“МАК” компанийн эзэн Б.Нямтайширын хүү УИХ-ын гишүүн Н.Номтойбаярыг ашигт малтмалын тусгай зөвшөөрөл буюу лицензи 36-г хулгайлан авсан, тэдгээрийг нь Засгийн газар буцаан авах тухай сул дэл яриа дээр дооргүй яригдах болсныг 24tsag.mn онцолж, түүний мөрөөр мөшгөж үзлээ.
2018 оны байдлаар Н.Номтойбаяр өөрөө биш харин түүний аавын 1993 онд үүсгэн байгуулсан “Монголын Алт” Корпораци (МАК) ХХК-ийн эзэмшилд ашигт малтмалын “Х” хайгуулын болон “А” ашиглалтын нийт 34 тусгай зөвшөөрөл байдаг нь тогтоогдож байна.
Эдгээрийг ашигт малтмалын зөвшөөрөл буюу лицензийг ашигт малтмалын төрөл, зүйлээр нь ангилан авч үзэв. Үүнд:
Нэг. МАК-ийн харьяа барилгын материалын үйлдвэрүүд болох “МАК-Цемент” болон “Евроблок”-ын үйлдвэрийн үндсэн түүхий эд болох шохойн чулуу, гөлтгөнө, шавар, дайрга, элс гэх мэт барилгын материалын түүхий эд олборлох 14 тусгай зөвшөөрөл МАК-д байдаг байна. Үүнээс гадна Дорноговь аймгийн Элдэв, Алаг толгой, Дундговь аймгийн Хөөтийн нүүрсний уурхайнуудаас эдгээр үйлдвэртээ нүүрс олборлож ашигладаг бөгөөд эдгээрт 6 тусгай зөвшөөрөл хамаардаг ажээ. МАК ашиглалтын нийт 20 тусгай зөвшөөрөлтэй газраасаа цемент болон барилгын материалын үйлдвэрүүдээ түүхий эдээр хангаж, үйлдвэрлэлийнхээ хэвийн үйл ажиллагаагаа явуулдаг юм байна.
Хоёр. Улс, орон нутгийн төсөвт жил бүр багагүй татвар, хураамж төлж, МАК-ийг сүүлийн 10 гаруй жил улсдаа “Шилдэг татвар төлөгч “ болгож байгаа нүүрсний томоохон уурхай “Нарийн сухайтын Нүүрсний уурхай” нь ашиглалтын 5 зөвшөөрөлтэйгээр үйл ажиллагаагаа явуулдаг юм байна. Дорнод аймаг дахь Адуунчулууны уурхайд нь ашиглалтын 2 зөвшөөрөл харьяалагддаг байна. Нийтдээ нүүрсний үйлдвэрлэлдээ “А” буюу ашиглалтын 7 тусгай зөвшөөрөлтэй ажээ.
Гурав. Цагаан Суваргын зэс, молибдены Баяжуулах үйлдвэрийн төсөл хэрэгжүүлж буй зэс болон исэлдсэн зэсийн орд газарт ашиглалтын 3 зөвшөөрөлтэй. Төслийн үйл ажиллагаа одоогоор 50 хувьтай хэрэгжиж байна.
Дөрөв. Эдгээрээс гадна “МАК” ХХК нь цеолит, нүүрс болон металлын хайгуулын буюу “Х” тусгай зөвшөөрөл 4-ийг эзэмшиж, геологи хайгуулын ажлыг өөрийн хүч, хөрөнгөөр явуулж байна.
* * *
Дүгнэлт. Нэг хүн, тэр тусмаа нэгэн улс төрч хэмжээ хязгааргүй лицензи, тусгай зөвшөөрөл эзэмшиж байгаа гэдэг нь үндэслэл муутай, дэгэсдүүлсэн мэдээлэл бололтой.
Дүгнэлт. Энэ бүх тусгай зөвшөөрлийг “Ашигт малтмалын тухай” Монгол улсад өнөөдөр хүчин төгөлдөр мөрдөгдөж байгаа хууль, журмын дагуу авсан гэдгийг МАК өөрөө нотолж байгаа төдийгүй АМХЭГ-ын мэдээллийн сангаас шууд ороод харахад ч илхэн байгаа юм.
Дүгнэлт. Улс орны эдийн засаг, нийгмийн хувь заяатай холбоотой аливаа асуудлаар мэргэжлийн байгууллага, хүмүүсээс лавлаж, үндэслэл, тодруулга авалгүйгээр мэдээлэл түгээх нь улс орныхоо хөгжилд бодитой хувь нэмэр оруулж буй үндэсний үйлдвэрлэгчид, баялаг бүтээгчдийнхээ талаар олон нийтэд буруу ойлголт төрүүлж, улмаар нийгмийг хуваан сөргөлдүүлж болзошгүйг анхаарууштай.
Сэтгэгдэл (37)