Арван есөн настайдаа өөрөөсөө арван гурван насаар ах Уэльсийн хунтайж Чарльзтай гэрлэж, түүнээс хойш амьдралынхаа хором бүрийг олны анхаарлын төвд өнгөрүүлсэн Диана гүнжийн хэвлэлд өгсөн сүүлчийн ярилцлагыг 24tsag.mn сайт орчуулан хүргэж байна. Баян тансаг, хангалуун байлаа ч хүн хүнээ гэсэн сэтгэл байхгүй бол жаргалтай амьдарч чаддаггүйн жишээг түүний богинохон хэрнээ бартаатай амьдрал өгүүлнэ. Түүний нөхөр хунтайж Чарльз хуучин найз бүсгүйтэйгээ уулздаг болж, тэдний гэрлэлт сүйрлийн ирмэг дээр ирээд байгаа тухай ном гарсан нь тэдний байдлыг улам дордуулсан юм. Бүгд түүнийг харж, ажиглаж байлаа. Буруутгаж ч байлаа. Харин Диана гүнжийг 1997 оны 8-р сарын 31-нд авто машины ослоор нас барахад дэлхий даяар харамсан гашуудсан. Түүний 1995 оны 11-р сарын 20-нд "ВВС" телевизэд өгсөн ярилцлага бүгдийг гайхшруулж орхисон. Учир нь тэр салсан нөхөртөө хайртай гэж хэлсэн, бас Засгийн газрыг дайснаа гэж зоригтой нэрлэсэн юм. Түүний энэ ярилцлага 20-р зууны шилдэг ярилцлагад тооцогддог юм.

- Та яагаад хэвлэлийнхэнд хандах болсон юм бэ? Ялангуяа хувийн амьдрал, салалтынхаа тухай ярина гэдэг тийм ч амархан шийдэх зүйл биш байх аа?
- Би нөхрөөсөө салаад гурван жил болж байна. Хүмүүс бидний тухай үнэн худал нь мэдэгдэхгүй юм их ярьдаг. Гудамжинд ч манай хүүхдүүдийн сургууль дээр ч тэр. Хүмүүс бодит үнэнийг мэдэх цаг болсон.

- Тэгвэл яриагаа шууд эхэлье. Бодит үнэн гэж юу вэ?
- Би нөхрөөсөө салах хүсэлгүй байсан гэдгийг хүмүүс тэр болгон мэддэггүй. Анх Чарльзтай гэрлэнэ гэж шийдэхдээ л өөрийгөө түүнд хайртай гэдгийг мэддэг байсан.

- Түүнтэй суувал гүнж болно, цаашлаад хатан хаан ч болох боломжтой гэдгийг тооцоолсон л биз дээ?
- Чарльз бид хоёрын хамгийн том асуудал бол наадах чинь шүү дээ. Нөхөр маань хариуцлагатай, нэр хүндтэй ажил хийдэг болохоор би ч бас түүний зэрэгтэй байхыг хичээдэг байсан. Та мэднэ дээ, би ямар нэг хэлбэрт баригдахыг хүсдэггүй хүн. Бид хамтдаа олон бэрхшээлийг туулсан. Би хатан хаан болохоос илүү нөхрөө нэгдүгээрт тавина. Миний дотор ийм бодол үргэлж байсаар ирсэн.

