УИХ дахь МАН-ын бүлгийн өнөөдрийн ээлжит хуралдаанаараа 2019 оны төсвийн төслийг хэлэлцжээ. Үүнтэй холбогдуулан тус бүлгийн дарга Д.Хаянхярваа мэдээлэл хийлээ.
Тэрээр "Төсвийн асуудал дээр гишүүд ойлголцлын төвшинд хүрсэн гэж хэлж болно. "УИХ-ын гишүүн бүрт таван тэрбум төгрөг өгч байгаа гэнэ" гэсэн яриа олны анхаарлыг татаж байх шиг байна. Энэ мөнгө бол УИХ-ын гишүүний мөнгө биш. Бид 76 жижиг тойрогтой. Тухайн тойргуудаас сонгогдсон гишүүдийн тавьсан хөрөнгө оруулалтын саналуудыг шийдвэрлэх зорилгоор тойрог бүрт ойролцоогоор таван тэрбум төгрөгийн хөрөнгө оруулалтын зардлыг тусгаж байгаа. Энэ мөнгийг орон нутгийн засаг захиргааны нэгжийн удирдлагуудтайгаа ярилцаад ямар зүйлд зарцуулахаа шийдвэрлэдэг. Түүнээс биш гишүүн нь очоод "Энэ мөнгөө би авна. Ямар зүйлд зарцуулахыг нь би мэднэ" гэдэг юм биш. УИХ-ын гишүүд зөвхөн тэр мөнгөөр хийж байгаа ажлын гүйцэтгэлд хяналт тавих ёстой" гэв.
УИХ дахь МАН-ын бүлгийн дарга Д.Хаянхярваа дээрх мэдээллийг хийснийхээ дараа сэтгүүлчдийн сонирхсон асуултад хариуллаа.
-Сангийн сайд Увс аймагтаа 52 тэрбум төгрөгийн хөрөнгө оруулалт хийхээр тусгасан гэсэн мэдээлэл бий. Энэ хэр зэрэг бодитой мэдээлэл вэ?
-Төсвийн ажлын хэсгээс судалгаа гаргасан хүмүүс ийм зүйл ярьж байгаа. Гурван өөр эх үүсвэрээс тодорхой хэмжээний хөрөнгө оруулалт тавигдсан юм билээ. Энэ бол намын мөрийн хөтөлбөрт тусгагдсан бүс нутгуудад хийх ажлууд багтаж байгаа. Дээрээс төсвийн ерөнхийлөн захирагч нарын саналаар зарим төслүүд орж байгаа. Ажлын хэсэг энэ асуудлыг илүү нарийвчлан судлаад Төсвийн тухай хуулийн шаардлагад нийцэж байгаа эсэхийг нь хянана.
-Жижиг, дунд үйлдвэрлэлийг дэмжихэд зориулж төсөв суулгаагүй байна гэсэн шүүмжлэл их гарч байгаа. Энэ асуудлаар танай бүлэг ямар байр суурьтай байгаа вэ?
-Жижиг, дунд үйлдвэрлэлд зориулж энэ онд 65 тэрбум төгрөг төсөвлөсөн. Харин ирэх онд төсөвгүй байна гэсэн шүүмжлэл гишүүдээс гарч байгаа. Тиймээс шаардлагагүй зардлуудыг хасч танаж байгаад жижиг, дунд үйлдвэрлэлд зориулж 50-100 тэрбум төгрөг суулгах нь зүйтэй гэж үзсэн гэдгийг ажлын хэсгээс мэдээлсэн.
-Агаарын бохирдлыг бууруулах зорилгоор айлуудын янданд агаар шүүгч тавихад 54 тэрбум төгрөг зарцуулна гэсэн. 10 мянган төгрөгийн үнэтэй янданд 500 мянган төгрөгийн үнэтэй шүүлтүүр тавих нь хэр зөв алхам бэ. Үүнээс өөр агаарын бохирдлыг бууруулах арга олдохгүй байгаа юм уу?
-Гишүүд үүнд шүүмжлэлтэй хандаж байгаа. Би ч ялгаагүй. Бид агаарын бохирдлыг бууруулах зорилгоор олон ажил хийсэн ч тодорхой үр дүн гарахгүй байгаа. Энэ шүүлтүүрийн тухайд Засгийн газрын төвшинд туршилт хийж үзсэн төсвийг нь суулгаж байна гэж харсан. Гэхдээ үүнийг сайн нягтлах ёстой. Нийлүүлж байгаа аж ахуйн нэгжүүдээр нь баталгаа гаргуулахаас эхлээд нягтлах зүйл их. Ингэхгүй бол сүржин эхлэл, даржин төгсгөл болохыг үгүйсгэхгүй.
Сэтгэгдэл (2)