Хэлмэгдэгсдийн хөшөөний хажууд өлсгөлөн зарлаж байсан “Босоо хөх Монгол” ТББ-ын гишүүд болон тэдний дэмжигчдийг урд шөнийн 05.00 цагийн үед тараасан тухай бид мэдээлсэн. Тэгвэл энэ асуудалд цагдаагийн байгууллагаас албан ёсны тайлбар өглөө.Энэ талаар Цагдаагийн ерөнхий газрын Хэвлэл мэдээллийн төвийн дарга цагдаагийн хурандаа Б.Баатархүүгээс тодрууллаа.
-“Босоо хөх Монгол” ТББ-ын хэчнээн гишүүнийг эмнэлэгт хүргэсэн бэ?
- “Босоо хөх Монгол” ТББ-ын найман гишүүн анх өлсгөлөн зарлаж эхэлсэн боловч нэг иргэн эрүүл мэндийн шалтгаанаар өлсгөлөнгөө зогсоосон. Ингэснээр долоон иргэн өлсгөлөнгөө үргэлжлүүлж байсан. Гэвч цагдаагийн бүрэлдэхүүнийг очиход нэг иргэн нь байхгүй байсан. Улмаар шөнө эмнэлэгт ирж сайн дураараа эмчлүүлэх болсоноо мэдэгдсэн. Тэрбээр урьдчилсан байдлаар “Би гэртээ оччихоод ирсэн” гэдэг тайлбар өгч байгаа аж.
-Эрүүл мэндийн шалтгаанаас нь болж албадан тараах тушаал гарсан гэсэн?
-Өлсгөлөн зарлаж байсан долоон иргэний эрүүл мэндийн байдал доройтож, цаашид хүний амь насанд хохирол учирч болзошгүй нөхцөл байдал үүссэн нь эрүүл мэндийн байгууллагын дүгнэлтээр тогтоогдсон. Иймд Чингэлтэй дүүргийн Засаг даргын захирамжаар тус иргэдийг албадан эмчилгээнд хамруулах шийдвэр гаргасан юм. 2015 оны хоёрдугаар сарын 23-ны өдөр энэхүү шийдвэрийг хэрэгжүүлэх ажилд нийгмийн хэв журмыг сахиулах, аюулгүй байдлыг хангах эрүүл мэндийн байгууллагын ажилд дэмжлэг үзүүлэх чиглэлээр, цагдаагийн байгууллага нийтийн хэв журмыг сахиулж, хэв журмын хамгаалалтад ажилласан.
-Олон нийтийн зүгээс тэднийг эсэргүүцсээр байхад албадан тараасан гэх яриа байна. Энэ тал дээр?
- “Босоо хөх Монгол” ТББ-ын өлсгөлөн зарласан гишүүд албадан эмчилгээний дүгнэлтийг танилцуулахад ухамсартайгаар хүлээн авч, сайн дураараа эрүүл мэндийн байгууллага руу явсан. Ямар нэг хүч хэрэглэсэн зүйл байхгүй. Мөн гишүүд, дэмжигчид сайн дураар тухайн өлсгөлөн зарлаж байсан иргэдийн байрлаж байсан гэрийг буулган, авч явахдаа цагдаагийн алба хаагчдаас тусламж хүссэнийг хүлээн авч хамтран ажилласан. Өлсгөлөн зарласан иргэдийг эмнэлгийн байгууллага руу авч явахад иргэд, цагдаагийн алба хаагчдын дунд ямар нэгэн зөрчил гараагүй.
-Яагаад заавал шөнө дундаар албадан тараах болов?
-Өдрийн цагаар замын хөдөлгөөнөөс эхлээд иргэдэд хүндрэл учруулахаар байсан. Тиймээс зам хийгээд олон нийтийн хөдөлгөөн татарсан үед хууль ёсны дагуух арга хэмжээг авсан.
-Тэд хаана эмчлүүлж байгаа вэ?
-Чингэлтэй дүүргийн эрүүл мэндийн нэгдэлд хэвтэн эмчлүүлж байгаа.
-Өлсгөлөн зарлагчдын байрлаж байсан гэр, иргэдийг гарын үсэг зэргийг яасан бэ?
-Тэдгээр асуудлыг өлсгөлөн зарласан иргэд өөрсдөө хариуцсан.
Д.Ундрах /24tsag.mn/
Сэтгэгдэл (8)