УИХ-ын гишүүн М.Билэгт:  "Ямар асуудал хэлэлцэх мэдээлэл алга. МАН-ын бага хурал бол намын их хурлын хоорондох удирдах байгууллага нь. Бага хурлын гишүүд иргэдийн дунд байдаг хүмүүс. Тийм учраас энэ хурлаар нэлээд сайн илэн далангүй яриасай гэж бодож байна" гэв.

НИТХ-ын тэргүүлэгч Д.Амарсайхан "Бага хурлаар хэлэлцэх асуудлын хүрээнд намын даргын илтгэл орсон байсан. Тэр хүрээнд л асуудал яригдах байх" гэлээ.

УИХ-ын гишүүн Ч.Улаан хуралдаанд ирлээ. Тэрбээр "Хурлаар хэлэлцэх асуудлын талаар мэдээлэл алга. ЖДҮХС-гаас гадна хэд хэдэн ЖДҮ-тэй тэнцэх хэмжэээний мөнгийг ганцаараа авчихсан хүмүүс байна шүү дээ. Хэдэн мянган ЖДҮ-тэй тэнцэх мөнгө авсан байхад бид зүгээр л хараад суугаад байна. УИХ чадамжгүй болсон нөхцөлд тардаг юм" гэв.

УИХ-ын гишүүн Ж.Бат-эрдэнэ ирлээ. Тэрбээр "Нам учир зүйгээ олохоос өмнө юунаас болж ийм байдал хүрэв гэдгээ ярилцах хэрэгтэй. Намтай холбоотой асуудлууд улс орны түүхтэй холбоотой. Хэн нэг нь цэвэрхэн нөгөө хэсэг нь бузар булай болоод байгаа явдал байхгүй. Ерөнхий сайд нь УИХ-ын дарга нь ч тэр аль аль нь хариуцлагаа хүлээх ёстой. Өчигдөр намайг АТГ дуудсан. ЖҮД-ийг хөгжүүлье гэж зөндөө ярьсан. Үүний үр дүнд ганц сүүний үйлдвэр Булган аймагт бий болсон. Тэрийг л татаж авчирч надтай нааж байгаа юм байна. Ер нь өчигдөр лав 27-гоос 3-4 хүн АТГ-т дуудсан. Намын дүрэмд хөөдөг туудаг зүйлээ больсон. Сэтгүүлчид гадаа зогсоод байх шаардлагагүй. Дотор ороод яриа хөөрөөгөө авч байх ёстой. Дотор юу болж байгааг мэдээлэх эрхтэй" гэж хэллээ.

Р.Хишигжаргал