Монголчуудын хоног тоолон хүлээж байсан гурван сая дахь иргэн мэндэлснийг өнөөдөр олон нийтэд мэдээллээ. Гурван сая дахь иргэн охин хүүхэд бөгөөд энэ сарын 24-ны өглөө Өмнөговь аймгийн Даланзадгад сумын Нэгдсэн эмнэлэгт эцэг Энхтүвшингийн Хатанболд, эх Ганбатын Аззаяа нарын гэр бүлд мэндэлсэн юм. Тэрбээр айлын ууган охин болж төрж буйг хүмүүс ихэд бэлэгшээж байна. Мөн тус өдөр монголчууд 181 шинэ иргэнээр бүл нэмжээ. Тэдний дунд нийслэлийн Сүхбаатар дүүрэг, АНУ-д тус бүр ихэр хүүхэд төрсөн байна. Монгол Улсын иргэд 1962 онд нэг сая, 1988 онд 2 сая болсон бол ийнхүү 2015 оны 1 дүгээр сард 3 саяулаа боллоо. Энэ талаар Ерөнхийлөгч Ц.Элбэгдоржид өнөөдөр морин цагт буюу 11.40 цагт айлтгав.



Эл үйл явдалтай холбогдуулан хэн, юу гэж хэлснийг тоймлон хүргэж байна.

Ерөнхийлөгч Ц.Элбэгдорж: Гурван сая болно гэдэг нь гучин бумуулаа боллоо гэсэн үг

-Морин жилийн бариа ойртож байна. Энэ өдрүүдэд монголын хүн ам цаашдаа гурван сая гэдэг тоон дээр нэмэгдэж 3 сая 200, 300 гээд тоологдох болно. Ингэж явсаар байгаад 4 сая, 5 сая дахь иргэнээ угтах билэг дэмбэрэл жилээс жилд ойртон ирнэ. Би гурван сая дахь иргэндээ зориулж мялаалгын үг бичсэн. Аав ээж бүх хүмүүст нь Монголын ард түмнээ төлөөлөөд баяр хүргэе. Мөн энэ арга хэмжээнд оролцсон бүх хүмүүст сайн сайхныг хүсье. Монголчууд улам олууллаа болж аз жаргалтай байх ерөөлийг дэвшүүлье. Цаашдаа эх хүүдийн эрүүл мэндийг анхаарах асуудлыг Эрүүл мэндийн яам анхаараарай. Айлын ууган охин болж төрсөн охин болон бусад нас чацуутнууд, үүнээс хойш мэндлэх бүх иргэдэдээ сайн сайхныг хүсье. Монголчууд улам олуулаа болох болтугай. Гурван сая болно гэдэг нь гучин бумуулаа боллоо гэсэн үг.


Ажлын хэсгийн дарга, Монгол Улсын Ерөнхийлөгчийн Тамгын газрын дарга П.Цагаан: Охин хүүхэд тодорсон нь хүн ам өсөн дэлгэрч, улам олуулаа болохыг бэлгэдлээ.

- Дүн өвлийн цас бударсан сайхан өглөө, өвлийн адаг сарын шинийн есний балжиннямтай хөх луу өдөр монголчууд 3 саяулаа болсныг айлтгаж байгаадаа бэлгэшээж байна.  Гурван сая дахь иргэнээр охин хүүхэд тодорч, араас нь ихрүүд мэндэлсэн нь Монгол Улсын хүн ам өсөн дэлгэрч, улам олуулаа болохыг бэлгэдлээ.


Охины ээж Г.Аззаяа: Охиндоо Х.Сэлэнгэ гэдэг нэрийг өгсөн.

Охины ээжтэй утсаар холбогдоход “Та бүхэнд баярлалаа. Миний бие сайн байна. Охиндоо Х.Сэлэнгэ гэж нэрлэсэн. Будаанд хийж байгаад л сугалсан. Энэ нэр гарч ирсэн. Нөхөр бид хоёр Даланзадгад хотын иргэд. Нөхөр маань хувиараа ажил хийдэг. Би 1992 онд төрсөн. Ямар нэг хүндрэл өгөөгүй. Өөрөөрөө төрсөн” гэлээ.



Хүн, амын хөгжил нийгмийн хамгааллын сайд С.Эрдэнэ: Гурван сая дахь иргэнтэй хамгийн ойр төрсөн 30 хүүхдэд 70 сая төгрөг олгоно

- Гурван сая дахь иргэн болон түүний чацуутнаар тодорсон иргэдийг урамшуулах мөнгийг Засгийн газрын нөөц хөрөнгөөс гаргаж байгаа.  Тухайн өдөр төрсөн гурван сая дахь хүүхдэдээ 70 сая төгрөг түүнтэй тэнцэх байр өгнө. Мөн гурван сая дахь иргэнтэй хамгийн ойр төрсөн эхний гучин хүүхдэд тухайн аймаг, дүүргийн ИТХ-аас нь 70 сая төгрөг олгох эрхийг нь олгоод байгаа. Эцэг, эхээс нь зөвшөөрөл авсан үед буюу аль тохиромжтой үед алдаршуулах ажлаа хийнэ. Өнөөдөр Засгийн газрын ээлжит бус хуралдаан болно. Уг хуралдаанаар энэ ажлыг хэрхэн, яаж зохион байгуулах талаар ярилцаж шийдвэр гаргана.


Үндэсний статистикийн хорооны дарга С.Мэндсайхан: Өндөр нууцлалтайгаар тодруулсан

 Үндэсний статистикийн хороо хуулийн дагуу хүн ам нэг саяаар нэмэгдэх агшинд Монгол улсын ерөнхийлөгчид энэ тухай мэдээллийг өргөн барих үүргийн дагуу энэ ажлаа гүйцэтгэлээ. Гурван сая дахь иргэнээ хууль хяналт, өндөр нууцлалтай ажиллагааны дагуу тодрууллаа. Үндэсний статистикийн хорооноос батлагдсан журмын дагуу энэ ажил зохион байгуулагдлаа. 2015 оны нэгдүгээр сарын 1-ний байдлаар Монгол улсын хүн ам 29995949 байна гэж албан ёсоор нийтэд зарласан. Ажлын хэсгээс гаргасан төлөвлөөгийн дагуу мэдээллүүдийг цуглуулах ажлыг орон даяар болон гадаадад суугаа монголчуудын дунд зохион байгууллаа. Сүүлийн өдрүүдэд газар бүрээс мэдээлэл авах давтамжаа өдөрт хоёр удаа болгож шуурхай ажиллалаа. Харин гадаад суугаа иргэдийн талаарх мэдээллийг консулын газраар дамжуулж авсан. Ирсэн бүх мэдээллийн дагуу бүх тооцох ёстой мэдээллийг нэгтгэн тооцсоноор энэ сарын 24-нд 3 сая дахь иргэн мэндэллээ гэдгийг албан ёсоор зарлаж байна. Эдгээр хүүхдүүдээс Энхтүвшингийн Хатанболд, эх Ганбатын Аззаяа нарын гэр бүлд мэндэлсэн охин гурван сая дахь иргэн боллоо.  Мэдээллийн нууцлалыг хангах үүднээс тусгай программыг ашигласан. Мэдээллийн нууцыг бүрэн хадгалсан. Мөн эрүүл мэнд спортын яамнаас нэгдсэн зохион байгууллалтайгаар төрөх эмнэлэгийн цагийг стантарт хэмжил зүйн газартай хамтарч нэгдсэн байдлаар тааруулсан.