Манай улсын гурван сая дахь иргэн өнөө, маргаашгүй төрөх гэж байна. Яг тэдэнд төрнө гэсэн мэдээллийг албаныхан тас нууж буй ч энэ долоо хоногт багтаж төрөх нь тов тодорхой байгаа юм.

Монголын төр гурван сая дахь иргэнээ хүн амын өсөлтөд чухал нөлөө үзүүлсэн түүхэн хүн хэмээн сүр дуулиантай угтаж авахаар бэлтгэж байгаа юм. Тодруулбал, гурван сая дахь иргэндээ гурван өрөө байр, гурван сая төгрөгөөс гадна дагалдах бусад жижиг бэлэг сэлтүүдийг өгнө гэж буй. Мөн энэ өдөр төрсөн бүх хүүхдийг гурван сая төгрөгөөр урамшуулна. Гурван сая дахь иргэн болон түүний чацуутнуудыг хот, хөдөөгийн хаана ч төрсөн хамаагүй урамшуулах  юм. Тиймээс эхчүүд гэртээ бус аль болох сум, дүүрэг, аймгийнхаа эмнэлэгт очиж төрөхөд л хангалттай. Гурван сая дахь иргэнийг тодруулах ажлын хэсгийг Ерөнхийлөгчийн тамгын газар болон Үндэсний статистикийн газраас хамтран гаргаж ажиллуулж байна. Тиймээс уг ажлыг алдаа, мадаггүй зохион байгуулчих байх гэсэн итгэл хүмүүст байгаа юм.

Улс орны түүхэнд бичигдэх энэхүү чухал үйл явдлыг монголчууд бид сэтгэл догдлон чих тавин хүлээж сууна.

Харин Монгол улсын гурван сая дахь иргэн аав, ээждээ аз дагуулж ирэх ч өөрөө мэдээгүй 5 сая 89 мянган төгрөгийн өртэй төрөх нь. Өнөөдөр улсын нийт өр 14 их наяд төгрөг байгаа. Энэ мөнгө бол ирээдүйд бидний төлөх өр. Май гээд хармаанаасаа гаргаад өгөхгүй ч тэр өрийг Монголын ард түмэн татварынхаа мөнгө болон өөрсдөд ногдох эх орны хувь хишгээсээ хумслан байж төлөх нь тодорхой юм. Өнгөрсөн долоо хоногт 2015 оны төсвийн тодотголыг баталж улсын нийт өрийн таазыг ДНБ-ийн 58,3 хувиар баталсан. Хууль зөрчин байж өрийн хэмжээг нэмж ирснээ эрх баригчид аргагүйн эрхэнд хүлээн зөвшөөрч ийнхүү баталсан юм.

Ямартай ч нийт өр болох 14 их наяд төгрөгийг гурван сая иргэнд хуваахад иргэн нэг бүр 5 сая 89 мянган төгрөгийн өрийг төлөх юм. Үүнд гурван сая дахь иргэн ч багтаж байна.

Энэ талаар УИХ-ын гишүүн Б.Бат-эрдэнэ "2015 оны төсвийн хүрээний мэдэгдлийг батлахдаа бид энэ өрийг хэмжээг баталсан. Энэ өрийг хэмжээг хуваагаад тооцох юм бол нэг хүнд 5 сая 89 мянган төгрөг оногдохоор байна шүү дээ. Энэ нь манай улсын өлгийтэй нялхсаас өвгөд хүртэл хүн бүрт энэ өр оногдож байна гэсэн үг. Одоо энэ сард төрөх 3 сая дахь иргэн маань хүртэл 5 сая 89 мянган төгрөгийн өртэй төрөх нь байна шүү дээ. Үүнийгээ бүгд зөв зүйтэй гэж бодоод өрийн хэмжээ одоо хамаагүй гээд яриад байж болох уу” гэж хэлсэн.

Ямартай ч гурван сая дахь иргэнд байр, мөнгө өгнө гэж буй ч тэрбээр 5 сая 89 мянган төгрөгийн өртэй төрж байна.