Сар бүрийн 25-ны өдөр АТГ-аас мэдээлэл хийдэг уламжлалтай. Энэ үеэр сэтгүүлчдийн сонирхсон асуултад хариулсныг товчхон хүргэе.

АТГ- ын Мөрдөн шалгах хэлтсийн ахлах мөрдөгч, ахлах комиссар Ч.Жаргалбаатар: Хотын даргыг шалгаж байна.

-Хууль зүйн сайд асан Д.Дорлигжавыг дөрвөн сая ам.долларын хэрэгт холбогдуулан АТГ-аас байцаалт авсан. Мөрдөн шалгах ажил ямар шатанд үргэлжилж байна вэ?

-Д.Дорлигжавын хэрэгт мөрдөн шалгах ажиллагаа үргэлжилж байна. Мэдээлэл түгээсэн хүн нь гадаадад явсан учир тайлбар авч чадаагүй байна.

-Салхитын мөнгөний ордтой холбоотой хэргээр 1.3 тэрбум төгрөг хураагдсан ч буцааж өгсөн гэх мэдээлэл гарсамн. Энэ үнэн үү?

-Салхитын мөнгөний ордтой холбоотой 1.3 тэрбум доллар хураагдсан тухай хэргийг шалгаж байна. Төрийн албан хаагчид их хэмжээний хээл хахуул өгөхийг завдсан гэх хэргийн мөрдөн байцааж, шалгаж байна. Сэжиглэн шалгагдаж байсан хүмүүсийн гэм буруутай эсэхийг тогтоохоор ажиллаж байна. 1.3 сая ам.долларыг буцааж өгсөн тухай мэдээлэл хэвлэлээр бичигдсэн нь ташаа.

-ЖДҮХС-гаас зээл авсан гэх хэрэгт УИХ, Засгийн газрын хэдэн гишүүнийг шалгаж байгаа вэ?

-УИХ-ын нэр бүхий гишүүд ирж гэрчээр мэдүүлэг өгсөн. Хамаарал бүхий компаниуд нь зээл авсан учраас нөлөөлсөн эсэх талаар эхнээсээ мэдүүлэг өгсөн. Олон тооны аж ахуйн нэгжийг хамарсан учир АТГ-ын бүх мөрдөгчид, дээр нь цагдаагийн байгууллагаас албан хаагч оролцуулж ажиллаж байна.

-БОАЖ-ын яамны газрын дарга Г.Нямдаваа нарыг албан тушаалаас нь түдгэлзүүлэн шалгаж байгаа гэх мэдээлэл байна?

-Г.Нямдаваа гэх хүнийг албан тушаалаас нь түдгэлзүүлэн шалгаж байна. Агаарын бохирдлыг бууруулах хөрөнгийг хэрхэн зарцуулсныг шалгаж байна. Хамтарсан ажлын хэсэг байгуулагдаад шалгаж байна.

-Хөгжлийн банкны асуудал юу болж байна вэ?

-Хөгжлийн банктай холбоотой 20 орчим дугаар бүхий хэрэг шалгагдсан. Эдгээр хэргүүд прокурорт шилжиж, шүүхийн шатанд хянагдаж байгаа.

-Стандарт банктай холбоотой хэрэг ямар шатанд явж байна вэ?

-Стандарт банктай холбоотой хэрэгт мөрдөн шалгах ажиллагаа явагдаж дууссан. Уг хэргийг прокурорын байгууллагад шилжүүлнэ. УИХ-ын гишүүн, Засгийн газрын гишүүнээр ажиллаж байсан нэр бүхий гишүүдтэй холбоотой хэрэгт мөрдөн шалгах ажиллагаа явагдаж байна. Зайлшгүй шаардлагатай тохиолдолд мэдүүлэг, байцаалт авах ажлууд хийгдэнэ.

-Хотын дарга асан С.Батболдыг шалгана гэж байсан. Энэ асуудал юу болсон бэ?

-Нийслэлийн Засаг даргаар ажиллаж байсан С.Батболдтой холбоотой асуудалд шалгагдаж байгаа. Эцсийн шийдвэрлэлтийн талаар хэлэх боломжгүй.

-Цэвэр агаар сангаас утааг бууруулах нэрийдлээр мөнгө идэж, угаасан хүмүүстэй холбоотой хэрэг ямар шатандаа явж байна. Нэмж хүн яллагдагчаар татсан уу?

-Цэвэр агаар сан, агаарын бохирдлыг бууруулахтай холбоотой хэрэгт одоогийн байдлаар эрүүгийн хэрэг үүсгэж яллагдагчаар татсан хүмүүсийн тоог тодорхой хэлэх боломжгүй. Энэ хэрэгт Улсын ерөнхий прокурорын тушаалаар байгуулагдсан цагдаагийн байгууллагатай хамтарсан ажлын хэсэг мөрдөн шалгах ажиллагааг явуулж байна. Мөрдөн шалгах ажиллагаа дөнгөж эхлээд явж буй тул дэлгэрэнгүй мэдээлэх боломжгүй.

-АТГ-аас гурван гишүүний бүрэн эрхийг түдгэлзүүлж, шалгах шаардлагатай гэсэн хүсэлтээ Нийслэлийн прокурорт гаргасан гэсэн?

-Манайхаас гурван гишүүний бүрэн эрхийг түдгэлзүүлэх шаардлагатай гэсэн үндэслэлээ гаргасан. Прокурорын байгууллага хэрхэн шийдвэрлэж буй талаар одоогоор мэдээлэл байхгүй.

-УИХ-ын гурван гишүүнийг түдгэлдүүлэх үндэслэл нь юу юм бол?

-Хэргийн үйлдэл, аргачлалын талаар би мэдээлэл өгөх үүрэг хүлээхгүй. Хуулиар хориотой.

-60 тэрбумын хэрэг шийдвэрлэгдээгүй хоёр жилийн хугацаа өнгөрлөө. Энэ хэрэгт АТГ-ын дарга Х.Энхжаргал оролцсон гэх мэдээлэл гараад байна?

-60 тэрбумын хэрэг шалгагдаж байгаа. Одоогоор ТЕГ-т ажлын хэсэг гарган шалгаж байна. Энэ хэрэгт байгууллагын удирдлагын зүгээс аливаа мөрдөн байцаалтын хэрэгт хөндлөнгөөс оролцсон зүйл байхгүй. Уг хэрэг байцаан шийтгэх зохих журмынхаа дагуу явагдана.

Б.Лхам