- Тэгвэл яагаад өнөөдрийнх шиг байдалд хүрчихэв ээ?
- ...ммммм....Хэн нэгнийг буруутгах амархан л даа. Их олон шалтгаан бий. Биднийг анх сүй тавихад бас гэрлэж байхад хэвлэлийнхэн тэгтлээ их анзаардаггүй байсан. Харин бидний харилцаанд асуудал гараад ирэнгүүт л хошуурцгаасан. Хаа сайгүй миний зураг, миний тухай нийтлэл. Би бараг л хатан хаанаас илүү алдартай болсон шүү. /инээв/. Гэхдээ энэ бүхэнд хүмүүс намайг буруутгаад байх шиг санагддаг. Анх хатан хааны ордонд ирэхдээ ёстой л галзуу барын аманд гараа хийхээс буцахгүй тийм л шийдэмгий байсан. Тэр уед нөхөр маань асуудал үүсгэсэн бол би огт еөрөөр хандах байсан байх. Харин гэрлэлтээ цуцлуулж байх үедээ хоёр хүүгийнхээ сэтгэлийг, нөхрийнхөө нэрийг гутаахгүй байхыг хичээсэн ч болоогүй.
 
- Хунтайж Чарльз та хоёрын харилцааг номонд бичиж илчилсэн хүн таны найз Жонатан Димбл байсан?
- Итгэж явсан хүн маань хавцлын ангал руу намайг түлхсэн. Яаж сайхан байхав дээ. Гэхдээ намайг гэсэн хүн олон байдаг аа. Тэднийхээ сэтгэлийг гонсойлгохгүй гэж хичээдэг. Тантай ярилцаж суугаа маань үүнтэй ч холбоотой. Чарльзийг өөр бүсгүйтэй болсныг би өмнө нь гадарлаж байсан л даа.

- Тийм гэж үү? Яаж мэдсэн юм бэ?
- Зөн совингоороо.

- Ингээд л болоо гэж үү?
- Тэр чинь миний нөхөр шүү дээ. Зан ааш, надтай харьцах байдал нь өөрчлөгдөж байгаа нь эртнээс анзаарагдсан. Ядаж байхад хэвлэлийнхэн зүгээр байлгахгүй, тэр хэргийг улам дэврээж байсан. Та бод доо, нэг залуу ирээд та над руу нэг сайхан инээмсэглээд өгөөч. Би авсан зургаа зараад хүүхдээ сургуульд сургах гэсэн юм гэж байсан. Би ч өөрийнхөө чадах зүйлийг хийж инээсэн. Гэхдээ л дотроо уйлж байсныг минь хэн ч мэдээгүй. Энэ бүгд Чарльзийн нүдэнд ил байсан шүү дээ гэж бодохоор жаахан гомдоод байдаг юм.

- Таныг өөрийгөө гэмтээсэн гэж сонссон юм байна?
- Таныг энэ тухай сонсоогүй гэвэл харин би гайхах юм байна. Эргэн тойронд мянга мянга, сая сая хүн байхад хэн ч таныг сонсохгүй, ойлгохгүй байна гээд бод доо. Эзгүй арал дээр хаягдснаас ч дор. Тэгээд заримдаа гар, хөлөө гэмтээдэг байсан млнь үнэн. Гэхдээ хэзээ ч мансууруулах бодис хэрэглэж байгаагүй. Яагаад гэвэл би хэн гэдгээ мэднэ, бас хэн байх ёстойгоо ч ухамсарладаг. Харин дайснууд маань тэрийг харчихаад намайг сэтгэцийн өвчтэй, галзуу гэж олонд зарласан.

- Дайсан гэж хэн билээ?
- Засгийн газрыг ярьж байна л даа. Уэльсийн хунтайжийн нэр хүнд цэвэр байх нь тэдний хувьд чухал гэдэг нь ойлгомжтой. Олон жил түүний хажууд сууж, цуг явж, гүнж гэж нэрлэгдэж байсны хувьд хаант улсын нэр төр ямар чухлыг мэднэ. Хатан хааны гэр бүлийнхэн надад дургүйлхдэг болсныг би аль хэдийн анзаарсан. Хачин нь хэн нь ч улаан нүүрэн дээр минь хэлж байгаагүй юм байна.

