1993 онд ЮНЕСКО-гийн чуулганаас жил бүрийн 3-р сарын 22-ны өдрийг Дэлхийн Усны Өдөр болгон тэмдэглэж байхыг тунхагласан бөгөөд энэ өдрийг тэмдэглэх уриаг анх 1992 онд Бразилийн Рио-дэ Жанеро хотноо болсон Нэгдсэн Үндэстний Байгууллагын Хүрээлэн буй орчин, Хөгжлийн тухай олон улсын хурлаас гаргасан билээ. Энэ тэмдэглэлт өдрийн гол зорилго нь усны чиглэлээр олон улсын хамтын ажиллагааг сайжруулах мөн түүнчлэн усны үнэ цэнийг олон нийтэд ойлгуулах, усны зөв зохистой хэрэглээг сурталчлан таниулах явдал юм.
Энэхүү тэмдэглэлт өдрийг тохиолдуулан БОНХАЖЯ, ЮНЕСКО-гийн Монголын Үндэсний Комисс, ЮНЕСКО-гийн Олон улсын ус зүйн хөтөлбөрийн Монголын Үндэсний Хороо хамтран “Ус эх дэлхийг тогтворжуулагч” (Water for a Sustainable World) сэдэвт Дэлхийн усны хөгжлийн 2015 оны тайлангийн албан ёсны нээлтийг 2015 оны 3 сарын 20-ны өдрийн 13:00 цагт БОНХАЖЯ-ы Хаан танхимд хийнэ. Мөн энэ өдөр тус тайлангийн албан ёсны нээлт Энэтхэг улсын Шинэ дели хотноо болох бөгөөд энэхүү арга хэмжээ нь энэ жилийн дэлхийн усны өдрийг тохиолдуулан авч буй арга хэмжээнүүдийн гол цөм нь болж байна.
2000 оны НҮБ-ын Мянганы тунхаглалын үеэр Дэлхийн усны хөгжлийн тайланг гаргаж байх шийдвэрийг гарган түүнээс хойш 3 жил тутам гаргадаг байсан боловч 2012 оны эхээр тус тайланг дүгнэн хэлэлцэж судалгаа явуулсны үр дүнд тус тайланг жил болгон гаргаж байх нь илүү өгөөжтэй юм гэсэн дүгнэлтэнд хүрч энэхүү тайланг жил бүр гаргаж тайлангийн нээлтийг жил бүрийн Дэлхийн усны өдрийг тохиолдуулан хийдэг болоод байна.
Тус тайланг бодлого боловсруулагчид, ус болон эрчим хүчний салбарынхан, дэлхийн эрдэмтэн судлаачдад хүргэх зорилготой гаргадаг бөгөөд ингэснээрээ дэлхий нийтээр усны нэгдсэн бодлогыг баримтлан дэлхийн даяар хүн бүрт хүртээлтэй нэгдсэн шийдвэрийг гарган бидний өмнө тулгараад байгаа олон асуудлуудыг хамтран шийдвэрлэх зорилготой юм.
Мөн тус арга хэмжээний хүрээнд НҮБ болон ЮНЕСКО-гоос хэвлүүлсэн “Ус эх дэлхийг тогтворжуулагч” сэдэвт Дэлхийн усны хөгжлийн 2015 оны тайланг БОНХАЖЯ-д гардуулах юм.
Таньд манай мэдээ, мэдээлэл таалагдаж байвал "LIKE" дарж бидэнтэй нэгдээрэй
