УИХ-ын гишүүн Д.Оюунхоролоос цаг үеийн зарим зүйлийг тодрууллаа.
-УИХ-ын нэгдсэн чуулганаар ирэх оны төсвийн гурав дах хэлэлцүүлэг явж байна. Өнөөдөртөө багтаж төсөв батлагдах болов уу гэсэн зүйл яригдаж байна. Төсөвт Ерөнхийлөгчийн тавьсан саналыг оруулсан болов уу?
-Гуравдугаар хэлэлцүүлэг хийж дуусаад дөрөвдүгээр хэлэлцүүлэг шууд хийнэ. Өнөөдөртөө төсвөө хэлэлцээд баталчих байх. Ерөнхийлөгчийн зүгээс экспортын чиглэлийн хөдөө аж ахуйн үйлдвэр барихад зориулж тодорхой хөрөнгийн эх үүсвэрийг Улсын төсөвт тусгах санал оруулсан. 160 мянган малчныг малын түүхий эд, бүтээгдэхүүний үнэ унаад байгаа учраас малчдын амьдралыг өөд нь татах малын түүхий эдийн үнийг өсгөхөд дотооддоо экспортын чиглэлийн үйлдвэр байгуулж иргэдийн амьжиргаа, ажилгүйдэл, ядуурлыг бууруулна 100 гаруй хүний ажлын байр бий болно. Тиймээс гурван төрлийн аж үйлдвэрийн парк байгуулах ажлыг 2019 оны төсөвт суулгаж шийдвэрлээд явах саналыг УИХ-д ирүүлсэн байгаа.
-Ерөнхийлөгчийн саналыг дэмжих боломжтой юу?
-Ажлын хэсгийн хувьд дэмжих гарц, боломжуудыг судалж тодорхой саналуудаа боловсруулсан. Аливаа шийдвэрийг олонхоороо гаргадаг. Нөгөөтээгүүр манай намын бүлгийн шийдвэр гардаг. Тиймээс бүлэг үүнийг эцэслэн хүлээж авна гэсэн шийдвэр гараагүй. Иймээс төсөвт суугаагүй. Одоо гурав, дөрөв дэх хэлэлцүүлэг дуусах гэж байна. Мэдээж ийм үед Монгол Улсын Ерөнхийлөгчийн бүрэн эрхийн хүрээнд төсөвт хориг тавих асуудал ирэх байх гэж бодож байна. Хэрвээ хориг ирвэл улс төрийн нөхцөл байдлыг ойлголцож зөвшилцөж, энэ асуудлыг эргэж харах ёстой хэмээн бодож байгаа. Хоригийг хүлээж аваад асуудлыг шийдэх арга замуудыг хайх ёстой. Яагаад гэвэл тавьж буй асуудлууд нь нэгдүгээрт хөдөөгийн малчдын хөдөлмөрийг үнэлгээтэй болгоё гэсэн үг. Хоёрдугаарт, ажилгүйдэл ядуурлыг бууруулахад тодорхой нэмэр болно гэсэн үг.
Гуравдугаарт, Монголын 80 сая толгой малыг эцсийн бүтээгдэхүүн болгож үйлдвэрлэж гаргаснаар эдийн засгаа солонгоруулна, төсөвт орж ирэх орлогын хэмжээ нэмэгдэнэ. Мал аж ахуй, аялал жуулчлалаа хөгжүүлэх нь эдийн засагт хэрэгтэй гэсэн ерөнхий зарчмууд явж байна гэж ойлгож байгаа. Тиймээс зарчмын хувьд би үүнийг хориг ирвэл хүлээж аваад улс төрийн тогоон дотроо зөвшилцөөд, улс орны нөхцөл байдлыг тайван тогтвортой, аядуу авч явах юм бол Монголын ард түмний нийтлэг эрх ашиг болно гэж бодож байгаа. Аль нэг талдаа зөрчил үүсгэх, улс төрөө ширүүсгэх, хяналтаа барьж чадахгүйн үр дагаврыг 2008 оны дол дугаар сарын нэгэнд болж байсан улс төрийн үймээн бидэнд харуулж байсан. Тиймээс ямар нэг дотоодын зөрчил, тэмцэл гэдэг бол хэзээ ч сайн юмны үр дагавар болдоггүй. Монголчууд бүгдээрээ хэлэлцвэл буруугүй бүлээн усаар угаавал хэргүй хэмээн ярьдаг. Аль нэг талаасаа битгий хүчирхийлээч, бярдаж эвдээч ээ, зөвшилцөл рүү яваач гэдэг бодолтой байгаа. Эмэгтэй хүний хувьд ч гэсэн бүлэг дээр энэ санаагаа илэрхийлж байгаа.
-Хүнс хөдөө аж ахуйн хөнгөн үйлдвэрлэлийн дараагийн сайдаар та томилогдох магадлалтай байгаа. Хэрвээ санал ирвэл та болох уу?
-Тийм зүйл ерөөсөө яригдаагүй. Яг үнэндээ манай нам, бүлэг, удирдах зөвлөл аль нэг түвшинд дараагийн сайдын яриа болоогүй. Өнөөдрийн үүсэн байгаа улс төрийн нөхцөл байдлаа харахад сандал, суудлын хэрүүл зодоон бол бидний өнөөдрийн ярих сэдэв биш. Сэтгүүлчид улс төрөөр, арчаагүй тоглоомоор тоглохоо болих хэрэгтэй.
Ер бол Монголын төрд сэтгэлтэй, ажил хийх чадвартай, эрх ашгаа эрэмбэлж чаддаг хүмүүс очоосой гэж боддог. Засгийн газрын гишүүдийг харахаар ядаж төр ард түмний төлөө гэсэн сэтгэлтэй хүн байгаасай гэж бодож байна. Ямар ч асуудлыг улс төржилгүй, намчирхалгүй, талцуулахгүйгээр Засгийн газрын гишүүд нь шийдвэрлэдэг байгаасай. Ядаж энэ бол төр, ард түмнийхээ төлөө тангараг өргөсөн төрийн хүний хийх ажил шүү дээ. Энэ зарчим алдагдаад байна. Хоёрдугаарт эрх ашгаа эрэмбэлж чаддаг, хувийн эрх ашгаа хойш тавьж чаддаг, шуналаа дарсан хүмүүс улс төрд байгаасай гэж бодож байна. Цаашдаа Монголын ард түмэн сонголт хийхдээ ийм сонголт хийж байгаасай бодож байна. Өнөөдөр бүх зүйлээ хольж хутгаж хаяад төрийн, намын нэр хүндийг унагаана гэдэг бол буруу шүү дээ.
Р.Хишигжаргал
Сэтгэгдэл (22)