- Тэгээд та яах болж байна?
- Би бол хүчирхэг эмэгтэй. Үгүй гэж үү? Миний амьдралаас нэг эр хүн явлаа ч цаана нь хийх зүйл өчнөөн их байна. Эмнэлгийн орон дээр хэвтэж байгаа өвчтэй хүмүүс хамгийн зөв хүмүүс байдаг гэдгийг та мэдэх үү? Тэд амьдралын үнэ цэнийг ойлгосон, ямар сайхан гэдгийг нь мэддэг. Яахав намайг хараад тэд их баярладаг болохоор би ч бас баярладаг. Би төлөөлөгч болохоор шийдсэн. Сайхан сэтгэлээр бусдад тусалдаг хүмүүсийн төлөөлөгч байж болно шүү дээ.

- Хадагтай Камила Паркер-Боулес /Хунтайж Чарльзийн хуучин найз бүсгүй/ таны гэрлэлтийг бусниулсан гэж бодохгүй байна уу?
- Хайрын холбоонд гурван хүн яагаад ч багтахгүй, гурвалжин хайр дурлалын романс надад хэрэггүй. Нэг номонд хайрын гурвалжинд ялагч байдаггүй гэж бичсэн байсан нь санаанд орж байна. Бүгд л ямар нэгэн хэмжээгээр хохирдог шүү дээ.

- Та хамгийн их хохирсон нь биш гэж үү?
- Хүүхдүүдэд маань л таагүй санагдаж байгаа байх. Анх тэдэнд аль болох тайвнаар ойлгуулахыг хичээсэн. Миний эцэг эх хоёр намайг бага байхад салсан юм. Хүүхдэд ямар хэцүү байдгийг мэднэ ээ. Би сайн хүүхдүүдтэй азтэй ээж.

- Та хатан хаан болъё гэж боддоггүй байж. Тэгвэл хунтайж Чарльз хэзээ нэгэн цагт хаан болох болов уу?
- Хэвлэлийнхний толгойд байнга эргэлддэг асуулт гэдгийг нь мэдэж байна л даа. Гэхдээ үүний хариултыг хэн ч мэдэхгүй. Хэн ч амьдралын шугам хаашаа яаж эргэхийг мэдэхгүй.

- Та хамгийн ойрын хүн нь биз дээ? Яагаад мэдэхгүй гэж?
- Энэ сэдвийг хөндөх болгонд бид хоёр хоорондоо маргалддаг байсан. Би Уэльсийн ханхүү ямар ёс горимд баригдаж, яаж бусдын хараан дор амьдардгийг мэднэ. Хаан болвол бүр л эрх чөлөө нь багасна гэдгийг тэр мэддэг. Тэр ямар нэг зүйлд баригдаад байхыг хүсдэггүй. Энэ зан чанараараа надтай адилхан байж болох юм. Би нөхрийгөө өөртөө таарч, тохирсон амьдралаа олоосой гэж хүсэж байна даа.

- Та ирээдүйд амьдралаа ямраар төсөөлж байна? Ёстой өөрөө өөрийнхөөрөө амьдарна биз дээ?
- Дээр хэлсэн дээ. Надад ажил, найз нөхөд, хүүхдүүд байна. Гэхдээ би одоо хүртэл хэвлэлийнхний анхаарлын төвд байна. Тэд 16 жил намайг зарж идлээ. Болоогүй юм байх даа л гэж бодож сууна. Мэдээж би тэднээс зугтаад бүгээд байхгүй. Өөрийнхөө хийх ёстой зүйлээ хийж л байна. Хийх ч болно. Харин гэрийнхээ ойролцоо, цонхныхоо доор тэднийг хармааргүй л байна шүү. Би чинь хувийн амьдралтай хүн.

- Эцэст нь асуухад та хунтайжид хайртай байсан юм чинь салахгүй байж болоогүй юм уу?
- Би өөрийн гэсэн бодолтой, биеэ даасан эмэгтэй. Нөхцөл байдал тийм байсан хойно яая гэхэв. Энэ тухайд харамсаж байсан удаа байхгүй ээ.