Нэг жилийн өмнөх энэ өдөр Ч.Сайханбилэг УИХ-ын гишүүдийн 95.5 хувийн саналаар Ерөнхий сайд болжээ. Энэ үед УИХ-ын гишүүд түүнд хандан хэлсэн үгэндээ “Хүнд үед зориг гарган Ерөнхий сайдад нэр дэвшсэн учир дэмжиж байна” гэж онцолж байв. Тэр үнэн. Ч.Сайханбилэг улс төр, эдийн засгийн хүндхэн нөхцөлд Ерөнхий сайд болсон.

Түүнийг ажил авахад төсвийн алдагдал 808 тэрбумаар тасарснаас гадна өр зээл нь өндрөө авч гадаадын хөрөнгө оруулалт хоёр дахин буурч, валютын төгрөгтэй ханш хоёр мянга руу дөхсөн байв. Мөн Тавантолгой, Оюутолгой зэрэг уул, уурхайн томоохон төслүүд нь гацаанд ороод яах нь тодорхойгүй байлаа. Улс төрийн хувьд ч дээр, дооргүй хямралын байдалтай байсан юм. Ч.Сайханбилэгт өмнөх сайдууд шиг их мөнгө байсангүй. “Эдийн засаг, эдийн засаг, эдийн засаг” гэх үгийг уриагаа болгосон тэрбээр  элгээрээ мөлхсөн эдийн засгийг сэргээх аргыг Тавантолгой, Оюутолгойгоос хайсан ч бүтэлгүйтсэн юм. Гацууртын ордыг ухуулахгүй гэсэн нэг хэсэг нь Төрийн ордны гадаа жагсаж байсан бол Оюутолгой, Тавантолгойг хөдөлгөх төслийг нь ордон дотор унагасан. Энэ мэт янз бүрийн шалтгаанаар эдийн засаг сэргэсэн зүйлгүй бахь, байдгаараа байна.

Тэрбээр өнгөрсөн нэг жилийн хугацаанд өөрийн болон өрөөлийн намынхны янз бүрийн хатгаасанд ажилласныг хүмүүс мэднэ. Гэхдээ тэднийг сөрж, шийдэмгий зоригтой ажилласан уу гэвэл үгүй. Үүний нэг илрэл нь МАН-ыг Засгийн газраасаа хөөсөн явдал байв. Уг нь тэр үүнийг хүсээгүй. Намынх нь зарим дарга нарын шахалт түүнийг МАН-аас сонгогдсон зургаан сайдаа үдэж өгөхөд хүргэсэн юм. Харин одоо МАН Ч.Сайханбилэгийн хүчтэй сөрөг хүчин болж ажиллаж байна. Ер нь түүнийг хазайсан дээр нь түлхэхээр хүлээж буй хүмүүс их. Анх 19 сайд 17 дэд сайдтайгаар үйл ажиллагаагаа эхлүүлсэн Шийдлийн Засгийн газар энэ сарын 2-ноос дэд сайдгүйгээр ажиллаж эхэллээ. Оюутолгойн асуудлаас болж Ч.Сайханбилэгийг унагах ажил удахгүй эрчимжиж мэднэ гэх мэдээлэл бий. Харин тэр хүртэл Тавантолгой шийдэгдэхгүй байсаар өнгөрөх нь. Оюутолгойн хувьд удахгүй далд уурхайн хөрөнгө оруулалтын санхүүжилт нь орж ирэхээр хүлээгдэж байна. Харин бусад том төслүүд нь нэг л явцгүй гацсаар.  Ч.Сайханбилэгийн бүрэн эрхийн хугацаа зургаан сарын дараа дуусна. Тэр болтол түүнд болон Засгийн газарт нь юу тохиолдохыг хэлэхэд эрт байна.

Шийдлийн Засгийн газрын өнгөрсөн нэг жилийн хугацаанд хийж, бүтээсэн ажлыг нь сонирхуулъя.

- Монгол улсын бүрэн цахилгаанаар хангах Эгийн голын усан цахилгаан станцын бүтээн байгуулалтын ажлыг суурь тавигдав.

- Олон жилийн туршид эвдрэлтэй явж ирсэн Төв цэвэрлэх байгууламжийш засварлах ажлыг ирэх хавраас эхлүүлэхээр боллоо.

