Төрийн ажил цааш үргэжлэхгүй байгаа “гацаа” гэгч зүйл нь бараг илэрхий болж байх шиг. Энэ нь төрийн өндөр албан тушаалтнуудын л эрх мэдлээ булаацалдан, талцсан үйлдэл аж. Төрийн толгой буюу эрх барих дээд байгууллага хоёр хэсэг хуваагдсан нь үнэн. Тодруулбал, Ерөнхий сайд У.Хүрэлсүх, УИХ-ын дарга М.Энхболд нарын хоорондын эрх мэдлийн төлөөх дайн гэхэд хилсдэхгүй болов уу. Бусад нь зүгээр л хоёр талд хуваагдсан хөгжөөн дэмжигчид. Яг үнэндээ ингэж л харагдаж байна.

Энэ талцсан байдал нь ч цааш үргэлжлэх хандлагатай байгаа. Эрх мэдлийг гартаа авч, гол тоглогч болохын тулд мэдээж эцсийг нь хүртэл явах л байх. Дунд нь төрийн ажил цалгардахаас эхсүүлээд олон асуудал бий. Бас давуу тал ч бий аж. Учир нь нотолж, гаргаж ирж чаддаггүй байсан баримтуудыг хоёр тал бие бие рүүгээ дайралт маягаар шидэж өгч байгаа нь ашигтай мэт. Өнөөдөр л төрийн өндөр албан тушаалтнууд татвар төлөгчдийн мөнгийг ингэж идэж, уугаад  байгаа гэвэл үгүй. Өмнө нь газар авч чадалгүй дарагдчихдаг байсан хэрэг.

Жижиг дунд үйлдвэрлэлийг хөгжүүлэх сангийн асуудал гэж хэсэг тэргүүн сэдэв байснаа одоо мартагдах тийш оржээ. Уг сантай нэр холбогдсон нэр бүхий гишүүд, сайд нар суудалдаа ч мөн амар жимэр тухлан буй. Ингэж тухлуулж буй эзэн нь Ерөнхий сайд У.Хүрэлсүх гэнэ.

Тодруулбал, Өнөөдөр УИХ-ын гишүүн Н.Номтойбаяр Жижиг, дунд сангийн асуудалтай холбоотой мэдээлэл хийсэн. Тэрбээр “МАН-ын дарга ЖДҮ-чдийн загалмайлсан эцэг гэдгийг олж тогтоолоо. 2016 оны 12 сарын 13-ны өдөр У.Хүрэлсүх өрийн төрсөн дүү У.Давхарбаярын нэрээр “Жаргалант мах импекс” компанийн нэр дээр 1 тэрбум 326 сая төгрөгийн зээлийг авах гэрээнд гарын үсэг зурсан. Улмаар 2017 оны 2 сарын 15-нд 327 сая төгрөгийг, 2017 оны 8 сарын 3-нд 236 сая төгрөгийг тус тус авсныг олж тогтоолоо. Маш тодорхой зохион байгуулалттай хэрэг. Тиймээс Ерөнхий сайд У.Хүрэлсүхийг 48 цагийн дотор өөрөө ажлаа өг хэмээх шаардлагыг тавьж байна” гэсэн юм.

Мөн энэ талаар маргааш болох намын бага хурал дээрээ мэдэгдэнэ гэдгээ ч хэлсэн. Тиймээс Ерөнхий сайдын нэр холбогдоод буй уг асуудал өнөөдөр тодорхой болох байх гэж чих тавин суугаа олон хүн бий.

Учир нь Ерөнхий сайд Жижиг, дундын сангаас үнэхээр зээл авсан байж магадгүй хэмээн хардах ч үндэслэл байгаа. Энэ санд нэр холбогдсон сайдуудаа хаацайлаад байснаас нь харвал шүү дээ. Ер нь л Жижиг, дундын асуудалд хойрог хандаж байна хэмээн тухайн үед ч шүүмжлэл их хүртээд байсандаг шүү.  Уг нь авлига, шударга бус зүйлтэй хатуу тэмцэнэ гэдгээ эрс шийдэмгий мэдэгдэж байсан санагдана.

Ерөнхий сайд та үнэхээр уг асуудалтай холбоотой бол таны дэглэсэн жүжиг харамсалтай нь үүгээр дуусах нь. Үгүй бол хуулийн дагуу шалгадаг газраар нь шалгуулж энэ эргэлзээг тайлах байх.

Б.Лхам