Өнгөрсөн лхагва гаригийн Засгийн газрын хуралдаанаар Засгийн газрын тохируулагч агентлаг Цөмийн энергийн газрын даргын үүргийг түр орлон гүйцэтгэгчээр тус газрын Цөмийн технологийн газрын дарга Г.Манлайжавыг томилсон билээ.
    Өнгөрсөн лхагва гаригийн Засгийн газрын хуралдаанаар Засгийн газрын тохируулагч агентлаг Цөмийн энергийн газрын даргын үүргийг түр орлон гүйцэтгэгчээр тус газрын Цөмийн технологийн газрын дарга Г.Манлайжавыг томилсон билээ. Харин түүнийг өнгөрсөн оны арванхоёрдугаар сарын 27-нд тус газрын дарга С.Энхбат ажлаас нь халж байжээ. Энэ талаар үүрэг гүйцэтгэгчээр томилогдоод буй Г.Манлайжавтай ярилцлаа.

-Өнгөрсөн долоон хоногт вэб сайтуудаар таны зурагтай материал гарлаа. Төрийн албанаас хөөгдсөн, мөн өнгөрсөн арванхоёрдугаар сард ажлаасаа халагдсан хэрнээ ЦЭГ-ын үүрэг гүйцэтгэгчээр томилогдсон байх юм?

-Өнөөдөр үүссэн нөхцөл байдалтай холбогдуулж хоёр зүйлд л хариулт өгье. Хэвлэл мэдээллээр төрийн өндөр албанд, хариуцлагатай ажил хийж байсан хүн хариуцлагагүй мэдээлэл хийгээд байгаа учраас тайлбарыг өгөх нь зөв байхаа. Өнгөрсөн оны арванхоёрдугаар сард намайг ажлаас халах тушаалыг 27-ны өдөр маш яарч гаргасан байдаг. С.Энхбат дарга тэр үед гадаадад удаан хугацаагаар эмчлэгдэж байгаад ирээд гурав хонож байсан юм.  Тэгээд Үндэсний аюулгүй байдлын зөвлөлд худал мэдээ өгсөн, хөрөнгө оруулгын мэдүүлгээ буруу ташаа гаргасан гэж тушаалдаа заасан байсан. Гэнэт ийм шийдвэр гаргаад ажил тарсан хойно ажлыг нь хүлээж ав, өрөөг нь лацад гэсэн даалгавар ч өгч байлаа. Би шийдвэрийг нь сонссон. Төрийн ажлыг шинээр томилогдсон хүнд нь маргааш өдөр нь ажлаа өгсөн. Төрийн ажлыг алдагдуулахгүй байхыг л бодсон. Хаалга үүдээ түгжээд, сейф компьютерээ аваад явчихаагүй. Хууль бус, бодит байдлаас хол, буруу шийдвэр гаргасан байна гээд мэдэгдэл хийгээгүй, хэвлэл мэдээллийнхэнд хандаагүй. Намайг ажлаас халсан, шийдвэр дахин гарсан талаар танай сайтад анх удаа ярилцлага өгч байна. Үндэсний аюулгүй байдлын зөвлөлд ноцтой алдаатай мэдээлэл өгсөн гээд хэвлэл мэдээллээр захиалгатайгаар овоо ч бичсэн. Сайтуудаар ч сайн гардаг юм байна лээ. Тэгэхэд нь л нэлээд эмзэглэсэн дээ. Миний хөгшин эмээ нэг зүйлийг хэлдэг байсан юм. Хийсэн хэргийн төлөө биш хийгээгүй хэргийн төлөө ял үүрэх шиг ясны тамтай зүйл байдаггүй гэж. Нэг ёсны хэлс хэрэг юм даа. Шийдвэрлэдэг газрууд нь үнэн зөвийг нь тогтоотол би нэг ч хэвлэлд ганц өгүүлбэр ч ярилцлага өгөөгүй. Шийдвэр гаргахынхаа өмнө эхлээд хэн ямар буруу мэдээлэл өгсөн, хэн ямар алдаа гаргасныг тогтоож, авч үзэх хэрэгтэй байсан юм. Тогтооно гэж өөрийнхөө үзэмжээр, ганцаараа шийдвэр гаргахыг бас хэлээгүй шүү. Газар, хэлтсийн дарга нартай нь ч уулзаж ярилцаагүй. Буруутай хүнийг нь тогтоож, шийдвэрлэчихээд сүүлд нь Г.Манлайжав чи ажлын алдаа гаргасан байна гээд арга хэмжээ авсан бол ямар ч асуудалгүй.

