Хатуу ширүүн үгээрээ хэнийг ч хамаагүй, хэнээс ч айхгүйгээр хайр найргүй шилбүүрддэг УИХ-ын гишүүн Ц.Нямдорж саяхан телевизийн ярилцлагад орохдоо тэнэг л биш бол монголчууд юм бодохоор зүйлийг санаа алдан, алдан байж ярилаа. Хамгийн гол нь бусад шигээ битүү далд утгаар бус шууд ойлгогдохоор илэн далангүй өгүүлэв.

Тэрбээр, “Монгол улс буруу замаар явж байна, буцахдаа шороо тээнэ” шүү л гэлээ. Мөн энэ “тэмээн жинг” хөтөлж яваа Ерөнхийлөгч Ц.Элбэгдорж хаана байгаа нь үл мэдэгдэх хөгжлийн тухай үг хөврүүлэнгээ мань мэтийгээ харанхуй хар нүх рүү чиглүүлж явааг баримт нотолгойтойгоор дэлгэв. Баярлалаа, Нямка! Хэдийгээр чамд дайсан олон, өөр дээрээ үргэлж гал дуудаж байдаг ч олон нийт шударга гэдгээр чинь үнэлдэг юм шүү. Мөн өнгөрсөн хугацаанд хугараагүй ноён нуруугаар чинь хүндэлдэг.

Ингэхэд хүчтэй хүн л шударга байдаг нь жам. Хулчгарууд хэзээд хүлцэнгүй байдаг. Хүчтэй хүн гэж сул дорой нэгнээ ялах, яллах бус тэднийгээ хүчтэй болгохын төлөө тэмцдэг хүнийг хэлдэг юм. Тиймээс мань мэтийн мангуунууддаа үнэн мөнийг ойлгуулах гэж мөн ч олон жил ярьж, хэлж байна даа, та. Даанч ухааныг минь булингартуулсан хуурамч улстөрчдийн гайгаар аливаа асуудлын учир начрыг ухаж ойлгохдоо бид мэт нь тун маруухан болжээ.

“Хүчтэй хүний зориг зүрхэнд бидний дотор суучихаад байгаа үүл мананг арилган нар тусгах хүсэл эрмэлзлэл мөнхөд оршдог” гэсэн нэг үг бий. Тэрбээр энэ удаа үүнийг хэнд ч ойлгогдохоор хийв. Хэллээ. Хамаг муу муухай бүхний тархин дээр МУ-ын Ерөнхийлөгч Ц.Элбэгдорж, МАН-ын дарга М.Энхболд хоёр суучихаад УИХ, Засгийн газрыг атган юу дуртай ерэн есөн хүслээ гүйцэлдүүлж байгааг баримт нотолгоотойгоор туулаа шүү дээ.

МАН-ын дарга М.Энхболд, нэгэнтээ АН-ын дарга байсан, эдүгээ АН-ын далд дарга, МУ-ын Ерөнхийлөгч Ц.Элбэгдорж хоёр яг кока, пепси хоёртой адилхан.

Энэ бүхнийг бид мэдэрдэг байсан. Бас мэддэг. Гэсэн хэдий ч дуугарч чаддаггүй байлаа. Хэлэх гэхээр л АТГ, цагдаа, шүүх нүдэнд харагдаад, ард авгай хүүхдүүдийн уйлаан гаслаан сонсогдоод байдаг учир дуугарч чаддаггүй байсан. Дуугарсан нэг нь дуугүйхэн л ямар нэг шалтгаанаар “аавын“ хаалгыг татдаг байлаа шүү дээ.

Нээлттэй нийгэмд ороод бидэнд өрчлөгдсөн юм олон бий. Идэж уух юмны төрөл хүртэл олширсон шүү дээ. Тухайлбал, ундаа л гэхэд Кока кола, Пепси кола хүүхэд бидний хүсэл мөрөөдөл байв.

Ингэхэд Кока кола, Пепси кола хоёр үнэн хэрэгтээ өөр, өөр бус ав адилхан амт үнэр, орц хийцтэй. Үйлдвэрлэдэг эзэн нь нэг л хүн байдаг. Тэгээд хоёр өөр нэр өгөөд хоорондоо өрсөлдөж байгаа мэт дүр үзүүлэн, энэ дэлхийн зах зээлийг эзлээд авсан гайхалтай луйварчид л даа.

МАН-ын дарга М.Энхболд, нэгэнтээ АН-ын дарга байсан, эдүгээ АН-ын далд дарга, МУ-ын Ерөнхийлөгч Ц.Элбэгдорж хоёр яг кока, пепси хоёртой адилхан. Эсрэг тэсрэг нам байгаа мэт дүр эсгэвч алсын зорилго, авч идэхийн дон нэгтэй. Тэр хоёр ЭМХМ буюу “Эрх мэдэл, хөрөнгө мөнгө” гэсэн ганцхан намд харъяалагддаг. Энэ тухай л эрхэм гишүүн Ц.Нямдорж эргүүлж тойруулан булзааруулалгүй анх удаа ухаантай нь ухаарч, ухаангүй нь ойлгохоор дуулгалаа. Ингэхэд, “Ард түмэн өөрийнхөө хүчинд итгэсэн цагт л хүсэл мөрөөдөлдөө хүрдэг” хэмээн Андреас Фейербах нэгэнтээ хэлсэн байдаг юм. Наадуул чинь манай ард түмэн ухаантай гэсэн үгээр эвтэйхэн дарсаар байгаад манийгаа өдгөө мал, нохой мэт болгожээ. Харин одоо яах ёстой гэж.

Б.Дарь