Дархан-Уул аймгийн түүх соёлын асуудлуудаар судалгааны сүүлийн үеийн ололт амжилт, үр дүнгийн талаар хэлэлцэж Дархан хотын хөгжил дэвшлийн 57 жилийн ойд зориулсан эрдэм шинжилгээний хурал өнөөдөр Дархан-Уул аймгийн ЗДТГ-ын хурлын танхимд эхэллээ.
Эрдэм шинжилгээний хурлаар Дархан хотын үүх түүхийг харуулсан 12 илтгэл тавигдаж байна. Түүхээс үзвэл, 1960 оны хоёр дугаар сарын 11-нд Ю.Цэдэнбалын Москва хотноо ажлын айлчлал хийж аж үйлдвэрийн ба бусад обьектуудыг байгуулах явдалд Бүгд Найрамдах Монгол Ард Улсын Эдийн засаг ба техникийн туслалцаа үзүүлэх тухай хоёр улсын хоорондын Засгийн Газрын хэлэлцээрт гарын үсэг зурсан нь жараад оны эхний бүтээн байгуулалтыг өрнүүлэх нөхцөлийг бүрдүүлсэн юм. БНМАУ-ын Сайд нарын Зөвлөлийн 1961 оны тав сарын 24-ны өдрийн 196/260 дугаар тогтоолоор Улаанбаатар төмөр замын Дархан станцын дэргэд Дархан хот байгуулах тухай тогтоол гаргаснаар 40 мянган хүн суух Дархан гэдэг шинэ хотыг барьж байгуулсан түүхтэй. Найрамдалаар овоглосон Дархан хот хөгжлийнхөө явцад Монгол Улсын хоёр дахь нийслэл хэмээн нэрлэгдэж Монгол Улсын Засаг захиргаа, нутаг дэвсгэрийн нэгж, түүний удирдлагын тухай хуулийн дагуу УИХ-ын 1994 оны 32 дугаар тогтоолоор Дархан-Уул аймаг болон өөрчлөгдсөн байна.