“Миний нүд яах вэ, төрийн хараа л муудчихвий дээ” хэмээн Богд хаан айлддаг нэг кино байдаг шүү дээ. Тэгвэл өнөөдөр эсрэгээрээ, “Миний л хараа сайн байвал төрийн хараа ямар байх нь хэнд хамаатай юм” гэсэн зарчим дээдэст үйлчилж байгааг нуугаад яахав. Түүнээсээ ч манай төрийн төлөөлөл болсон эрхэм дээдэс ичиж эмээхээ бүрэн больж байх шиг. Тиймээс эд нар эрхэм дээдэс энэ тэр гэж хэлүүлэх, дуудуулах тун дуртай болсон байна. Уг нь 20 гаруйхан жилийн өмнө тэс өөр юм ярьж байсан нөхдүүд шүү дээ.

Ингэхэд төр аливаа зүйлийг тун нухацтай харах ёстой гэсэн үүднээс түүнийг түмэн нүдтэй гэжээ. Түүнээс биш бурхан шиг түмэн нүдтэй гэсэн утгаар нь хэлээгүй гэдгийг эрхбиш элдэв ном сонин үзсэн гээд байдаг эрхмүүд мэдэх байлгүй дээ. Харамсалтай нь манай одоогийн төр юун түмэн нүдээр харах. Зарим нэг зүйлийг ганц нүдээрээ хялайгаад ч болов харахгүй байна. Зарим нэгийг нь ганц нүдээр хараад л гүйцээ. Тиймээс манай Монголд гайхмаар , ангаймаар юмнууд Шүүхийн хаалга, дээдсийн ордноос  цувсаар л.

Л.Гансүхийн нүүрсний гэх хэрэг Таван толгой, Оюутолгой гэх мэтийг тойрсон луйврууд гэгдээд байгаагийн дэргэд ёстой юу юм бэ. Наад зах нь хохирогчгүй хэрэг гэж ойлгосон шүү. Тэгэхээр хохирогчгүй хэрэг захиалагчтай байж таарна. Мөн захиалагч нь маш том “гар” байж таарна биз. Тэр хэн бэ?

“Шуудай” нүүрсний хэргээр сайд асан Л.Гансүхийг мөн ч тарчлааж байна даа, энэ эрхмүүд. Давхар ээж аав, эхнэр хүүхэд, ач зээг нь тамлаж байгаа шүү гэдгээ мэддэг болов уу, ер нь? Аавын нь амьдрал ч яахав дүүрч, алаг үрсийнх нь сэтгэлийг яая гэж боддог юм бол эд нар. Уг нь хүүхэд, хүүхэд бидний ирээдүй энэ тэр гээд л хөл алдан үглэж дуулаад байдаггүй бил үү?

Гэхдээ хүүхдийг нь бодоод шоронгоос гарга гээд байгаа юм биш шүү. Хараа нь муудсан төрийнхөн шууд агуулгаар нь тэгж бодож байхыг үгүйсгэх юм алга.

Сая л гэхэд давж заалдах шатны шүүхийн хурал нь ямар инээдэмтэй болоо вэ гэж. Онлайнаар оролцуулсан ч гэх шиг. Тэгвэл Л.Гансүхийг ерөөсөө онлайнаар гэрт нь хорьчих хэрэгтэй. Ядахдаа л хүүхэд шуухад нь сэтгэл амар шинэ жилээ тэмдэглэх байлгүй. Ер нь энэ шүүгч нар өмнөө зогсч байгаа хүмүүсийн ард бүхэл бүтэн амьдрал байгаа гэдгийг боддог болов уу. Үгүй байх аа. Улстөр л харагдаад байгаа мэт ажиглагддаг. Энэ нь нөгөө л төрийн хараа тун муудаж байгаагийн сонгодог жишээ л дээ. Гэхдээ гэрэл  гэгээ ажиглагдсан шүү. н.Мягмаржав гэж шүүгч тусгай санал гаргасан байна билээ. Энэ чинь л нэг юм хэлээд байгаа хэрэг. Дараачийн шатны нь шүүх эрхбиш харгалзаж үзэх байлгүй дээ.

Ингэхэд олон жилийн өмнө Украйнд болсон нэгэн хэргийг бяцхан жишээ болгон  хэлье. Ахмад дайчин өвөө час улаан сарнай цэцэг тарьдаг. Түүнээсээ нэг ширхэгийг 40 жил ханилсан эмгэнийхээ шарил дээр аваачиж тавина. Фронтод сувилагч байсан юм билээ л дээ. Тэгээд танилцаад суужээ. Гэтэл баахан рок залуус шөнө хашааг нь давж орон нөгөө цэцэгнээс нь бөөн бөөнөөр нь тасдаж аваад болдоггүй гэнэ. Өвгөн олон удаа битгий тэгээч, би эхнэрийнхээ шарил дээр тавьдаг юм гэж гуйсан ч тоогоогүй байдаг. Ингээд нэг шөнө ахлаад байгаа нөхрийг нь нам буудаад алчихсан байдаг юм. Өвгөн ч олон хоног хоригдсон. Шүүх хурал ч болсон. Өвгөнийг шууд сулласан. ЗХУ даяараа эдгээр шүүгчид баяр хүргэж байсан юм даа. Шүүгч урдаа зогсч байгаа хүний арыг харна гэж энэ. Түүнээс биш манайхан шиг тээр дээр байгаа улстөрчдийн амыг харж, гарыг дага гэсэн үг хараахан биш л дээ.

Л.Гансүхийн нүүрсний гэх хэрэг Таван толгой, Оюутолгой гэх мэтийг тойрсон луйврууд гэгдээд байгаагийн дэргэд ёстой юу юм бэ. Нохойн жогорхой. Наад зах нь хохирогчгүй хэрэг гэж ойлгосон шүү. Тэгэхээр хохирогчгүй хэрэг захиалагчтай байж таарна. Ямар ч тэнэг ухаанаар бодсон логик утгаараа тийм. Мөн захиалагч нь маш том “гар” байж таарна биз. Тэр хэн бэ?