Нийслэлийн прокурорын газрын ял эдлүүлэх ажиллагаанд тавих хяналт хариуцсан хэлтсээс нийслэл, дүүргийн прокурорын газруудын хяналтын харьяа хорих анги болон баривчлах байрнуудад 2014 онд гарсан гэмт хэргийн талаар судалгаа хийсэн талаарх мэдээлэл гарсан. Энэхүү мэдээлэл болон уншигчдын сэтгэгдлээс улбаалан хорих ангид яагаад гэмт хэрэг гардаг юм бол гэж бодоход хүргэлээ.
                Дэлхийн улс орнуудаас ял эдэлж буй хоригдогсдын тоогоор АНУ, БНХАУ, ОХУ эхний гуравт ордог бөгөөд Монгол Улс 104-д, Азийн орнуудаас 26-д, 100000 мянган хүн амд ногдох хоригдлын тоогоор Азид 42-д ордог аж. Улсын хэмжээнд 2014 оны байдлаар 27318 гэмт хэрэг үйлдэгдэж өмнөх оны мөн үетэй харьцуулахад 11.2 хувиар өсч, 10000 хүнд ногдох гэмт хэргийн тоо 142 болжээ. Үүний 23 гэмт хэрэг нь хорих байгууллагад үйлдэгджээ.
                Цагдаагийн ерөнхий газраас гаргасан энэхүү статистик судалгааг Монгол Улсад ял эдэлж байгаа нийт ялтныг 5000 орчим гэж тооцон харьцуулбал хорих байгууллагад жилдээ 71 гэмт хэрэг гарах магадлалтай гэсэн тооцоо гарч байна.
Энэ тооцоо хийсвэр байж болох тул Америкийн Нэгдсэн улсын Холбооны шоронд хийгдсэн судалгааг үзлээ. АНУ-ын Холбооны шоронгуудад 210,000 орчим ялтан ял эдэлж байгаа ба 5000 хоригдолд харьцуулсан судалгаагаар 1 сард 38-40 гэмт хэрэг гардаг байна. Үүнийг 1 жилд тооцон бодож үзвэл 5000 хоригдол жилдээ 450-480 гэмт хэрэг үйлддэг байх нь.
Шүүхийн шийдвэр гүйцэтгэх ерөнхий газраас албан ёсны тоо баримтыг тодруулахад 2014 оны жилийн эцсийн байдлаар 6000 гаруй ялтан ял эдэлж, тэдний дотроос 23 гэмт хэрэг үйлдэгдэж, өмнөх оны мөн үетэй харьцуулахад гэмт хэргийн гаралт 4-өөр буюу 16.6, зөрчил  34-өөр буюу 1.4 хувиар тус тус буурсан гэв.
                  Энэ нь тус газраас авч хэрэгжүүлсэн арга хэмжээ тухайлбал харуул хамгаалалтын үйл ажиллагаанд дэвшилтэт техник, тоног төхөөрөмжийг шинээр нэвтрүүлсэн төдийгүй нийт 1443 ялтанд мэргэжил эзэмшүүлж, мэргэжлийн үнэмлэх, чадамжийн гэрчилгээ олгон нийгмийн ажил, сэтгэлзүйн үйлчилгээний чиглэлээр хэрэгжүүлсэн ажлын үр дүн хэмээн албаны хүмүүс тайлбарлаж байна.  
                Хорих байгууллагыг байнгын харуул хамгаалалттай гэмт хэрэг гарах ёсгүй газар хэмээн үзэж болох ч шоронд нийгэм, сэтгэл зүйн шалтгааны улмаас сэтгэхүй, сэтгэл хөдлөл, зан үйлд нь өөрчлөлт орсон сэтгэцийн тулгамдсан асуудалтай хүмүүс ял эдэлж байгааг анхаарах хэрэгтэй юм.  Түүнээс гадна эдгээр гэмт хэрэг үйлдсэн  хүмүүстэй нүүр тулж ажилладаг алба хаагчдын ажлыг бас ойлгомоор юм шиг.