АНУ-ын Нью-Йорк хотын холбооны шүүхээс Citigroup (Citibank)-ийн удирдах албан тушаал хашиж байсан 50 настай Эдвард Жин Смитэд бэлгийн хүчирхийлэл, хүүхдийн бэлгийн хүчирхийллийн дүрс бичлэг хадгалсан, мөрдөн шалгах ажиллагаанд саад учруулсан зэрэг гэмт хэрэгт 30 жилийн хорих ял оноолоо.

Харвардын их сургуулийг төгссөн Смит 2021 оноос Citigroup-т удирдах албан тушаалд ажиллаж байсан бөгөөд 2024 онд баривчлагдсаныхаа дараа ажлаасаа шууд халагджээ. Компанийн зүгээс мөрдөн шалгах ажиллагаатай бүрэн хамтран ажилласан гэдгээ мэдэгдсэн байна.

Прокуроруудын мэдээлснээр Смит 2015-2024 оны хооронд санхүүгийн өндөр албан тушаал, нэр хүндээ ашиглан эмзэг байдалд байсан олон эмэгтэйг Нью-Йорк дахь орон сууцандаа урьж, мансууруулах бодис өгсний дараа бэлгийн хүчирхийлэл үйлддэг байжээ. Мөн хохирогчдын зургийг тэдний зөвшөөрөлгүйгээр авч хадгалдаг байсан аж.

Түүнээс гадна мөрдөн шалгах ажиллагааны үеэр түүний цахим төхөөрөмжүүдээс нялх хүүхэд, бага насны хүүхдүүдийг хүчирхийлсэн агуулгатай хэдэн арван мянган зураг, бичлэг илэрсэн байна. Прокурорууд үүнийг хэргийн хамгийн ноцтой нөхцөлүүдийн нэг хэмээн тодорхойлжээ. Шүүх хурлын үеэр Смитийн өмгөөлөгчид түүнийг аутизмын хүрээний эмгэгтэй бөгөөд энэ нь үйлдлийнх нь "гол шалтгаан" болсон гэж мэдэгдэн ялыг хөнгөрүүлэхийг хүссэн байна. Гэвч прокурорууд энэ тайлбарыг эрс няцааж, аутизмтай хүмүүсийг гүтгэсэн, үндэслэлгүй тайлбар хэмээн шүүмжилжээ. Шүүх ч энэ үндэслэлийг хүлээн аваагүй байна.

Ял сонсохын өмнө Смит шүүгчид илгээсэн захидалдаа хийсэн үйлдэлдээ харамсаж байгаагаа илэрхийлж, "амжилтын оргилоос гутамшгийн ангал руу унасан" гэж бичжээ. Тэрээр өөрийгөө өөрчлөгдөхийг хүсэж буй хүн хэмээн тайлбарласан ч шүүх гэмт хэргүүдийн удаан хугацаанд, төлөвлөгөөтэй үйлдэгдсэн шинж чанарыг харгалзан 30 жилийн хорих ял оноосон байна.