Өчигдөр цагдаагийн экс дарга нарт холбогдох шүүх хурал болсон ч нэг өмгөөлөгч ирээгүй гэх шалтгаанаар хойшилсон. Тэднийг яллахаар шүүхэд өгсөн нь буруу хэмээн ар гэрийнхэн нь эсэргүүцлийн жагсаал зохион байгуулсан юм. Тиймээс ЦЕГ-ын даргын үүрэг гүйцэтгэгч асан, хошууч генерал Ч.Амарболдын эхнэр Ш.Нарангэрэлтэй ярилцлаа.
    Өчигдөр цагдаагийн экс дарга нарт холбогдох шүүх хурал болсон ч нэг өмгөөлөгч ирээгүй гэх шалтгаанаар хойшилсон. Тэднийг яллахаар шүүхэд өгсөн нь буруу хэмээн ар гэрийнхэн нь эсэргүүцлийн жагсаал зохион байгуулсан юм. Тиймээс ЦЕГ-ын даргын үүрэг гүйцэтгэгч асан, хошууч генерал Ч.Амарболдын эхнэр Ш.Нарангэрэлтэй ярилцлаа.

-Өчигдөр шүүх хурлыг эсэргүүцэж жагссан. Ямар шалтгаанаар тэр вэ? 

-Долдугаар сарын 1-ний хэрэгт цагдаагийн экс дарга нарыг шүүх гээд байгаа нь шударга бус. Хавтаст хэрэгтэй нь олигтой танилцуулаагүй, мөн “Өршөөл үзүүлэх тухай хууль”-д хамруулсан хэргийг сэргээн шалгасан, цэргийн гэмт хэргийн зүйлчлэлээр зүйлчилсэн гээд бүгд хууль бус явагдаж байна.

-Тэднийг Эрүүгийн хуулийн 294.2-т зааснаар ”Захирагч эрх мэдэл албан тушаалынхаа байдлыг урвуулан, албаны бүрэн эрхээ хэрэгжүүлээгүйгээс төрд онц их хэмжээний хохирол учруулсан” хэмээн буруутгаж байгаа. Энэ талаар та юу гэж бодож байна?

-Цэргийн гэмт хэргээр зүйлчлээд. Энэ бол маш буруу. Тэд чинь цэргийн байгууллагад ажилладаггүй шүү дээ. Тухайн үед дотоодын цэргийг оруулаагүй учраас цэргийн гэмт хэргээр зүйлчлэж болохгүй. Улс төрийн хэлмэгдэлт явагдах гээд байна.

-Тэгэхээр та хуулийн байгууллагыг хууль бус ажиллаад байна гэх гээд байна уу?

-Тийм. Анхнаасаа л хууль бус явагдсан. Тиймээс ар гэрийнхнийх нь хувьд хүсэлтээ Ерөнхийлөгчид гурав, дөрвөн удаа гаргасан. Нэг ч хариу ирээгүй.

-Хэрвээ энэ хэрэгт хэн нэгнийг шийтгэх ёстой бол хэнийг шийтгэх ёстой вэ?

-Долдугаар сарын 1-нийг өдөөн турхирсан этгээдүүд өөрсдөө л шийтгүүлэх ёстой. Ингэж хүнийг хэлмэгдүүлж болохгүй. Хэргийг шалгаж шүүх рүү явуулсан прокурор, заавар зөвлөгөөг цаанаас нь өгөөд байгаа этгээдүүд үүрэх ёстой. Хэн ч харсан бүх зүйл хууль бус явагдаад байна.

-Таны бодлоор тушаал өгсөн хүнийг хэн гэж бодож байна?

-Яг тэр энэ хардаж чадахгүй. Ер нь бол Монголын төрд үнэнч шударгаар зүтгэж, хүн буудаагүй байхад буудсан, буудах тушаал өгсөн хэмээн гүтгэж байгаад үнэхээр гомдож байна. 1000 гаруй цагдаагаас мэдүүлэг авахад дарга тушаал өгөөгүй гэж мэдүүлсэн байдаг юм билээ. Гэтэл тушаал өгсөн гээд хэрэг тохоод байгааг ойлгохгүй байна. Хамгийн гол нь бүх зүйлийг мэдэж байгаа хоёр гурван дуугүй суугаад байх  юм
.
-Хоёр, гурван хүнээ тодруулвал?

