Өнөөдөр Чингэлтэй дүүргийн шүүхэд 15.00 цагаас Б.Батболд, З.Баянсэлэнгэ, М.Амартүвшин, Я.Мөнхсайхан, Д.Шонхоо нарыг шүүнэ. Тэд өнгөрсөн арваннэгдүгээр сарын дундуур экс ерөнхийлөгч Н.Энхбаярын туслах Б.Тулгыг УМБГ-аас баривчлахад нь сулла хэмээн жагсаал зохион байгуулж байсан юм.
    Өнөөдөр Чингэлтэй дүүргийн шүүхэд 15.00 цагаас Б.Батболд, З.Баянсэлэнгэ, М.Амартүвшин, Я.Мөнхсайхан, Д.Шонхоо нарыг шүүнэ. Тэд өнгөрсөн арваннэгдүгээр сарын дундуур экс ерөнхийлөгч Н.Энхбаярын туслах Б.Тулгыг УМБГ-аас баривчлахад нь сулла хэмээн жагсаал зохион байгуулж байсан юм.
    Тэгэхдээ Нийслэлийн прокурорын газрын хяналтын прокурор О.Мөнхбаатарын биед халдан, хуулиар хүлээсэн үүргээ гүйцэтгэж байхад нь хүч хэрэглэсэн хэмээн тэднийг Эрүүгийн хуулийн 230 дугаар зүйлийн 230.1, 245.1-д зааснаар үндэслэн эрүүгийн хэрэг үүсгэсэн юм. Гэвч тэд эрүүгийн хэрэг үүсгэсэн нь буруу хэмээн Үндсэн хуулийн цэцэд гомдол гаргасан.
    Энэ талаар өнөөдөр шүүгдэх гэж буй Ардчилал, шударга ёс Монголын залуучуудын холбооны удирдах зөвлөлийн гишүүн М.Амартүвшинтэй цөөн хором ярилцлаа.

-Та бүхэн ямар учраас Үндсэн хуулийн цэцэд хандав?

-Биднийг Нийслэлийн прокурорын газрын хяналтын прокурор О.Мөнхбаатарын биед халдсан гэх үндэслэлээр Эрүүгийн хуулийн 230.1, 245.1-д зааснаар эрүүгийн хэрэг үүсгэсэн. Энэ нь хууль бус ажиллагаа. Учир нь О.Мөнхбаатар прокурор мөрдөн байцаагчид “Миний биед хүч хэрэглэн халдаагүй” гэсэн мэдүүлэг өгсөн байдаг. Прокурор өөрөө ийм мэдүүлэг өгчихөөд байхад бидэнд эрүүгийн хэрэг үүсгэсэн нь хууль бус. Тэгэхээр МУ-ын Үндсэн хуулийн 16-р зүйлийн 10 дахь заалт, 13 дахь заалт, 14 дэх заалт, 16 дахь заалт, 19-р зүйлийн 1 дэх заалтыг зөрчсөн үйлдэл болж байгаа юм. Тиймээс бид эрүүгийн хэрэг үүсгэсэн нь буруу, хууль бус хэмээн Үндсэн хуулийн цэцэд гомдол гаргасан юм.

-Тэгээд цэцээс ямар нэгэн хариу өгсөн үү?

-Өгсөн. Гэвч харамсалтай нь “Энэ асуудал бидэнд хамаагүй. Бидний шийдэх хэрэг биш” гэсэн хариу ирүүлсэн.

-Ингэхэд яагаад эрүүгийн хэрэг үүсгэсэн нь буруу гээд байгаа юм. Та бүхний прокурорын биед халдсан бичлэг байдаг шүү дээ?

-Бид ямарч прокурорын биед халдаагүй. Бичлэг дээр ч тэр халдсан нэг ч үйлдэл байдаггүй. Харин жагсаал, зохион байгуулахаар цугласан бичлэг л байдаг. Прокурор өөрөө “Миний биед халдаагүй” гэсэн мэдүүлэг өгчихөөд байхад эрүүгийн хэрэг үүсгэн, яллах дүгнэлт үйлдэж, шүүхэд шилжүүлсэн нь хуулийн байгууллагууд төрийн өндөр дээд албан тушаалтны тушаалаар хэн нэгнийг шууд эрүүгийн хариуцлагад татаж болдогийг харуулж байна. Ер нь сүүлийн үед шүүх , прокурорын байгууллага улс төрчдийн гараар хөдлөөд байна уу даа гэсэн зүйл ажиглагдаж байна.

-Тэгэхээр та бүхнийг шүүх гэж байгаа нь улс төрийн захиалга гэж хэлэх гээд байна уу?

-Тийм. Энэ бол цэвэр улс төрийн үйл ажиллагаа ш дээ. Энэ жил сонгууль болно. Тиймээс улс төрийн өрсөлдөгчөө улс төрийн тавцангаас арчиж хаях гэсэн увайгүй оролдлого гэж ойлгож байгаа. Улс төрийн тоглолт хийдэг хүмүүсийн хорт явуулгаар биднийг ялтан болгох гээд байна.

-Таны ярианаас хэн нэгэн энэ бүхнийг зохион байгуулж байна гэж ойлгож болох уу?

-Би бодохдоо Улсын ерөнхий прокурор Д.Дорлигжавын шууд даалгавраар энэ ажиллагаа явагдаж байгаа гэж ойлгож байгаа. Ард түмнийг жагсаал цуглаан хийх, үзэл бодлоо илэрхийлэх эрхгүй болгож, хэрвээ жагсаал цуглаан хийгээд олон долоон юм яриад байвал чинь ингээд эрүүгийн хэрэгтэн болгоно шүү гэсэн айдаст автуулахын тулд л ингэж байгаа байх.

-Та нар бас сэтгүүлч Г.Уянга, А.Баатархуяг нарыг шүүх үед жагсаж байсан байх аа?
 
-Тийм. Сэтгүүлч А.Баатархуяг, Г.Уянга нарыг эрүүгийн хуулийн 111.1, 111.2-оор буруутгаж шүүх гэж байхад нь хууль хяналтынхан хэн нэгэн албан тушаалтны гарын үзүүрт үйлчлээд байна хэмээн бид эсэргүүцэж, жагсаж эхэлсэн. Гэтэл удаа ч үгүй Ардчилал, шударга ёс Монголын залуучуудын холбооны удирдах зөвлөлийн гишүүн Б.Тулгыг улс төрийн зорилгоор үндэслэлгүйгээр цагдан хорихтой нь зэрэг бид нар эсэргүүцэн цуглаж, үзэл бодлоо илэрхийлсэн. Үүнээсээ болж бид өнөөдөр эрүүгийн гэмт хэрэгтэн болчихлоо. Өмнө нь бид прокурорын байгууллагад үнэний дуу хоолой болсон иргэдийг эрүүгийн хэрэгтэн болгодогоо боль гэсэн шаардлагыг прокурорын байгууллагад хүргүүлж байсан.

-Тэгээд ямар нэгэн хариу өгсөн үү?

-Хариу өгч байгаагүй. Ер нь Монгол улсад үйл ажиллагаа явуулж буй хууль хяналтын байгууллагууд хувь хүний эрх, эрх чөлөөг зөрчөөд байгааг бид нар эсэргүүцсэнийхээ төлөө эрүүгийн хэрэгтэн болчихсон өнөөдөр шүүгдэх гэж байна.