Нийслэлийн мэргэжлийн хяналтын газраас 2018-2019 оны хичээлийн шинэ жил эхэлж буйтай холбогдуулан урьдчилан сэргийлэх хяналт шалгалт хийж 415 зөрчил илрүүлсэн талаар өнөөдөр мэдээллээ.
Шалгалтад нийслэлд үйл ажиллагаа явуулж байгаа 265 байгууллагыг хамруулахаар төлөвлөсөн бөгөөд одоогоор хяналтын явц 70 хувьтай байгаа аж. Шалгалтын явцад 415 зөрчил илрүүлж, тухайн зөрчлийг үндэслээд 135 байгууллагад хугацаатай үүрэг даалгавар өгч, хэрэгжилтэд хяналт тавьжээ.
Энэ талаар Нийслэлийн мэргэжлийн хяналтын газрын эрүүл мэнд, боловсрол, соёл хяналтын хэлтсийн дарга Д.Цэнд-Аюуш “Зөрчлийн тухай хуулийн дагуу нийтдээ 14 хуулийн этгээдэд хоёр сая 400 мянган төгрөгийн шийтгэл ноогдууллаа. Энд анхаарах гол зөрчлүүдээс дурдъя,
Сургалтын ажил эрхлэлтийн нэгдсэн шаардлага хангахгүй байгаа нийт 20 сургууль байна. Үүнд 84, 26, 146, 220, 152 дугаар сургууль, цэцэрлэг байна. Мөн сургуулийн орчны эрүүл ахуйн шаардлага хангахгүй 18 цэцэрлэг, сургууль байна. Тухайлбал, налайх дүүргийн 152 дугаар цэцэрлэг, Голомт цогцолбор сургууль, Баянгол дүүргийн 120 дугаар цэцэрлэг гэх мэтчилэн төрийн болон хувийн сургууль цэцэрлэг байна.
2018 оны есдүгээр сарын нэгнээс хичээл эхлэх боломжгүй хэд хэдэн сургууль, цэцэрлэг байна. Энд урсгал засвар мөн холбогдох бусад засвар хийгдээгүй Багануур дүүргийн 138 дугаар цэцэрлэг, Сүхбаатар дүүргийн 54 дүгээр цэцэрлэг, Хан-Уул дүүргийн 121, 41, Баянгол дүүргийн 45 дугаар сургууль, 164 дүгээр цэцэрлэг, Баянзүрх дүүргийн 126, 53, 146 дугаар цэцэрлэг, Чингэлтэй дүүргийн 102,19 дүгээр цэцэрлэгийн өргөтгөлүүд мөн сая энэ сард улсын комисст авсан 18 дугаар цэцэрлэг шаардлага хангахгүй цэцэрлэг байна.
Мөн хөгжлийн бэрхшээлтэй хүүхэд сургах нөхцөл боломж бүрэн хангагдаагүй, хяналтын камергүй, автомашины зогсоолгүй, сургууль, цэцэрлэгээ хашаажуулаагүй, галын аюулгүй байдлыг хангаагүй, зориулалтын бус байртай 138 дугаар цэцэрлэг, Гурван хөгжил, Зайсан, Бумбардай найзууд, Мөндөө, Даргиатын жаалууд, Мандах наран, Ачлал, Далай багачууд, Одон эрдэнэ, Мянганбаяр зэрэг цэцэрлэг байна.
Үүнээс гадна багшлах бүрэлдэхүүний талаар хангагдаагүй багшлах боловсон хүчин хангагдаагүй цэцэрлэг байна. Төрөлжсөн болон бэлтгэл ажил хангагдаагүй хэд хэдэн хувийн сургууль, цэцэрлэг байна. Тухайлбал, Гэрэлт ирээдүй, Олонлог лицей, Номч нахиа зэрэг сургуулиуд байна” гэлээ.
Энэ удаагийн шалгалтад төрийн болон хувийн хувийн сургууль, цэцэрлэгүүдийг хамруулжээ. Урьдчилан сэргийлэх хяналт шалгалт хоёр үе шаттай хийгдэж байгаа юм байна. Эхнийх нь наймдугаар сарын 15-27 хооронд явагдсан бол хоёр дахь шалгалт ёсдүгээр сард хийгдэх юм. Есдүгээр сарын шалгалтаар ном сурах бичиг, сурагчийн дүрэмт хувцас, үдийн цайнд хяналт хийх аж.
Р.Хишигжаргал
