Зуны сүүлийн сарын амралтын өдрүүдийг хөгжим, урлаг, үндэсний соёлтой өнгөрүүлэх боломжтой хэд хэдэн томоохон арга хэмжээ наймдугаар сарын 8–9-нд зохион байгуулагдана. 

THE HU – “WOLF TOTEM” World Premiere

Дэлхийд алдаршсан уг хамтлагийн 10 жилийн ойн тоглолт

Хэзээ: 2026 оны 8-р сарын 8
Хаана: Төв цэнгэлдэх хүрээлэн
Эхлэх цаг: 19:00

Монголын Hunnu Rock урсгалыг дэлхийд таниулсан THE HU хамтлаг байгуулагдсаны 10 жилийн ойдоо зориулан “WOLF TOTEM” нэртэй томоохон тоглолтоо хийх гэж байна. Энэ удаагийн шоу нь зөвхөн хөгжмийн тоглолт бус, хамтлагийн өнгөрсөн 10 жилийн уран бүтээлийн замнал, дэлхийн аялан тоглолтууд, Монгол өв соёлыг орчин үеийн рок хөгжимтэй хослуулсан томоохон тайзны бүтээл байх юм. Тоглолтын нэр нь THE HU-г дэлхийд таниулсан “Wolf Totem” дуугаас санаа авсан бөгөөд үзэгчдэд хүч, омог, хийморийг мэдрүүлэх концепцтой.

“ШИЛИЙН БОГД” фестиваль

Байгаль, аялал, хөгжим хосолсон зуны том эвент

Хэзээ: 2026 оны 8-р сарын 8–9
Хаана: Сүхбаатар аймаг, Баруун-Урт сум

Монголын тал нутгийн онцлог, аялал жуулчлал, хөгжим, залуусын соёлыг нэг дор багтаасан “Шилийн Богд” фестиваль хоёр өдөр үргэлжилнэ. Энэ фестиваль нь хотын дуу чимээнээс холдож, байгальд амарч, найз нөхөдтэйгөө аяллын уур амьсгал мэдрэхийг хүссэн хүмүүст зориулсан арга хэмжээ болж байна.

“Land of the Sky” үндэсний урлагийн цогц тоглолт

Хэзээ: 8-р сарын 8, 9
Хаана: Үндэсний Урлагийн Их Театр

Монголын уламжлалт хөгжим, бүжиг, үндэсний өв соёлыг харуулсан энэхүү тоглолт наймдугаар сарын турш үргэлжлэх хөтөлбөрийн хүрээнд энэ амралтын өдрүүдэд мөн болно.

“Монголын гайхамшигт урлаг” тоглолт

Хэзээ: 8-р сарын 8, 9
Хаана: Монголын Хүүхдийн Ордон

Гадаад, дотоодын жуулчдад зориулсан монгол үндэсний урлагийн үзүүлбэрүүдийг багтаасан тоглолт юм.

Л.Баяр