-Тэгэхээр С.Энхбат дарга буруу тушаал гаргасан гэсэн үг үү?

-Газрын даргын шийдвэрийг хүлээн зөвшөөрөх боломжгүй учраас л төрийн албан хаагчийнхаа хувьд зохих номоор нь гомдол гаргасан. Төрийн албаны тухай хуулийн дагуу Төрийн албаны зөвлөлд, шууд харьяалах дээд шатны захиргааны байгууллага, албан тушаалтны хувьд цөмийн энергийн  асуудал эрхэлсэн ерөнхий сайд, Цөмийн энергийн комиссын дарга С.Батболдод гомдол өргөдлөө өгсөн. Тэгээд ЦЭГ-ын даргын тэр тушаалыг хүчингүй болгох тухай Ерөнхий сайдын захирамж энэ сарын 6-нд гарсан байна лээ. С.Энхбат даргын гаргасан тушаал хуулийн дагуу хийгдээгүй, гомдол гаргагчийн эрх, хууль ёсны ашиг сонирхлыг зөрчсөн гэж үзсэн байсан.  
 
-ЦЭГ-ын үүрэг гүйцэтгэгчээр томилогдсон, тэгээд ажлаа хүлээж аваагүй байгаа гэж сонслоо. Энэ талаар юу хэлэх вэ?

-Засгийн газрын хуралдаанаар асуудлыг хэлэлцээд тогтоол гарсан. Өнөөдөр ЦЭГ-ийн шуурхай дээр Хэрэг эрхлэх газрын албаны хүмүүс Засгийн газрын тогтоол шийдвэрийг танилцуулсан. Үүрэг чиглэл ч өгсөн. С.Энхбат дарга ажлаа шилжүүлж өгөхгүй гэж байна лээ. Би сайн ойлгосонгүй. Дүрэм журмынхаа дагуу шийдэгдэх биз дээ. Би газрынхаа нэгж, хэлтсийн дарга нартай уулзаж ажлаа хийгээд эхэлсэн. Тогтоолыг хэрэгжүүлэхгүй бол би өөрөө ч бас буруутна. Манай газрынхан ч байдлыг ойлгож байна лээ. Харин байгууллагын тамгагүйгээр төрийн ажил яаж явагдахыг л ойлгохгүй байна. Асуудлыг холбогдох газруудад нь тавина.

-С.Энхбат даргын ажлаа өгөхгүй, шүүх Засгийн газрын тогтоолыг түтгэлзүүлсэн гээд байгаа асуудлыг та юу гэж бодож байна?

-Иргэн хүнийхээ хувьд хэн ч гомдол гаргах эрхтэй. Хэвлэлд өгсөн ярилцлагаас нь харахад С.Энхбат дарга шүүхэд гомдол гаргаж, Сүхбаатар дүүргийн шүүхийн хариуцсан шүүгч захирамж гаргасан гэж ойлгосон. Хэрвээ шүүхээр асуудлыг эцэслэн шийдвэрлэсэн үед л ажлаа өгөхгүй, ажилдаа эргэж орно гэж хэлж болох байх.

-Таныг мөн хөрөнгө орлогын мэдүүлгээ буруу мэдүүлсэн гэсэн байдаг?

-Би 2007 оноос хойш төрийн жинхэнэ албан хаагчийн хувьд хөрөнгө орлогын мэдүүлгээ байнга өгч ирсэн. Өнгөрсөн оны есдүгээр сард манай байгууллагад Авилгатай тэмцэх газрын төлөвлөгөөт шалгалт хийгдсэн. Хөрөнгө оруулгын мэдүүлэгт дутуу бичигдсэн зүйлс гарсныг асуудал хариуцсан мэргэжилтэнд хэлж,  бүх тайлбараа хийсэн, холбогдох баримтуудыг нь эх хувиар нь үзүүлж хувилж өгсөн. Тухайн мэргэжилтэн ч хүлээн авсан. Ажил төрөлтэй холбоотой асуудлаар дараа нь дэлгэрэнгүй  ярилцья.
Ярилсанд баярлалаа