Нийслэлийн ИТХ-ын Тэргүүлэгчид өнөөдөр хуралдаж дараах асуудлуудыг хэлэлцлээ. Хуралдааны эхэнд нийслэлийн Эрүүл мэндийн газраас томуу, томуу төст өвчний тархалтын талаар мэдээлэл хийж, хэрэгжүүлж буй арга хэмжээгээ танилцуулав. Нийслэлийн нутаг дэвсгэрт үйл ажиллагаа явуулж буй эрүүл мэндийн байгууллагуудад нийтдээ 2239 ор байдаг бөгөөд 977 нь хүүхэд хэвтэн эмчлүүлэхэд зориулагдсан байдаг аж. Гэсэн ч томуугийн ид дэгдэлтийн үед ор хүрэлцдэггүй, эмч, сувилагчийн ажлын ачаалал нэмэгддэг. Тиймээс нийслэлийн Эрүүл мэндийн газраас эмнэлгүүдийг уртасгасан цагаар ажиллуулж, 1720 ор нэмэлтээр тавихаар болжээ. Нийслэлийн ИТХ-ын Тэргүүлэгчид танилцуулга мэдээллийг сонсоод цэцэрлэг бүрийг эмчтэй байлгахад анхаарч, томуугийн дэгдэлтийг намжаахад бүх бололцоогоо ашиглах ёстойг холбогдох хүмүүст анхаарууллаа.
Мөн энэ үеэр нийслэлийн нутаг дэвсгэрт шашны байгууллага байгуулах, зөвшөөрөл олгох, сунгах үйл ажиллагаанд хяналт тавих журам шинэчлэн батлах тухай асуудлыг хэлэлцсэн байна. Нийслэлийн хэмжээнд шашны 307 байгууллага үйл ажиллагаа явуулдаг байна. Түүнчлэн шинээр бүртгүүлэхээр 54 байгууллага хүсэлт ирүүлжээ. Журмын төслийг Тэргүүлэгчид хэлэлцэн баталлаа.
Хуралдааны төгсгөлд нийслэл хотод өрнүүлсэн бүтээн байгуулалтад газраа чөлөөлсөн иргэдийн асуудлыг хэрхэн шийдвэрлэх талаар хэлэлцжээ. Улсын төсвийн хөрөнгө оруулалтаар энэ онд өрнүүлсэн зарим бүтээн байгуулалтын нөлөөллөөр газраа чөлөөлсөн 25 өрхөд нөхөн олговор өгөх шаардлага үүссэн талаар нийслэлийн Засаг даргын үүргийг түр орлон гүйцэтгэгч Ж.Батбаясгалан танилцууллаа. Тэрбээр “Нийслэлийн нутаг дэвсгэрт өрнүүлсэн бүтээн байгуулалтууд 2018 оны газар зохион байгуулалтын төлөвлөгөөнд тусгагдаагүй байсан. Засгийн газраас газар чөлөөлсөн иргэдэд нөхөн олговор өгнө гэсэн боловч өнөөдрийг хүртэл шийдээгүй байна. Үүний улмаас 25 өрх орох оронгүй болсон. Нийслэлийн Газрын албатай эдгээр өрх гэрээ байгуулж, газраа чөлөөлсөн бөгөөд газар дээр нь хэдийнэ бүтээн байгуулалтын ажил хийсэн” гэв.
Дээрх 25 өрхөд 1.7 тэрбум төгрөгийн нөхөн олговор өгөх тооцоотой. Концессын гэрээгээр нийслэлд өрнүүлсэн бүтээн байгуулалтаас 1.2 тэрбум төгрөгийн хэмнэлт гарч буй бөгөөд тус хөрөнгийг иргэдийн нөхөн олговорт шилжүүлэх саналыг нийслэлийн Засаг даргын үүргийг түр орлон гүйцэтгэгч Ж.Батбаясгалан гаргажээ. Тэргүүлэгчид уг асуудлыг хэлэлцээд нийслэлийн ИТХ-ын ээлжит XXI хуралдаанаар хэлэлцүүлэхээр тогтсон байна.
Нийслэлийн ИТХ-ын ХМОНХТ