Сүхбаатар дүүргийн нэгдүгээр хороонд байрлах Зам, тээврийн яамны гадна өчигдөр хүн амины хэрэг гарсан. Цагдаагийн ерөнхий газрын мэдээлснээр өчигдөр 21.45 цагийн үед 102 дугаарын утсанд уг мэдээлэл иржээ. Үүний дагуу Сүхбаатар дүүргийн Цагдаагийн нэгдүгээр хэлтсийн жижүүр бүрэлдэхүүн үзлэг шалгалт хийж байгаа юм. Урьдчилсан байдлаар тус яамны Хяналт-шинжилгээ, үнэлгээ, дотоод аудитын газрын дарга Г-ийн амь насанд мөн л тус яамны Төрийн захиргаа, удирдлагын газрын дарга Б.Махбал халдсан байж магадгүй гэж үзээд шалгалтын ажиллагааг үргэлжлүүлж байна. Сэжигтэнд Эрүүгийн хуулийн тусгай ангийн 10.1-т зааснаар хэрэг үүсгэн шалгаж байгаа юм. Эрүүгийн хуулийн 10.1 нь Хүний амьд явах эрхийн эсрэг гэмт хэрэг бөгөөд энэ зүйл анги нь 8-15 жилийн хорих ялаар шийтгэдэг аж.

Тэгвэл сэжигтнээр татагдаад байгаа Б.Махбал гэж хэн бэ?

Сэжигтэн Б.Махбал Ж.Бат-Эрдэнэ сайдын ойрын хүн бөгөөд Зам, тээврийн хөгжлийн яамны Төрийн захиргаа удирдлагын газрын даргаар томилогдоод нэг жил ч болоогүй байгаа юм. Тодруулбал, Ж.Эрдэнэбатын Засгийн газрын үед Уул уурхайн яамны Төрийн захиргаа удирдлагын газрын даргаар ажиллаж байсан түүнийг Ж.Бат-Эрдэнэ сайд томилогдоод Зам, тээврийн хөгжлийн яам руу татжээ. Ж.Бат-Эрдэнэ сайд Б.Махбал хоёр олон жил хамт ажилласан дотнын нөхөд юм байна. Б.Махбал өмнө нь Зам, тээвэр аялал жуулчлалын яаманд Төрийн захиргааны удирдлагын газрын орлогч даргаар ажиллаж байв. Тухайн үед салбарын сайд нь Р.Рааш байжээ. Дараа нь Зам, тээвэр барилга хот байгуулалтын яам болж өөрчлөгдөхөд сайдаар Төрийн захиргаа, удирдлагын газрын даргын албыг хашиж байв. Тэр үед тус яамны сайдаар одоогийн Ерөнхийлөгч Х.Баттулга, Төрийн нарийн бичгийн даргаар одоогийн сайд Ж.Бат-Эрдэнэ  ажиллаж байжээ.

Л.Сайнбаяр