- Өдөрт 900, жилд 270.000 шоо метр бетон үйлдвэрлэх МАК компанийн бүрэн автомат хийт бетоны үйлдвэр ашиглалтад оржээ.

- Жилд сая тонн цемент үйлдвэрлэж дотоодын хэрэгцээний тал хувийг хангах “Монцемент” үйлдвэр ашиглалтад оров. Үйлдвэрийг “Чингис” бондын 45 сая ам.доллараар санхүүжүүлжээ.

- ДЦС-5 төслийн гэрээг байгуулжээ. 450 МВт цахилгаан, 587 МВт дулаан үйлдвэрлэх энэ станцыг барьж угсрахад 2700 гаруй хүн ажиллах тооцоо бий.

- IV цахилгаан станцын  хүчин чадлыг 123 мегаваттаар нэмэгдүүлжээ. Энэ нь 1983 оноос нийслэлийнхний 80 хувийг цахилгаан дулаанаар хангаж ирсэн уг станцад хийгдэж буй томоохон өргөтгөл гэж хэлж болно.

- “Эрдэнэтийн дулааны цахилгаан станц”-ыг 35 МВт-аар өргөтгөх ажлыг эхлүүллээ. 55 сая ам.долларын өртөгтэй энэ төсөл хэрэгжсэнээр Эрдэнэт хот төдийгүй төвийн бүсийн эрчим хүчний системд эерэг нөлөө үзүүлнэ гэж Засгийн газар үзэж буй.

- Оюутолгой төслийн далд уурхайн санхүүжилтийн төлөвлөгөө батлагдлаа. 2013 оны наймдугаар сараас зогсонги байдалд орсон Оюутолгойн далд уурхайн бүтээн байгуулалт үргэлжилснээр зургаан тэрбум долларын хөрөнгө оруулалт хийгдэх юм.

- Яам, агентлаг, төрийн өмчит байгууллагуудын хот доторхи хэрэгцээнд том оврын автомашин хэрэглэхийг зогсоож, 100 км-т 16 литрээс ихгүй шатахуун зарцуулдаг автомашин ашиглах шийдвэр гаргав.

- Төрийн өмчийн төлөөлөгч буюу төлөөлөн удирдах зөвлөлд төрийн захиргааны албан хаагчийг цаашид томилохгүй. Ингэснээр төрийн өмчийн компани, аж ахуйн нэгжид давуу эрх олгох явдал үгүй болох гэнэ.

- Элэгний С вирустэй 128 мянга гаруй иргэддээ зориулж эмчилгээний 98-99 хувийн үр дүнтэй АНУ-ын ХАРВОНИ эмийг нийлүүлэхээр болов. АНУ-д курс эмчилгээний үнэ нь 94 мянган ам.доллар байгаа энэ эмийг нэн хөнгөлөлттэй нөхцөлөөр буюу 1200 ам.доллараар оруулж ирэх юм.

- АНУ-ын Мянганы сорилтын сангаас Монгол Улсад дахин төсөл хэрэгжүүлэхээр болов. МСС-аас өмнө нь манай улсад 285 сая ам.долларын төсөл амжилттай хэрэгжүүлсэн юм.

- Завхан, Говь-Алтай, Увс, Ховд, Баян-Өлгий аймгийг нийслэл хоттой хатуу хучилттай авто замаар холбох ажил концессийн барих-шилжүүлэх нөхцөлөөр амжилттай хэрэгжиж байна. 2015 онд 1000 гаруй километр хатуу хучилттай авто зам баригджээ.

- Өндөрхаан-Чойбалсан чиглэлийн 143 км зам энэ онд ашиглалтад орсноор баруун 5 аймгаас бусад аймгийн төвүүд нийслэл хоттой хатуу хучилттай авто замаар холбогдож дуусах юм байна.

- Чингис хаан нисэх буудал дотоод нөөц бололцоогоо ашиглан цагт 800 зорчигч хүлээж авдаг байсан танхимаа 1200 болгон өргөжүүлэн тохижууллаа. Мөн зорчигчид шинээр байгуулагдсан транзит танхимаар дамжин дараагийн онгоцонд суух боломжтой болжээ.

- Импортыг орлож, экпортыг нэмэгдүүлэх үйлдвэрлэлд 300 тэрбум төгрөгийн зээл олгожээ.

24tsag.mn