ЭЕШ-ын өмнөтгөл болгож Монгол хэл, бичгийн шалгалтыг орон даяар энэ сарын 21-ны өдөр авсан. Тэгвэл тус шалгалтын хариу ирэх сарын 4-нд гарах юм байна.  Шалгалтад оролцсон нийт сурагчдын материал Боловсролын үнэлгээний төвд ирчихсэн бөгөөд одоогоор гараар засах ажил явагдаж байгаа аж. Шалгалтын материалын 75 хувийг гараар үлдсэн 25 хувийг машинд уншуулж засна гэж Боловсролын үнэлгээний газраас мэдээллээ. Тус шалгалтын босго оноо 400 байх бөгөөд үүнд хүрэхгүй бол ЭЕШ өгөх эрхгүй болох юм. Монгол хэл, бичгийн шалгалтыг энэ жил хоёр удаа авах бөгөөд эхнийх нь энэ сарын 21-ны өдөр нөгөөх нь ирэх дөрөвдүгээр сарын 25-нд болох юм. Эхний шалгалтад 400 оноо аваагүй хүүхдүүд дараа сарын шалгалтад орох аж. Энэ жил ЕБС-ийг 19.293 хүүхэд төгсч байгаа. Үүн дээр өмнөх оны төгсөгчид нэмэгдээд нийт 25 000 орчим хүүхэд ЭЕШ өгнө. ЭЕШ-ын бүртгэл ирэх сарын 20-ны 18.00 цагт дуусахыг албаныхан анхаарууллаа.

Т.Энхэлээ