Ерөнхий сайд У.Хүрэлсүх Нийслэлийн Засаг даргыг огцруулах тухай саналыг өнгөрсөн даваа гаригт НИТХ-д хүргүүлсэн. Үүнтэй холбоотой зарим зүйлийг НИТХ-ын дарга С.Амарсайханаас тодрууллаа.
-Ерөнхий сайдаас Нийслэлийн Засаг даргыг огцруулах тухай санал ирсэн байгаа шүү дээ. Шийдвэр нь хэзээ гарах вэ?
-Монгол Улсын Ерөнхий сайдаас хотын даргын асуудлыг шийдвэрлэхтэй холбоотой албан санал ирсэн. Энэ хүрээнд бид асуудлаа тэргүүлэгчдийн хурлаараа хэлэлцэнэ. Ээлжит бус хуралдаанаа зарлана. Хуулийн дагуу 15 хоногийн дагуу хэлэлцэж хурлаараа шийдвэр гаргах ёстой учраас энэ хугацаанд хэлэлцэж, зохих ёсных нь шийдвэрийг гаргаж, холбогдох байгууллагуудад нь хүргэнэ.
-НИТХ-ын Засаг даргын ажлыг хэдэн хувьтай гэж дүгнэж байгаа вэ. Нийслэлийн намын хорооны дарга хэрэв хангалтгүй байвал огцруулах асуудлыг хөндөнө гэсэн?
-Засаг даргын 2016-2020 оны мөрийн хөтөлбөрийн биелэлт жил жилээр баталж, хэлэлцэж явцыг нь дүгнэдэг. Үндсэн чиглэлийн явцыг өнгөрсөн сарын 31-ний өдөр хуралдаж дүгнэсэн байгаа. Тодруулбал, үндсэн чиглэлийн явц 80 хувийн гүйцэтгэлтэй хангалттай байна гэж дүгнэсэн. Гэхдээ дээд шатны байгууллага өөрөөр хэлбэл, Ерөнхий сайдын хувьд хангалтгүй ажиллаж байна гэсэн дүгнэлтэд хүрсэн учраас тийм албан бичиг ирүүллээ гэж үзэж байгаа. Үүнийг хурлаараа хэлэлцэж шийдвэрлэх ёстой учраас хурлын бүрэн эрхийн хүрээнд асуудлуудаа хэлэлцэж, шийдвэрлэнэ.
-Хангалттай ажилласан гэж дүгнэгдсэн бол яагаад огцруулах гээд байгаа юм бэ. Энэ талаар таны байр суурь ямар байна вэ?
-Тэр асуудлыг одоо би энд хэлэх боломж байхгүй. НИТХ үйл ажиллагааных нь үндсэн чиглэлийг дүгнэсэн. Засгийн газрын хэмжээнд шууд Засаг даргын үйл ажиллагаатай холбоотой асуудлыг дүгнэх эрх үүргийнхээ хүрээнд Ерөнхий сайд өөрийнхөө санал дүгнэлтийг ирүүлсэн учраас тэр асуудлуудаа ярилцана.
Б.Лхам
Сэтгэгдэл (1)