдаалахаар нөөцөлсөн. Одоогийн байдлаар нийслэлд  “Баатрууд тэнгэр” компани 2450 тонн, “Мах импекс” 2230, “Мах маркет” 1845, Эй Энд Ди Эм” 2580 тонн махыг нөөцөлсөн байгаа. Харин Дарханд Дархан мийт фүүдс” ХХК 1080 тонн, Эрдэнэт хотод “Эрдмийт мийт фүүст” ХХК 1960 тонн махыг нөөцөлсөн. Нийтдээ 11 мянган 100 тонн буюу нийт бэлтгэх нөөцийн  80 хувийг хангасан байна.

-Нөөцийн мах бэлтгэх компаниудад сонгон  шалгаруулалтыг хэрхэн явуулсан вэ. Өнгөрсөн жил худалдаалж байсан компаниуд энэ жил ч гэсэн худалдаалах юм байна?
-Өнгөрсөн жил худалдаалж байсан компаниуд байгаа. Эдгээр компаниуд  нөөцийн махны менежмент болон сонгон шалгаруулалтын нөхцөл шаардлагыг хангаж, зориултын тусгай агуулах зоорь болон хадгалалтын нөхцөл горимыг хангасан байсан. Бэлтгэсэн махаа агуулахад оруулахдаа тусгай хяналтанд дор   баталгаажуулж оруулж байгаа. Мөн агуулах болон зоориноос гаргахдаа хяналтын дор гаргаж худалдаална.
 
-Хяналтыг танайхаас гадна өөр газрууд тавьж байгаа юу?
- Манайхаас гадна МХЕГ, ШӨХТГ, нийслэлийн Захирагчийн ажлын алба, нийслэлийн үйлдвэр хөдөө аж ахуйн газрын хүнсний асуудал хариуцсан газар, нийслэлийн Хэрэглэгчийн эрх ашгийг хамгаалах нийгэмлэг зэрэг байгууллагуудаас ажлын хэсэг гаргаж хяналтыг тавин ажиллана.

-Үнэ өртөгийн хувьд ямар байгаа вэ?
-Үнийн хувьд тухайн үеийн зах зээлийн ханшаар тогтоож борлуулна. Одоогоор нөөцийн махыг хэдэн төгрөгөөр худалдаалагдах нь тодорхой бус байна.