-Тодорхой ш дээ. Монголын ард ч түмэн мэдэж байгаа. Долдугаар сарын 1-ний хэргийг өдөөн турхирсан Ж.Батзандан, О.Магнай тэргүүтэй хүмүүсийг дахин шалгах хэрэгтэй. Тухайн үед нь шалгасан болоод л Өршөөлийн хуулиар суллачихсан. Гэтэл цагдаагийн экс дарга нарын хэргийг сэргээчихээд Ж.Батзандан нарын хэргийг сэргээхгүй байна. Сэргээвэл бүгдийг нь сэргээгээд шалгах хэрэгтэй. Цагдаагийн экс дарга нарт хэргийг тохож, тэднээр хаалт хийгээд байна.

-УИХ-ын гишүүн Х.Тэмүүжин цагдаа нарын буруутайг нотлоод байгаа?

-Тэгвэл мэдэж л байгаа юм байлгүй. Цагдаа хүн буудсан, цагдаагийн дарга нар тушаал өгсөн л гээд байна лээ. Сум, хонгио буу үзүүлээд байхыг бодвол сайн мэдэж л байгаа юм байлгүй.

-Та бүхэн Х.Тэмүүжин гишүүнтэй уулзсан уу?

-Бид нар уулзаж байгаагүй. Харин “Цагдаагийн ар гэрийн холбоо”-ын тэргүүн О.Алтангэрэл уулзсан. Мөн Д.Арвин, Ц.Мөнх-Оргил гишүүн хоёртой уулзсан. Бидэнд зохих ёсны хариуг ирүүлсэн.

-Ер нь Ч.Амарболд гуай долдугаар сарын 1-ний үеэр ямар шугамаар ажиллаж байв. Гэртээ хэд хоног ирээгүй вэ?

-Хоёр, гурав хоног ирээгүй. Тэр шөнө би гэртээ ганцаараа байсан. Тэгээд шөнийн 01.00 цагийн үед нөхөрлүүгээ залгахад жолооч нь утсыг нь аваад “Энд үймээн болоод дарга тантай ярих ч зав алга. Ордонд байгаа” гэсэн. Цагдаа нарын зодуулж байгааг зурагтаар хараад айж л байлаа.

-Хавтаст хэрэгт цагдаа нар хүн буудсан нь тогтоогдсон гэдэг. Ч.Амарболд өөрөө юу гэж байх юм?

-Тийм зүйл байхгүй. Нөхөр маань “Би монголын төрд өдий болтлоо зүтгэсэн. Гэтэл намайг гүтгэж, гүжирдэж байгаад яллах гэж байгаад гомдож байна. Би юу гэж тушаал өгөх вэ дээ” гэдэг.

-Ер нь буудсан хүмүүсийн тухайд юу хэлдэг вэ?

-Өөрөө "Хаагуур юу орчихов оо. Цагдааг далимдуулаад хэн нэгэн нь буудчихлаа. Энэ хэргийг прокурор сайн шалгах байсан юм" гэдэг. 

-Танай гэр бүлд ямар нэгэн дарамт шахалт ирж байв уу?

-Дарамталсан зүйл алга. Гэвч бид дарамтлуулж байгаагаас өөрцгүй амьдарч байна. Сэтгэл санаа бие махбодиороо бүрэн үхчихээд байна. Дөрвөн жил сэтгэлийн шархтай амьдарч байна.

-Ч.Амарболд гуайн биеийн байдал ямархуу байна?

-Яаж сайн байх вэ дээ. Сэтгэл санаагаар унаад бие нь жаахан тааруухан л байна даа. Энэ хэргээс болоод нэлээн л муудлаа.