Шүүхийн шийдвэр гүйцэтгэх ерөнхий газрын харьяа Эмэгтэйчүүдийн хорих 407 дугаар ангийн дарга, хошууч А.Намсамандтай ярилцлаа.
-Өнөөдрийн байдлаар танай хорих ангид хэчнээн эмэгтэй хүмүүжиж байна вэ?
-Нийт 400 гаруй эмэгтэй хоригдож байна. Энэ нь өнгөрсөн жилтэй харьцуулвал хоригдогсдын тоо харьцангуй хэвийн байна гэсэн үг. Насны хувьд ихэнхдээ 30-45 насны бүсгүйчүүд байна. Гэвч сүүлийн үед тоо нь ихсэх биш нас нь залуужаад байгаа.
-Ял эдэлж буй эмэгтэйчүүд ихэвчлэн ямар хэрэг үйлдэж байна?
-Ял эдлэхээр ирж буй эмэгтэйчүүдийн дийлэнх нь залилангийн хэргээр ял сонссон байдаг. Харин давтан гэмт хэрэг үйлдэх нь маш цөөн. Мөн онц хүнд болон хүнд гэмт хэрэг үйлдэгсдийн тоо ихэсч байна.
-Хоригдож байгаа эмэгтэйчүүд хөдөлмөр эрхэлдэг. Одоогоор эмэгтэйчүүд ямар ажил хийж байна вэ?
-Нийт хоригдож буй эмэгтэйчүүдийн 70 хувь нь тогтмол ажлын байраар хангагдаад байгаа. Ажлын байраар хангаж байгаа хоёр газар бий. Үүнд “Говь” ХХК-ийн зөөлөн оёдлын үйлдвэрийн 80 машин, манай ангийн оёдлын үйлдвэрт 80 машин ажиллаж байна. Нийт 160 оёдлын машин дээр хөдөлмөр эрхэлж, хөлсөө авч байна. Цаашлаад ажлаасаа шалтгаалаад ажлын бүтээмж болон сахилга хариуцлагын урамшуулал зэргийг авдаг. Мөн хөдөлмөрийн хөлсний доод хэмжээтэй тэнцэхүйц хэмжээний мөнгийг буюу 144 мянган төгрөгийн цалин авч байна. Энэ цалин нь төлбөртэй ялтны төлбөрт шилжиж, төлбөргүй ялтны нэрийн дансанд байршдаг. Ингээд хорих ангийн дотоод журамд заасны дагуу энэ мөнгөө ар гэртээ өгч болдог. Сүүлийн хагас жилд 20 гаруй ялтны ар гэрийнхэн ял эдэлж байгаа хоригдлынхоо цалинг тогтмол авч амьдралаа залгуулж байгаа тал ч ажиглагдаж байна.
-Эмнэлгийн тусламж, үйлчилгээ хэр хүрдэг вэ?
-Ерөнхийдөө нийт хоригдол эмэгтэйчүүдийн хувьд биеийн байдал нь хэвийн. Ер нь 30-45 насны эмэгтэйчүүдэд нийтлэг тохиолдох эмгэгүүд байдаг л даа. Тухайлбал, хоол боловсруулах эрхтний, эмэгтэйчүүдийн гэх мэт. Үүний дагуу манай зүгээс шаардлагатай эмчилгээ үйлчилгээг хэр хэмжээндээ явуулдаг. Үзүүлэх шаардлагатай бүсгүйчүүдийг эрүүл мэндийн үзлэгт өдөр бүр хамруулдаг. Одоогоор манай эмнэлэг дөрвөн, сувилагч, нэг их эмч, 10 ортойгоор ял эдэлж байгаа эмэгтэйчүүдэд эмнэлгийн тусламж, үйлчилгээ үзүүлж байна. Бусад нарийн мэргэжлийн мэс ажилбар зэргийг олны нэрлэж заншсанаар Зайсангийн буюу Хорихын нэгдсэн эмнэлэгт хийдэг. Орны болон нарийн мэргэжлийн эмч нарын хүрэлцээ муу гэх мэт асуудал гарсан тохиолдолд шаардлагатай хүмүүсийг энэ эмнэлэгт шилжүүлэн эмчилдэг.
-Ер нь хорих ангид нийтийг хамарсан арга хэмжээ хэр зохион байгуулагддаг вэ?
-Эрүүл мэндийн яамнаас өнгөрсөн жилээс эхлэн хоригдож байгаа эмэгтэйчүүдэд эрүүл мэндийн эмчилгээ, үйлчилгээ үзүүлэхээс гадна хоригдлуудад урлагийн тоглолт сонирхуулах зэрэг арга хэмжээ зохион байгуулдаг болсон. Цаашдаа уламжлал болон зохион байгуулагдах юм билээ.
Б.Чимэг
Сэтгэгдэл (4)