Монголдоо цорын ганц гэж хэлж болох улсын тодотголтой Гэрлэх ёслолын ордонг хэн нэгэнд хувьчлах гэж байгаа талаарх шум нийгэмд тарж эхэллээ. Энэ  асуудалд хүмүүс талцсан байр суурьтайгаар хандаж байна. Зарим иргэдийн хувьд илүү ашигтайгаар ажиллуулж чадах нэгэнд нь хувьчилачих хэрэгтэй гэж байхад нөгөө хэсэг нь хувьчилсны дараа балгас, аль эсвэл хэн нэгэний бизнесийн ашиг олох хэрэгсэл төдий болж өнгөрнө хэмээн эмээцгээж байгаа юм.

Харин уншигч таны хувьд хувьчлах хэрэгтэй юу?. Аль эсвэл эсрэг байр суурьнаас харж байна уу?

Гэрлэх ёслолын ордон нь анх 1976 оноос өнөөдрийг хүртэл 39 жил үйл ажиллагаагаа хэвийн явуулж байна.  Засаг даргын тамгын газарт харъяалагддаг уг ордон  27 ажилтан албан хаагчтай буюу цомхон бүтэцтэй. Хамгийн сүүлд 21 жил тасралтгүй Гэрлэх ёслолын ордонг удирдаж явсан Х.Оюунчимэгээс "Халуун сэтгэл" байгууллагын зохицуулагч байсан С.Үүрийнтуяа гэгч эмэгтэйд өнгөрсөн 2012 онд “шилжин очсон” гэхэд болно. Өөрөөр хэлбэл, удирдлага дарга нь солигдоод өдгөө гуравдахь жилийнхээ нүүрийг үзэж байгаа ийм ордон.
Олон мянган хосын гал голомтыг бадрааж, Монголын гэр бүлийн баталгаа, “гэрчлэх хуудас” болж ирсэн.
Тэгвэл энэхүү ордонг яагаад хувьчлах болов?. Үүнд албаныхан маш эвтэйхнээр, өөрсдөөсөө түлхсэн маягаар хариулжээ.

Тэдний хариулт маш энгийн. Зүгээр л өнгөрсөн онд алдагдалтай ажилласан гэх шалтгаан. Энэ л асуудал нийслэлийн хэмжээнд ганцад орох Гэрлэх ёслолын ордонг хувьчлах ёстой гэдэгт эрх баригчдын саналыг нэгтгэж орхижээ.

Гэрлэх ёслолын ордоны хувьд  нийслэлийн төсөвт тодорхой хэмжээгээр  дэмжлэг үзүүлдэг.  Гагцхүү сүүлийн жил  ашиг орлого нь буурч, ашиггүй ажилласан “муу” данстай.  Тиймээс ч   НИТХ-ынхан энэ ордонг хувьчлах эсэхийг ийн хэлэлцсэн байна.  Гэхдээ эхний ээлжид санал оруулж ирж байгаа сурагтай.   Улмаар уг асуудлыг энэ сарын 19-ны өдөр хуралдах НИТХ-ын нэгдсэн хуралдаанаар  эцэслэн шийдвэрлэх гэж байгаа талаар эх сурвалж онцоллоо.
Хамгийн гол нь НИТХ-д энэхүү асуудлыг Засаг  дарга өргөн барьсан сурагтай.  Гэхдээ нийслэлийн өмчтэй холбоотой санал учир  Өмчийн харилцааны газрын дарга Ш.Төмөрбаатар асуудлыг боловсруулж, Засаг даргаар дамжуулан өргөн барьж байгаа аж. Тиймээс эл асуудал энэ хоёр хүний санал бололтой.

Мэдээж ямар ч улсын тодотголтой газрыг хувьчлахдаа үйл ажиллагааг нь хуучин хэвээр нь явуулна гэж ам мөчиг өгдөг. Гэвч цагийн аясад зүгээр л хэн нэгэн хүний ашиг олох хэрэгсэл болж хувирдаг гашуун түүх олон бий.

Эрх баригдчын зүгээс бол цирк шиг зориулалтын бусаар ашиглуулахгүй  гэж ярьж байгаа ч НИТХ-ын нэр бүхий төлөөлөгч хийгээд зарим иргэд үүнд нь эргэлзэж байгааг нуух юун.