Төмөр замын газрын орлогч дарга Л.Пүрэвбаатар, ЗТБХБ-ын сайд асан Х.Батулгыг буруушаасан захидлыг явуулсан билээ. Тус захианд Х.Баттулгын хийсэн  нууц гэрээний талаар болон хувиараа дур мэдэн шийдвэр гаргадаг, мэргэжлийн салбарт ажилладаг хүмүүсийн санаа бодлыг сонсдоггүй гэх мэт асуудлыг тусгасан байсан. Чухам яагаад Х.Баттулгыг эсэргүүцсэн захидал бичсэнийг тодруулахаар түүнтэй холбогдож тодруулга авлаа.

-    Х.Баттулга сайдад бичсэн таны захидал хэвлэл мэдээллийн хэрэгслүүдээр гарсан. Энэ талаар хэдэн асуултанд тодруулга авах гэсэн юм?

-    Юун захидал билээ. Би захидал бичээгүй шүү дээ. Зүгээр л санаа бодлоо илэрхийлсэн. Төмөр замын төсөл хэрэгжихгүй байгаа шалтгаан нь Х.Баттулга сайдаас өөрөөс нь болсон. Төмөр замын ажил мэргэжлийг эзэмшсэн хүмүүстэй санаа бодлоо солилцох хэрэгтэй байсан юм. Түүнээс биш төрийн ажлыг хувийн ажил болгож төмөр замыг барьж байгуулна гэж байхгүй л гэж хэлэх байна.  Энэ салбарт ажилладаг 16 мянган хүний хүсэл зорилго, санаа бодлыг Х.Баттулга сонсоогүй.


-    Та бичсэн захидалдаа өөрийн хэлэх гэсэн санаагаа л тусгасан гэсэн үг үү?

-   Тиймээ тийм. Би яг байгаа байдлыг хэлье гэж бодсон. Төмөр замын хөгжүүлэх төслийг будлиулж хаячихаад бие биенийгээ буруутгаж болохгүй шүү дээ. Салбарын сайд нь өөрөө энэ ажлаа хийх ёстой байтал ийм хариуцлаггүй зүйл хэлээд сууж болохгүй. Төмөр замын төслийг хэрэгжүүлэх маш олон боломж байсан. Тэр боломжийг Х.Баттулга сайд ашиглаагүй.


-    Төмөр замын төслийг хэрэгжүүлэх бололцоо байсаар байхад Х.Баттулга сайд ажлаа хийгээгүй гэж үү?

-    Тийм. Олон улсууд энэ төсөлд оролцох саналтай байсан. Төмөр замчин бид нар ч энэ ажлыг дэмжиж байсан. Бүгдээрээ хамтраад хийё гэж байсан ч энэ төслийг бүр будлиулаад хаячихсан. Улс орны хэмжээний бүтээн байгуулалтын энэ том ажлын  талаар төр, засгийн өмнө хуулиар хүлээсэн үүрэг бүхий Төмөр замын газар буюу мэргэжлийн хэрэгжүүлэгч агентлаг, Үндэсний хөгжил шинэтгэлийн хороо цаашилбал Монгол төмөр зам, Улаанбаатар төмөр зам гээд мэргэжлийн байгууллагуудийг огтоос татаж хамруулан оролцуулаагүй төрийн төсөл юмуу хувийн төсөл юмуу гэдэг нь ойлгогдохооргүй “нууц” гэрээ, төсөл болон явж ирсэн байна.



-    Таныг АН-ын гишүүн хүн гэж сонссон. Тэгтэл нам нэгтэй нөхөр лүү гээ ийм эсрэг байр суурьтай зүйл хийгээд байгаа нь хүмүүсийн анхаарлыг ихэд татаж байх шиг байна ?

-    Төмөр замын дэд дарга бол төрийн албан хаагч учраас ямар нэгэн намаас татгалздаг. За тэр ч яахав. Ийм ажил мэргэжлийн, бүтээн байгуулалтын, хөгжлийн асуудалд нам огт хамаагүй шүү дээ. Төмөр замын асуудлаар улс төр хийх гээд байгаа нь утгагүй л санагдаж байна.


-    Энэ нь сонгууль дөхсөний нэг илрэл болоод байна тийм үү?

-    Тийм л байх даа.

Л.Пүрэвбаатар даргын Х.Баттулга сайдад бичсэн захидлыг энд дарж уншина уу.