ХӨХӨӨГИЙН БАЛСАНДОРЖ

/1962-2025/

Монгол Улсын Их Хурлын гишүүн асан, төр, нийгэм, эдийн засгийн салбарын нэрт зүтгэлтэн Хөхөөгийн Балсандорж 2025 оны тавдугаар сарын 09-ний өдөр хүнд өвчний улмаас таалал төгссөнд гэр бүл, төрөл төрөгсөд, хамтран зүтгэгсдэд нь гүн эмгэнэл илэрхийлье.

Х.Балсандорж 1962 онд Увс аймгийн Өмнөговь суманд төрж, 1980 онд Улаангом хотын 2 дугаар дунд сургууль дүүргэжээ. 1986 онд хуучнаар ЗХУ-ын Екатеринбург хотын Уул уурхайн дээд сургуулийг Уулын цахилгаанжуулалт, автоматжуулалтын инженер, 1994 онд Удирдлагын академийг бизнесийн удирдлага мэргэжлээр төгсөж, 1986-2000 онд “Багануур” ХК-д цахилгааны слесарь, шугамын мастераас ерөнхий инженер, гүйцэтгэх захирал, 2009-2013 онд “Шивээ-Овоо” ХК-ийн Гүйцэтгэх захирлаар ажиллаж байлаа.

Тэрбээр 2000-2004 онд Багануур, Налайх дүүргээс Монгол Улсын Их Хурлын гишүүнээр сонгогдож, парламентын ардчиллыг бэхжүүлэх, хууль тогтоох үйл ажиллагаанд үнэтэй хувь нэмэр оруулсан юм. Улсын Их Хурлын гишүүнээр ажиллах хугацаандаа тэрбээр эдийн засаг, төсөв, мөнгөний болон аж үйлдвэрийн бодлого, хууль эрх зүйн орчныг боловсронгуй болгох чиглэлээр түлхүү ажиллаж, үүний дотор эрчим хүч, нүүрсний салбар, уул уурхайн олборлох салбарын харилцаа, зах зээлийн төлөвшилд чухал хувь нэмэр оруулсан юм. Хууль санаачлах бүрэн эрхийнхээ хүрээнд тэрбээр хуулийн 3 төсөл санаачлан боловсруулж, 6 хуулийн төслийн ажлын хэсгийн ахлагчаар, 22 хуулийн төслийн ажлын хэсгийн гишүүнээр ажилласны дотор 2001 онд батлагдсан Эрчим хүчний тухай хуулийн төслийн ажлын хэсгийг ахалж, тус салбарыг зах зээлийн эдийн засгийн харилцаанд шилжүүлэх, аж ахуйн нэгжүүдийг бие даасан зарчмаар ажиллах эрх зүйн орчныг бүрдүүлэхэд үнэтэй хувь нэмэр оруулсан юм.

Эрх зүйт нийгмийн үндсийг бэхжүүлж, ардчилал, зах зээлийн эдийн засгийн харилцааны эрх зүйн шинэ орчныг бүрдүүлэх, төрийн байгуулал, засаглалыг шинэчлэн төлөвшүүлэхэд тэрбээр үнэтэй хувь нэмэр оруулсан юм.

Түүний хөдөлмөр зүтгэлийг үнэлж 1994 онд “Тэргүүний уурхайчин” цол тэмдгээр, 1998 онд “Алтан гадас” одонгоор, 2004 онд Монголын үндэсний олимпын хорооны “Алтан очир” одонгоор тус тус шагнажээ. Х.Балсандоржийн нягт нямбай, шулуун шударга, хүнлэг энэрэнгүй, хөдөлмөрч зан чанар, шинжлэх ухаанч, зарчимч байр суурь Монгол Улсын парламентат ёс, ардчилсан тогтолцооны түүхэнд үүрд үлдэх болно.

МОНГОЛ УЛСЫН ИХ ХУРЛЫН ТАМГЫН ГАЗАР