Казах түмний үндэсний баяр болох “Наурызын баяр”-ын өдрийг тохиолдуулан МЗХ-ны Улаанбаатар дах Баян-Өлгий аймгийн Залуучуудын Холбоо, Казах Залуучуудын холбоо хамтран Барууны салааны эцэст байрлах “Богд Хааны рашаан”-ы эхийг цэвэрлэлээ. Булаг шандны эхийг цэвэрлэх энэхүү ажилд 20 гаруй Казах залуус  оролцож булагийн эргэн тойрон дах элдэв хог хаягдал, чулуу модыг цэвэрлж байгаль дэлхийгээ баярлууллаа.

Сүүлийн  үед аливаа баяр ёслолыг өргөн дэлгэр тэмдэглэх болсон тэгвэл энэ удаад Казах залуус ууж идэх, наргих цэнгэхээсээ илүү байгаль дэлхий, гол усаа цэвэрлэж хангай дэлхийгээ баярлуулахыг илүүд үзлээ.

Түүнчлэн хаврын урь орж, амьтай бүхэн сэргэдэг энэ үед булаг шандны урсгалын эх ундаргыг сэргээн засаж цэвэрлэн, шинэ мод тарьж байгаль дэлхийгээ хайрлан шүтдэг Казах түмний зан заншил, ёс уламжлалыг сэргээж, хот суурин газарт амьдардаг залууст таниулахад чухал нөлөөтэй ажил болсон юм. Мөн энэхүү зан үйл нь байгаль, хүрээлэн байгаа орчиноо шинэ онд цэвэр цэмцгэр байлгавал байгаль нь эргээд хишиг буянаа тасралтгүй хайрлах санаагаар үйлддэг, хүн-байгаль хоёрын харилцаа холбоо, шүтэлцээг тод томруун харуулдаг зан үйл юм.

Энэхүү үйл ажиллагаанд оролцсон залууст ахмад буурлуудаас эхлээд олон хүн талархалтай хандаж байсан юм. Тухайлбал: “Богд Хааны рашаан”-ы хамгаалагч Н.Хорлоо гуай “Булаг шандны эхийг хамгаалах,  цэвэр цэмцгэр байлгахад залуу үе маань ингэж сэтгэл гаргаж байгаад баяртай байна. Бидний амьдралыг тэтгэгч бол ус. Тиймээс гол усаа үргэлж хамгаалж, цэвэр тунгалаг байлгах хэрэгтэй” гэдгийн залуустаа захиж байлаа.