УИХ-ын намрын чуулган өндөрлөх тун дөхөж, гишүүд сонгуулийн ажилдаа шуурхайлан орж эхэлжээ. Харин УИХ-ын гишүүн Л.Гүндалайгийн хувьд сонгуулийн ажлаа эхлэх гэж яарахгүй байгаа бололтой. Түүнтэй цаг үеийн асуудлаар ярилцлаа.

- Сонгуулийн хугацаа ойртсон тул УИХ-ын гишүүд сонгуулийн тойрог руугаа яарч байна. Та хэзээ тойрогтоо очих вэ?

- Өө, тэр хар хүйтэнд би Хөвсгөл рүү яваад яахав ээ. Мал төллөх үеэр амьтан хүнд гай болно.  Чуулган завсарласан ч энд хийх юм өчнөөн байна. Тийшээ яваад дэмий байх өө.

- Танай сөрөг хүчин аль хэдийн сонгуулийн ажлаа эхэлчихсэн байхад та яагаад ийм тайван байна вэ?

- МАН бол аль хэдийн ажлаа эхэлчихсэн. Гишүүдээ ганц нэгээр нь дуудаж уулзаад  байгаа гэсэн. Аль хэдийн судалгаа шинжилгээ хийлгээд өчнөөн хүний нэр усыг зоогоод ажиллаад эхэлчихсэн байгаа шүү дээ. Тэр ч ойлгомтжой. Харин  манайхан ямар ч байсан ажиллаж байгаа байх өө. АН одоогоор тойрог хуваарилах гээд янз бүрийн асуудал ярихгүй л байна лээ. Намын удирдлага, нам цаагуураа судалгаа хийж, бэлтгэл хангаж байгаа л гэж бодоод яваад байна.

- Таны хувьд сонгуульд ер нь санаа зовохгүй, тойргоосоо гарчихна гэсэн бодолтой байгаа юм байна. Тийм үү?

- Би нэг их санаа зовоод байх юм алга. Юунд ч санаа зовдог юм бэ. Би ч одоо хувиараа гарчих байлгүй дээ. Уг нь намаараа ялчихвал сайн л байна. Гэхдээ миний биш намын удирдлагын үүрэг юм чинь яахав дээ. Үүрэгтэй ажлуудаа л хийе. Энэ жил харьцангуй мөнгө төгрөг тараахгүй, хууль нь хатуу чанга болчихсон болохоор санаа зовох юм бага гэж  бодож байна.

- Сүүлийн үед та, танай намынхан үнийн өсөлтийг бууруулах тал дээр үг хэлэхээ больжээ. МАН-ын ажил гээд орхиод байна уу?

- Улс орны хувь заяаг МАН дангаараа хариуцах болсон. МАН олонхи юм чинь эрх, үүүрэг аль аль нь тэдэнд очиж байгаа. Бусад оронд бол сөрөг хүчин ерөөсөө шүүмжлэх л үүрэгтэй. Сонгууль болно. Сонгуулийн үр дүнгээр олонхи болсон нь Засгийн газраа байгуулаад улс орноо удирдаад явна. Харин сөрөг хүчин хяналт тавина, шүүмжилнэ, болж байгаа юмыг нь дэмжинэ, болохгүй байгааг нь эсэргүүцнэ. Тэгэхээр сөрөг хүчин ажил хийх гээд байгаа юм шиг, АН-ын гишүүд улс орноо хөгжүүлчих юм шиг юм бодох хэрэггүй. Улс орноо хөгжүүлэх чинь олонхийн асуудал байхгүй юу. Цөөнх юу гэж хашгирна, орилно, дуулна тэд нарт хамаагүй шүү дээ. Тийм учраас олонхитой л ярих хэрэгтэй. Манайхан 76 хүн бүгд улсаа хөгжүүлэх ёстой гэж бодоод байдаг. Уг нь ажил хийнэ гэж ярих нь АН-ын, бидний үүрэг биш.

- Тэгвэл сөрөг хүчний хувьд юуг хамгийн их шүүмжилэх вэ?

- МАН улс орныг яаж удирдвал хамгийн муу удирдах вэ гэдгийг амьдрал дээр өөрсдөө харуулж байна. МАН сая дэд сайдууд гэж баахан олигархууд л томилчихсон байна. Улс орныг олигтой удирдаж чадахгүй байна шүү дээ. Тэрийг нь одоо хараад л сууж байхаас. Хэдэн сарын дараа сонгууль болох юм чинь ард түмэн хариуцлага тооцоод шанг нь өгөөд дүнг нь тавьчих байх. Муу удирдаж байвал сонгохгүй. Угаасаа тэд юу л бүтээж байлаа.

- АН-ын дотор сүүлийн хэд хоногт хоёр ч фракц үүсчихлээ. Үзэл бодлоо чөлөөтэй илэрхийлдэг хүний хувьд таныг "Шонхор" фракцид орж магадгүй гэсэн яриа байна?

- Үгүй, үгүй.  Намайг орж ч гэж хүсээгүй, би ч оръё гэсэн бодолгүй байна. Тэгээд фракц болгон руу гүйж ороод байдаг цаг өнгөрсөн шүү дээ. Сонгуульд фракцтай байгаад сайн байдаг юм бол хамаа алга. “Шонхор фракц” байгуулагдлаа гэж сонин хэвлэлээс л сонссон доо. Арчилсан хүчний холбоог байгуулж байсан АН-ын гишүүд л байгаа юм болов уу гэж харсан. Өөр ямар нэгэн үзэл бодол, мэдээлэл алга даа.

- Ярилцсанд баярлалаа.