Эрчим хүчний сайд Ц.Даваасүрэн “чимээгүй” байна. Тэрбээр өөрөө чимээгүй байгаагийн зэрэгцээ салбарынхандаа чимээгүй байхыг үүрэгддэг болж. Аль ч нам Засгийн эрхийг барихад Ц.Даваасүрэнгийн ашигтай байрлалыг эзэлж, санасандаа хүрч сарвайснаа авахаас нааш “мөнхийн шүүмжлэгч” байдгийг УИХ-ын гишүүн болсноос нь хойшхи он жилүүд гэрчилнэ. МАН-ыг цөөнх байхад МАХН-д хоргодож байгаад ирсэн тэрбээр “албан ёсны шантааж” гэгчийг хийж байгаад МАН-д эргэн ирээд зогсохгүй өмнөх Засгийн газрыг нь “унагаалцсан”-ыхаа шанд Эрчим хүчний сайдаар ажиллаж байна.
Тэр бол хуучин ч хүн, хуучинсаг ч хүн гэх имижтэй. Тиймээс сэргээгдэх эрчим хүч, нарны болон салхин цахилгаан станцын хөгжил дэвшилд түүнээс сайн сайхан шинэ шийдэл бараг л гарахгүй нь хэдийнэ харагдаж эхэлсэн. Харин мэддэгээрээ, хуучнаар нь Дулааны цахилгаан станцаа “лалагнуулахаар” эрчтэй ажиллаж буй. Энэ нь хүлэмжийн хийн ялгарал, утааны зовлонг нэмэхэд “гүн туслалцаа” үзүүлж байгаа хэрэг юм. Уг нь тэр ядаж л улстөрчийн хувьд манай улсын 1993 онд анх нэгдсэн Киотогийн протокол нь 2020 он хүртэл сунгагдсаны мэдэж баймаар. Үгүйдээ л гэхэд , Монгол Улс Парисын хэлэлцээрийг соёрхон баталсан анхдагч орнуудын нэг бөгөөд ноднин өдийд ХБНГУ-д болсон НҮБ-ын Уур амьсгалын өөрчлөлтийн суурь конвенцийн ээлжит хурлуудын үеэр Монгол Улс Талуудын 23 дугаар бага хурал, КИОТО-гийн протоколын талуудын 13 дугаар бага хурал, Парисын хэлэлцээрийн талуудын 1-2 хурал, Парисын хэлэлцээрийн онц ажлын бүлгийн 1-4 хурлууд болон туслах байгууллагуудын гаргасан шийдвэрүүдийг бүрэн дэмжиж байгаагаа мэдэгдсэнийг сонссон байх учиртай. Тийм бол 2020 оноос хэрэгжиж эхлэх Парисын хэлэлцээрийг хэрэгжүүлэх, үүний өмнө ямар ажил хийсэн байх ёстойгоо мэдэж байж сайд болсон байж таарна. Гэвч төрийн өмчит ДЦС-уудын даргыг, төсвийг өөрөө мэддэг болохын төлөө улайран хөөцөлдсөөр өнөөдрийг хүрэв.
Мөн түүнийг Эрчим хүчний сайдаар ажиллах “түүхэн үед” Монголын нийслэл анх удаа таг харанхуй өнжсөн. Хэрэв өөр нэгэн сайдын үед ийм явдал гарсан бол Ц.Даваасүрэн гишүүн дуугүй өнгөрөхгүй л байсан байх. Дуртай дургүй хүлцэл өчсөнөөс цаашгүй түүний хариуцлагын асуудлыг өнөөдөр хэн ч ярихгүй, эцэстээ жирийн инженер рүү чихэх эсвэл шувуунд бурууг тохсон хошин шог төдийхнөөр өнгөрсөн.
Сонирхолтой нь “ДЦС -4” ТӨХК-д том осол гарч тэг зогсолт хийснээс хойш ердөө хоёр хоногийн дараа ДЦС-1, ДЦС-3-т мөн тэг зогсолт хийснийг тас нуугаад өнгөрсөн байдаг.
Хамгийн сүүлд л гэхэд хорь гаруй хоногийн өмнө Тэлмэний цахилгаан станцад 20 гаруйхан настай залуу цахилгааны хүчдэлд цохиулж амь насаа алдсан харамсалтай хэрэг гарсан боловч мөн л нууж дараад өнгөрүүлснийг салбарынх нь эх сурвалж хэлсэн бөгөөд цаашид ажиллах боломжгүй болох тул нэрээ нууцлахыг хүссэн юм.
Багануурын ДЦС-ын төсөл одоогоор мөн л гацаад байгаагийн шалтгаан нь салбарын сайдтай холбоогүй гэх аргагүй. Түүнчлэн Оюутолгойг эрчим хүчээр хангах асуудал дээр “мөнхийн эсэргүүцэгч” байх хувийн үзэл бодлоо дарж ажиллаж чадах эсэх нь эргэлзээтэй.
Хамгийн сүүлд л гэхэд Төрийн ордонд ТӨБЗГ-ын даргатай улайм цайм хэрэлдэж, төрийн өмчит дулааны станцуудын удирдлагыг сайдын мэдэлд байлгах эсэх талаар хуулиас давсан хүсэл мөрөөдлөө биелүүлэхээр хэрхэн улайрч байгаа бичлэгийг нийтээрээ харсан билээ. Ийм л эрх ашгаа нуудаггүй, алдаа дутагдлаа нуудаг Эрчим хүчний сайдтайгаар энэ өвлийг хэдэн удаа тэг зогсож давахыг таашгүй. Яаман дотор нь түүнийг сөрвөл ажилгүй болно гэсэн айдас илт байна. Тэгэхээр цаашид ч “Даваасүрэнгийн нууц”-ууд үргэлжилсээр байх бололтой.
О.Балдан-Очир
Сэтгэгдэл (26)