Бараг сарын өмнө байна уу даа, талийгаач С.Зоригийн эхнэр Булганыг баривчилсан мэдээ гарч, манай хуулийнхан ч барьж хорьсон гэдгээ баталсан. Гэхдээ юуны учир хорьж саатуулснаа хэлээгүй л дээ. Дараа нь яллагдагчаар татсан тухай сураг сонсогдсон юмдаг. “Хар тамхины хэргээр барьжээ” гэсэн нэг цуу үг явж байлаа. Ингээд л түүний сураг тасарч, хүн амьтан ч сонирохоо байсан юм.

Гэтэл 10-аад хоногийн өмнөөс талийгаач Ш.Отгонбилэгийн хүү, УИХ-ын гишүүн О.Содбилэг “Залуус аа...” гэж байгаад миний аавыг үг хэлэхээргүй болсон учраас С.Зоригийн амь насыг хөнөөсөн хэрэгт холбох гээд байна гэсэн битүү хатуу утгатай зүйлийг цахим ертөнцөөр цацаж эхэлсэн юм. Мөн дээр нь траншейнд амьдардаг бололтой гурван ч хүүхдийн зургийг тавьсан байв. Түүний бичсэн зүйл, зураг хоёр хоорондоо ямар утгаар холбогдож байгаа үнэндээ ойлгохын аргагүй юм байв даа.

“За эд нар нам дарахаар шийдчихэж. Уг нь илрүүлэх нь илрүүлчихсэн байна. Сонгуулийн дараа зарлана гэж ч гонжийн жоо. Тэр үед аль нам нь төр бариа билээ” гэх яриа улам баяжин хээрийн түймэр шиг тархаж байгааг юу гэлтэй билээ.

Гэтэл хэдхэн хоногийн өмнө “Ноцтой мэдээ” сонин Совдоо гэдэг хүний бичсэн гэх нэгэн материалыг нийтэд дэлгэжээ. Цахим ертөнцөөр ч түгэж байв. Бичлэг нь ингэхэд тун логик дараалалтай, эмх цэгцтэйгээс гадна ихээхэн мэдээлэлтэй хүн үүнийг бичжээ гэдэг нь шууд ойлгогдож байлаа. Түүнээс биш хэн нэгэн солиотыг ийм зохиол бич гэсэн ч чадахгүй л дээ. Мөн сонин хэвлэл ч ийм сэдвээр дурын галзуугийн бичээд ирсэн юмыг тавихгүй нь тодорхой. Ялангуяа С.Зоригийн амь насыг хөнөсөн хэргийн талаар бүүр ч шонгүй. Ямар лалын амиа золиослогч биш, иймэрхүү юм бичиж нийтлэх нь галаар наадахтай адил гэдгийг галзуу хүн ч мэдэх байлгүй дээ.

Гэвч хууль хяналтынхны зүгээс үүнд ямар нэг реакц огт үзүүлсэнгүй гэхэд болохоор байсан нь иргэдийн дунд, ялангуяа сэтгүүлчдийн хувьд ихээхэн эргэлзээ төрүүлж эхэлсэн байна. Гэтэл харин хамгийн түрүүнд хотын дарга Э.Бат-Үүлийн өмгөөлөгч гэх хоёр залуу хэвлэлийн хурал зарлаад, сонин үүнийгээ нотлох ёстой гэсэн тун сонин, бас даанч жул гэмээр мэдэгдэл хийж байх юм. Уг нь саяхан л манай хотын дарга, Н.Ганбаяр гэдэг төлөөлөгч намайг онц хүнд гэмт хэрэгт гүтгэлээ гээд байн байн зурагтаар гараад, нийтийн өмнө уучлал гуй гээд нүүрээ улайлган хилэгнээд байгаагүй бил үү. Түүний дэргэд энэ бол ёстой жинхэнэ онцоос онц, ноцтойгоос ноцтой маш хүнд гэмт хэрэгт холбогдуулсан байна билээ. Гэтэл хэвлэл мэдээллийн хэрэгслүүд, үүнийг тараасан сайт майт хариуцлага хүлээнэ ч гэх шиг юм түүний төлөөлөгчид нь зурагтаар яриад, ээрч муурч суух юм.

Тэнд бичсэн зүйлд манай томчуулын нэр бараг тэр аяараа орсон байна билээ. Ямар ч байсан иргэдийн дунд ажиглаад байхад, “Ээ юу болчих воо, яав ийв” гэсэн эргэлзээ, болгоомжлол төрсөн байна. Мөн эд нар дуугүй байх тусам таамаг яриа улам цаашаа давс хужиртай болон дэлгэрэн түгэх талтай байна. Гар утсан дээрээ татчихсан зүйлийг бие биедээ автобусан дотор уншиж өгөөд л явж байна шүү дээ. Дараа нь монголчуудын зан яах вэ дээ, бөөн маргаан мэтгэлцээн, таамаг.

Гэтэл эрх баригчид, хууль хяналтынхны зүгээс ийм ноцтой зүйл нийтлэгджээ, ингэлээ тэглээ гэхийн оронд таг чиг байгаа нь, “За эд нар нам дарахаар шийдчихэж. Уг нь илрүүлэх нь илрүүлчихсэн байна. Сонгуулийн дараа зарлана гэж ч гонжийн жоо. Тэр үед аль нам нь төр бариа билээ” гэх яриа улам баяжин хээрийн түймэр шиг тархаж байгааг юу гэлтэй билээ. Уг нь эсвэл гэмт хэрэгтнүүд, үгүй бол үүнийг зохиосон, түүнийг нь нийтэлсэн сонин хоёрын нэг онц ноцтой хүнд гэмт хэрэгт төрийнхөө тэргүүнүүдээс авахуулаад төрийн өндөр дээд албан тушаал хашиж явсан хүмүүс болон хотын дарга Э.Бат-Үүл нарыг гүтгэсэн хэрэгтээ нэг хэсэгтээ л нар үзэхээргүй газар хатуу ял авах нь дамжиггүй боллоо гэдгийг зарламаар юм.

Д.Гал