Иргэдэд Засгийн газраас олгож байгаа 21 мянган төгрөгийг энэ сард удааж байж тараасан. Учир нь том Таван толгойг эзэмшдэг төрийн өмчит "Эрдэнэс Таван толгой" ХК мөнгө, хөрөнгөгүй болсон гэж мэдээлж байна. Энэ талаар УИХ дахь АН-ын бүлгийн дэд дарга Л.Гантөмөрөөс зарим асуултад хариулт авлаа.

- Иргэн бүрт сая төгрөг, түүнтэй тэнцэх хувьцаа өгөх асуудал юу болж байна вэ? Хүлээлт их үүссэн байна?
- Намрын чуулганаар “Таван толгойн ордыг ашиглах зарим асуудлыг тухай 39-р тогтоолд өөрчлөлт орсноор иргэн бүр нэг сая төгрөгийн хувьцаа авна гэж зааж өгсөн. Энэ ажил өнөө маргаашгүй эхлэх шатандаа орж байна. Эхний ээлжинд тэр хувьцааг авсны дараа хувь хүний нэр дээр данс нээгээд мөнгийг нь байршуулахаар заасан байгаа. Хэрэв хувьцаагаа Засгийн газарт заръя гэвэл тэрийг нь Засгийн газар мөнгөжүүлэх үүрэг хүлээсэн байна. Хувьцаа авсны дараа эхний ээлжинд ахмад настан, хөгжлийн бэрхшээлтэй иргэдэд өгнө өө гэсэн ойлголтой байгаа.

- Цагаан сарын өмнө өгнө гэж ярьж байсан. Яагаад одоо хүртэл өгөхгүй байгаа юм бэ?
- Засгийн газрын 57-р тогтоолд өндөр настан хөгжлийн бэрхшээлтэй иргэдэд сая төгрөг  өгнө гэсэн заалт байгаа. Гэтэл энэ хувьцаа, сая төгрөг нь тогтоолынхоо хувьд давхар үйлчлэх болчихоод байгаа. Одоо мөрдөгдөж байгаа хоёр тогтоолоороо өгөх гэхээр ахмад настан, хөгжлийн бэрамшээлтэй иргэдэд сая төгрөг өгнөөд дээр нь мөн сая төгрөгийн үнэлгээтэй хувьцаа өгнө гэсэн ойлголт гарч ирээд байгаа юм. Энэ ойлголтын зөрүүг Засгийн газар өнөөдөр болтол нэг тийш нь шийдээгүй.

- Ямар саад, ямар асуудал байгаа юм бол?
- Засгийн газар хариуцлагагүй байна. Ажлаа хийхгүй байгаа юм уу л гэж харагдаж байна. Ер нь энэ хувьцааг тараах сонирхолгүй, “Эрдэнс таван толгой”-н ажлыг урагшлуулья гэсэн сонихолгүй байгаа дүр зураг харагдаад байна. “Эрдэнэс таван толгой”-г болж өгвөл ингэж, тэгэж байгаад гадны операторуудад хувьцаагаа өгчих санаатай.  Бид нарын авч байгаа мэдээллээр бол “Эрдэнэс Таван толгой” өнөөдөр өрөнд орчихсон байгаа. 260 сая төгрөгийг  Хятадын “Чайналко” компаниас аваад тэр мөнгөө Засгийн газарт өгчихсөн. Одоо “Эрдэнэс Таван толгой” өөрсдийнхөө үйл ажиллагааг явуулах зардалгүй сууж байгаа.  “Чайналко”-гоос авсан мөнгөө иргэддээ 21 000 төгрөг болгоод тараагаад өгчихсөн. Харин үүний оронд Засгийн газар “Эрдэнэс Таван толгой” ХК-ний үйл ажиллагаагаа явуулахад нь анхаарлаа хандуулахгүй байна. Уг нь тэр борлуулалтыг нь тасалдауулахгүй байж нь орлогоороо хувьцаагаа мөнгөжүүлэх ажлыг зохион байгуулах ёстой шүү дээ.  Цаашид ч энэ асуудал хүндрэлтэй болж байгаа.  Засгийн газраас “Эрдэнэс Таван толгой”-н үйл ажиллагаа шалтгаалаад байгаагийн нэг жишээ энэ. Орлогоороо нь  өөрсдийн нь үйл ажиллагааг санхүүжүүлээд ажиллах хялбар зам байхад  албаар мөнгийг нь авч компаний ажлыг зогсоочихоод байна.

- Улсын төсөвт иргэдэд тараах сая төгрөгийг оруулсан гэж яриад байсан шүү дээ?
- Иргэн бүрт сар болгон  өгч байгаа 21 мянган төгрөг нь  331 тэрбум болж байгаа. Үүнийгээ  улсын төсөв оруулаад баталчихсан. Яг өнөөдөр тэрийг нэг амьсгаагаар өгөх үү, сар сард нь өгөх үү, гэдэг нь Засгийн газрын хийх ажил л даа. Дахиад тайлбарлая. Хоёр зүйл давхардчихаад байна. Хүн бүрт сая төгрөг өгнө өө гээд тогтоолоо баталчихсан. Тэгсэн хэрнээ “Эрдэнэс Таван толгой” хэлэлцээд Засгийн газартаа нэг сая төгрөг өгнө гэсэн тогтоол гарчихаад байдаг. Үүнийхээ учрыг Засгийн газар олоод, задлаад асуудлаа шийдээд явах ёстой. Тэгээд нэг бүдэг бадаг юм хийчихээд хараад суугаад байдаг. Энийгээ засахгүй, учраа олохгүй яваад байна. Үүний цаана үүсч байгаа хамгийн том асуудал бол “Эрдэнэс Таван толгой”-н үйл ажиллагаа ургашлахгүй байна. Энэ компаний ажил урагшлаад ашигтай ажиллаж чадах юм бол зүүн тийшээ нүүрсээ зөөх замаа яах юм% төмөр замаа яах юм, дэд бүтэц, худалдааны гэрээгээ яах юм гээд маш олон асуудал хүлээгдээд байна. 

- Ярилцсанд баярлалаа.