Монгол Улсын Ерөнхий Прокурор М.Энх-Амгалан манай улсад ажлын айлчлал хийж байгаа Олон Улсын Прокуроруудын Холбооны ерөнхий зөвлөх, хатагтай Элизабет Хов Овег өнөөдөр хүлээн авч уулзлаа.
Улсын Ерөнхий Прокурор М.Энх-Амгалан уулзалтын явцад Монголын Прокуроруудын Холбоо ОУПХ-нд 1996 онд гишүүнээр элссэн бөгөөд тус холбооны үйл ажиллагаанд идэвхитэй оролцож байгаагийн гадна 2012 онд ОУПХ-ны шугамаар хэрэгжүүлдэг “Прокурор солилцооны төсөл”-ийг амжилттай хэрэгжүүлж, Канад улсад монголын прокурорууд сургалтанд хамрагдсан, тус улсаас сургагч багш ирж бүсчилсэн сургалт явуулсан нь үр дүнтэй болсныг дурьдаад, цаашид илүү үр дүнтэй хамтран ажиллах болно гэж тэмдэглэн хэллээ.
Хатагтай Элизабет Хов Ове ОУПХ нь эгнээдээ дэлхийн 170 гаруй орны прокурорын газар, байгууллагыг нэгтгэсэн бөгөөд тус холбооны үйл ажиллагаанд Монголын Прокуроруудын Холбоо идэвхитэй оролцож байгаа, цаашид ч дээр дурьдсан төслийг үргэлжлүүлэн хэрэгжүүлэх боломжтой талаар мэдээлж, энэ жил Швецарын Цюрих хотноо “Санхүүгийн болон албан тушаалын гэмт хэрэгтэй тэмцэх“ сэдвийн дор болох Ерөнхий Прокуроруудын уулзалтанд оролцох урилгыг Улсын Ерөнхий Прокурор М.Энх-Амгаланд гардуулан өглөө.
Уулзалтанд Улсын Ерөнхий прокурорын туслах, Тамгын газрын дарга Б.Үнэнбат ГХЭЗТХ-ын дарга Г.Ганзориг, ХМОНХА дарга Т.Сүхбаатар нар байлцлаа.
Хадагтай Элизабет Хов нь 1977 онд Английн “Exeter” их сургуулийг хуульч мэргэжлээр төгсөж, 1980 онд Англи болон Уэльсийн дээд шүүхээс өмгөөлөгчөөр ажиллах лиценз зөвшөөрөл авчээ. 1980 оноос Лондон хотод прокуророор ажиллаж байсан бөгөөд 1999 онд Английн Кент хотын Ерөнхий прокуророор томилогдсон байна.
2003-2005 онд Кент мужийн Эрүүгийн шүүн таслах ажиллагааны удирдах зөвлөлийн дарга, Прокурорын газрын гүйцэтгэх зөвлөлийн гишүүн, Эрүүгийн эрх зүйн шинэтгэлийн гишүүн, 2006-2007 онд Дээд шүүхийн прокурор, Кент хотын хуулийн нийгэмлэгийн ерөнхийлөгч зэрэг албыг тус тус хашиж байжээ.
Тэрээр 2007 онд ОУПХ-ны ерөнхий зөвлөхийн ажилд Англи болон Уэльстийг төлөөлж түр томилогдсон байна.
Элизабет Хов нь ОУ-ын Эрх зүйн туслалцаа үзүүлэх консерциумын гишүүн, Эрүүгийн хуулийн шинэтгэлийн олон улсын нийгэмлэгийн удирдах зөвлөлийн даргын ажлыг мөн хавсран гүйцэтгэдэг байна.
2008 оны 1-р сард түүнийг прокурорын байгууллагад ажилласан зүтгэлийг үнэлж Эзэн хааны нэрэмжит одонгоор шагнажээ.
Мөн энэ өдөр хадагтай Элизабет Ховийг Улсын Ерөнхий Прокурорын орлогч, Төрийн Хууль Цаазын Шадар зөвлөх Г.Эрдэнэбат хүлээн авч уулзан прокурорын байгууллагын хамтын ажиллагааны талаар ярилцаж санал солилцлоо.
Уулзалт элэгсэг дотно байдалд болж өндөрлөлөө.
Д.Ундрах /24tsag.mn/
