“Тусгаар тогтнол эв нэгдлийн нам”-ын нууц ноёнтон Ш.Сайхансамбуу гэв үү

Хэдхэн хоногийн өмнө “Тусгаар тогтнол эв нэгдлийн нам” хэмээх нам Ээлжит бус Их хурлаа хийж намын даргаар УИХ-ын гишүүн Г.Уянгыг томилсноо зарлалаа.  Эх оронч залуусын байгуулсан нам хэмээх тайлбартай тус намыг УИХ-ын гишүүн Х.Баттулгынх хэмээн тамгалаж байсан ч өчигдрөөс эхлэн цаад эзнийх нь тухай жиг жуг яриа саарал ордноор газар авлаа.

Уг нь тус намын санхүүжүүлэгч нь УИХ-ын гишүүн Х.Баттулга, тэрбээр Монгол тулгатны 100 эрхэмд орсон хөгшчүүлийг эгнээндээ нэгтгэж тэднээр сурталчилгаагаа хийлгэх гэж байна хэмээн ярьж байсан юм. Энэ нь ч үнэний ортой байх магадлалтай. Яагаад гэвэл “Тусгаар тогтнол, эв нэгдлийн нам”-ын тайзны ард Херо Баатар ажиллаж, УИХ-ын гишүүн Х.Баттулгын данстай С1 телевиз шууд дамжуулсан юм.

МАН-ын гишүүн Ш.Сайхансамбуу, АН-ын гишүүн Х.Баттулга, эрэн сурвалжлагдагч Ц.Баянбилэг, эрхэмсэг “поп” хатагтай Г.Уянга нар эв нэгдлийн намаар хэлхэлдэх нь жам ёсных гэх үү дээ.

Харин намаас нам дамжин жигүүрлэдэг “Поп” хатагтай Г.Уянгыг яагаад тус намын даргаар тавих болсон бэ гэдэг асуултын хариуг бүгдээрээ л олохыг хичээж байв.  Хаана эрх мэдэл, албан тушаалын боломж байна тэнд л  очих хүсэлтэй “Үйлчлэгч” гишүүдийн тухайд нэр цэвэр, шинэхэн, хөрөнгөлөг намын анхдагч болох мэдээж сайхан. Анхдагч гэдэг утгаараа жагсаалтын дээгүүр бичигдэнэ. Бас өрсөлдөгч улс төрийн хүчнүүдийг муулж, хийж байгааг нь, байж байгааг нь хар гэж “поп”-дох боломжоор дүүрэн. Бас сонгуулийн өмнөхөн намын дарга болно гэдэг өөрөө супер.

За энэ ч яахав. Гол асуудалдаа ороё.

Намаасаа гарч, бие даан нэр дэвшинэ хэмээж буй Х.Баттулгынх гэх шошготой, УИХ-ын гишүүн Г.Уянга даргатай энэ “Учир битүүлэг” намыг мэндэлснийх нь дараахан УИХ-ын гишүүн асан Ш.Сайхансамбуу “Нууц ноён”-тон нь болох хүсэлт тавьсан гэх мэдээлэл байна. Түүгээр ч барахгүй Ш.Сайхансамбууд тодорхой хэмээний оролцоо байж магадгүй хэмээх таамаглал хөвөрч байна. Завхан аймгийн ард түмний буянаар УИХ-ын гишүүн гэх эрхэм алдрыг хүртээд амжсан тэрбээр улстөрийн тоглолтыг өлхөөн хийчих санаатай эр л дээ. Гэхдээ энэ удаа Завхан аймагт дүүгээ “сойж” өөрөө хэрхэх нь тодорхой бус байгаа нь энэ намтай холбоотой байж магадгүй юм. Намынхаа эсрэг шүүмжлэлийн үгийг гамгүй шиддэг тэрбээр намаасаа туурга тусгаарлана гэдэг асуудал нь хурууны үзүүрээр хийчих ажил биз.

Харин тус намын Ерөнхий нарийн бичгийн дарга нь Ц.Баянбилэг хэмээх залуу байдгийг зарим хэвлэлүүд онцлож байна. Дарга нараасаа дутахгүй дуулинтай энэ эр бусдыг залилан мэхлэх гэмт хэрэгт холбогдож, байцаалт өгч байх хугацаандаа оргон зугатсан учраас эрэн сурвалжлагдаж байгаа гэх мэдээлэл байгаа юм. Өөрөөр хэлбэл тус намын нарийн бичгийн дарга нь нийгмээс нуугдан ажиллаж амьдарч байгаа бололтой.

Ийм л зартай эрчүүдийг эгнээндээ нэгтгэсэн “Тусгаар тогтнол эв нэгдлийн нам” нэр шигээ л тусгаар тогтнохыг хүссэн намдаа гомдогсод буюу АН, МАН-ын болон бусад гишүүдээс бүрэлдэж буй бололтой юм. Эрх мэдлийн төлөө тэмцэлд энэ байтугай нь эвлэлдэхээр зэхэж байхад МАН-ын гишүүн Ш.Сайхансамбуу, АН-ын гишүүн Х.Баттулга, эрэн сурвалжлагдагч Ц.Баянбилэг, эрхэмсэг “поп” хатагтай Г.Уянга нар эв нэгдлийн намаар хэлхэлдэх нь жам ёсных гэх үү дээ. Тэдний хувьд МАНАН л биш бол чөтгөртэй нийлсэн ч яахав байлгүй дээ.

24tsag.mn