Өнгөрсөн есдүгээр сард багш ажилчид цалингаа нэмэгдүүлэх талаар харьяа яаманд шаардлага хүргүүлж, жагсаж байсан. Тэд шаардлагын үр дүн бүрэн хэрэгжээгүй гэдэг шалтгаанаар ирэх нэг дэх өдрөөс Хөдөлмөр нийгмийн хамгааллын яам, Сангийн яам болон БСШУСЯ-ны гадаа жагсахаа өчигдөр мэдэгдсэн юм.

Тодруулбал, өчигдөр Монголын Үйлдвэрчний Эвлэлийн Хорооноос багш болон шинжлэх ухааны ажилчдын цалингийн нэмэгдэл одоог хүртэл олгогдохгүй байгаа талаар мэдээлэл хийсэн.

Энэ үеэр Шинжлэх ухааны байгууллагуудын Үйлдвэрчний эвлэлийн нэгдсэн хорооны дарга Т.Баясгалан ярихдаа "Есдүгээр сард бидний хийсэн ажил хаялтын үр дүнд бид Засгийн газартай гэрээ хэлэлцээр хийж ажил хаялтыг түр завсарлуулаад байсан. Гэсэн хэдий тэр хугацаанаас хойш өнөөдрийг хүртэл ямар нэгэн үр дүнд хүрээгүй, байгуулсан гэрээ, хэлэлцээр хэрэгжихгүй байна. Есдүгээр сарын 14-ний өдөр манай үйлдвэрчний эвлэл, БСШУСЯ, Сангийн яам, Хөдөлмөр нийгмийн хамгаалалын яам болон Засгийн газрын гаргасан саналыг үндэслэн хэлэлцээр байгуулсан. Үүнд 2018 оны 10 дугаар сарын нэгний өдрөөс багш болон эрдэм шинжилгээний ажилтнуудын цалинг долоон хувиар нэмэгдүүлэхээр тохиролцсон.

Гэвч он дуусах гэж байхад уг нэмэгдэл ажилчдад олгогдоогүй байна. Тухайлбал, нийслэлийн зарим сургуулиудын багш нар нэмэгдлээ дөнгөж авч эхэлсэн ч хөдөө орон нутаг болон нийслэлийн үлдсэн ажилчид аваагүй байна. Олон сарын турш бид цалинг нэмэгдүүлэх гэж гуйж, шаардаж явсан, гэвч ямар нэгэн үр дүнд одоог хүртэл хүрээгүй байгаад бид бухимдаж байна. Тийм ч учраас хариуцсан яамдыг хэлэлцээрийн дагуу ажлаа гүйцэтгэхийг шаардах болно. Мөн Хөдөлмөр, нийгмийн хамгааллын сайд С.Чинзоригт шаардлага хүргүүлнэ" гэсэн юм.

Р.Хишигээ