УИХ-ын гишүүн Д.Арвин, Нийслэлийн ИТХ-ын тэргүүлэгч Д.Баттулга нар Сууц Өмчлөгчдийн дээд зөвлөл нэртэй ТББ-ыг байгуулж оршин суугчдыг шулж байгаа талаар иргэд дахин хүчтэй шүүмжлэл өрнүүлж эхэллээ. Асуудлын гол нь СӨХ-ны Дээд Зөвлөл гэх Төрийн бус байгууллага СӨХ-ын тарифыг тогтоосонд байгаа юм. Хуулинд бол ямар ч ТББ үнэ ханш тогтоох ёсгүй. Гэтэл СӨХДЗ гэх энэ сүржин нэртэй ТББ 2014 оны 04 сарын 01-ны өдөр гаргасан тогтоолоор айл өрхөөс авах үйлчилгээний хөлсний тарифыг тогоож өгчээ.

Тодруулбал, оршин суугчид өөрсдийнх нь байранд ая тухтай орчин нөхцлийг бүрдүүлж ажиллах ёстой СӨХ нь Дээд зөвлөл гэх байгууллагатай нийлж шударга бусаар оршин суугчдаасаа мөнгө "шулж", айлган сүрдүүлэгч болж хувирсныг ярьж байгаа юм.

 СӨХ нь олигтой үйлчилгээ үзүүлээгүй мөртлөө байсхийгээд л СӨХ-ны татаасаа нэмж байдаг аж. Яагаад үнэ хөлсөө нэмж байгаа, ямар учиртайг асуух бүрт “СӨХ-ын дээд зөвлөлийн шийдвэр. Энэ зөвлөлийн шийдвэрийг бид биелүүлэх учиртай. Тэгэхээр дуугүй мөнгөө өг” гэсэн тайлбарыг хэлдэг байна.

Угтаа бол СӨХ нь Сууц Өмчлөгчдийн Холбооны Дээд Зөвлөл гэх тэр ТББ-ын гишүүн байх албагүй. Гэтэл тус ТББ-ын гишүүнээр элсчихээд иргэдээсээ мөнгө төгрөг нэмж татаж байгааг хууль бус үйлдэл гэж СӨХ-ны үйл ажиллагааг эсэргүүцэж байгаа иргэд хэлж байна.



СӨХ-ны цэвэрлэгээ, лифтний засвар үйлчилгээний төлбөр, жижүүр үйлчлэгчийн цалин хөлсний мөнгийг үг дуугүй хүлээн зөвшөөрч болох ч айл өрхийн 1м2 талбай тутмаас  200-300 төгрөг авах шийдвэр гайхшрал барж байна. Иргэд байрныхаа СӨХ-ноос засвар үйлчилгээ аваагүй байсан ч сар бүр мөнгө төлдөг. Нэг тоо бодоход 40 м2 талбайтай байранд амьдардаг айл сард засвар үйлчилгээний мөнгөнд 16.000 төгрөг өгнө гэсэн үг. Тэр айл гэртээ засвар үйлчилгээ авсан, аваагүйн аль нь ч бай энэ мөнгийг тушаах үүрэгтэй. Ер нь энэ СӨХ гэгч байгууллага оршин суугчдынхаа тав тухтай байдлыг хангаж ажиллах дүрэмтэй болохоос биш мөнгөний төлөө нүдээ ухаад өгөхөөс буцахгүй болсон ТББ-тай нийлж мөнгө босгох асуудал биш гэдгийг ЭРХЭМ дарга нар ойлгохын дээдээр ойлгох биз.

Үүнээс гадна хамгийн их анхаарал татаж буй зүйл нь СӨХ бүр сард төвлөрүүлсэн орлого бүрийнхээ 2 хувийг дээд байгууллага болох зөвлөлдөө өгдөг. Тэр мөнгийг юунд, яаж зарцуулдагийг Д.Арвин, Д.Баттулга нар өөрсдөө л мэдэх ба оршин суугчдад зориулсан нэг ч ажил хийж үзээгүй гэж нийслэлийн иргэд ярьж байна.

Улаанбаатарт үйл ажиллагаагаа явуулж буй 400 гаруй СӨХ ингэж төвлөрүүлсэн орлого бүрээсээ 2 хувийг өрлөг, барьц болгож өгдөг гэхээр асар их мөнгө дээд зөвлөлд төвлөрч байна гэсэн үг. Энэ талаар иргэд мэддэг ч олон жил дуугүй  явж иржээ. Хоёр хувийн татварыг өгөх ёстой л юм чинь гэсэн үзэл тэдэнд тогтсон гэсэн үг. Харин үүнийг хүлээн зөвшөөрдөггүй хөгшид хэл, ам хийхээр нөгөө л дээд зөвлөлийн шийдвэрээ танилцуулаад гаргадаг байна.

Тиймээс тус мөнгийг юунд зарцуулдгаа Ц.Арвин, Д.Баттулга нар оршин суугчдад тайлбарлах ёстой. Эсвэл энэ чимээгүй тахлаа зогсоо гэсэн шаардлагыг иргэд тавьж байгаа юм. Хууль, журмаар бол Монгол улсад үйл ажиллагаагаа явуулж буй ТББ нь үнэ ханш тогтоох ёсгүй. 

Энэ мэт асуудлаас болж тэдний байгуулсан ТББ-тай тэмцэлдэж аргаа барьсан оршин суугчид ШӨХТГ-т хандаж татан буулгаж өгөхийг хүссэн байна. Иргэдийн гомдол, саналд дарагдсан ШӨХТГ нийслэлийн 400 гаруй СӨХ-ыг зах зухаас нь шалгаад л хамаг булхайг нь олж мэдсэн байдаг. Тиймээс эрх мэдлийнхээ хүрээнд зарим СӨХ-ын дээд зөвлөлийг татан буулгах шийдвэрийг гаргасан ч одоог хүртэл ажилласаар л байгаа юм.

Эдийн засгийн хүнд үед иргэдээс илүү, дутуу татаас авч дарамталдаг байдлаа ядаж СӨХ-ээс эхлээд зогсоохыг шаардсаар. 

Байгуулагдаад 25 жил болсон ч хэл амнаас огт салаагүй СӨХ-ийн ажлыг цэгцлэх ажлыг ШӨХТГ, АТГ зэрэг эрх бүхий байгууллага нь дахин шалгавал яасан юм бэ. ЭДИЙН ЗАСАГ ХҮНДЭРЛЭЭ, АРД ИРГЭДИЙН АМЬДРАЛ ХЭЦҮҮДЛЭЭ гэж өдөр бүр мэдээллийн хэрэгслээр хөндөж байгааг ТББ-ын эрхэм Ерөнхийлөгчид мэдэж байгаа байлтай. Гэтэл ТББ-ын шийдвэрээр тогтоосон үнэ ханшаа СӨХ бүрт мөрдүүлж ард иргэдийнхээ халаасыг ухаж байгааг ард түмнийхээ төлөө гэх үү, эсрэг гэх үү. Эл асуудлын талаар ард түмнийхээ төлөө тангараг өргөж төлөөлөгч болсон Д.Арвин гишүүнээс асуумаар байна.