УИХ-ын энэ долоо хоногийн нэгдсэн чуулган зургаа дахь удаагаа хойшиллоо. Энэ талаар УИХ-ын дэд дарга Л.Энх-Амгалангаас тодрууллаа.

-Өнөөдрийн чуулган яагаад хуралдсангүй вэ. Чуулганд хэдэн гишүүн ирсэн бэ?

-УИХ-ын чуулганд 68 гишүүн ирэх ёстой байсан. Гадаадад болон  орон нутагт томилолттой, өвчтэй, чөлөөтэй байгаа долоон гишүүн бий. Эдгээр гишүүдийг УИХ-ын Дэгийн тухай хуульд зааснаар хүндэтгэн үзэх ёстой. Харин чуулганд суух ёстой 68 гишүүнээс 32 нь хүрэлцэн ирсэн. Үндсэндээ 36 гишүүн ирээгүй учраас чуулган зургаа дахь удаагаа хойшиллоо. Өнгөрсөн долоо хоногт Монгол Улсын Ерөнхийлөгч Х.Баттулга үндэсний аюулгүй байдлын асуудлаар мэдээлэл хийх хуваарьтай байсан. Долоо хоног бүхэн хэлэлцдэг асуудлыг УИХ-ын дэргэдэх Даргын зөвлөл шийддэг. Мөн энэ сарын 26-нд Үндэсний аюулгүй байдлын зөвлөлөөс УИХ-д албан бичиг ирсэн. Тус бичгээр “28, 29-ний өдрийн чуулганы ирцийг бүрдүүлээч ээ. Ерөнхийлөгч үндэсний аюулгүй байдлын талаар мэдээлэл хийх гэж байна” гэсэн хүсэлт ирүүлсэн. Энэ хүсэлтийн дагуу УИХ дахь МАН, АН-ын бүлэгт бичиг  хүргүүлсэн. Мөн өнгөрсөн долоо хоногт УИХ-ын чуулганы ирцийг бүрдүүлээгүй, зургаа дахь удаагаа хүндэтгэн үзэх шалтгаангүйгээр хурлаа тасалж байгаа 30 гишүүний нэр дээр шаардлагыг хүргүүлсэн. Өнгөрсөн долоо хоногт Нийгмийн бодлого, боловсрол, соёл, шинжлэх ухааны болон Төрийн байгуулалтын байнгын хороо хуралдсан. НББСШУ-ны байнгын хороогоор хуваарьтай асуудлууд, Улаанбаатар хотын агаарын бохирдол, хүн амын өвчлөлийн асуудлуудыг хэлэлцсэн. Төрийн байгуулалтын байнгын хороогоор УИХ-ын даргыг огцруулах нэр бүхий гишүүдийн шаардлагыг хэлэлцэж тодорхой дүгнэлт гаргасан. Үүгээр нэр бүхий гишүүдийн УИХ-ын даргыг огцруулах шаардлага хуульд нийцээгүй гэсэн шалтгаанаар хэлэлцэх асуудлаасаа хассан. Он гарах гэж байна. Үндсэндээ энэ оны хамгийн сүүлийн чуулган. Он гарахаас өмнө Засгийн газрын гишүүдийг томилох ёстой. Засгийн газрын гишүүн огцорсноос хойш 30 хоногийн дотор шинээр томилох хуультай. ХХААХҮ-ийн сайд Б.Батзориг огцроод хоёр сарын нүүрийг үзэж байна. Уг асуудлыг Засгийн газраас УИХ-д өргөн бариад сар гаруйн хугацаа өнгөрч байна. Энэ бол хууль зөрчигдөж байгаа гэсэн үг. Хууль зөрчигдөж буй учраас Монгол Улсын Ерөнхий сайдад үүнийг анхааруулсан бичиг явуулсан. Мөн огцорч буй юм уу, чөлөөлж байгаа сайд нарыг харьяа байнгын хороогоор долоо хоногийн дотор хэлэлцэх ёстой. Ц.Цогзолмаа сайдыг харьяа байнгын хороо долоо хоногийн дотор хэлэлцсэн. Я.Содбаатар сайдыг Эдийн засгийн байнгын хороо долоо хоногийн дотор хэлэлцэж чадаагүй. Өөрөөр хэлбэл УИХ-ын тухай болон УИХ-ын Дэгийн тухай хууль зөрчигдөж байна гэсэн үг. Ийм нөхцөл байдал үүсээд байна. Хувиараар тав дахь өдөр Монгол УЛсын Ерөнхий сайд, УИХ-д мэдээлэл хийдэг. Хэрэв маргаашийн чуулганд Ерөнхий сайд мэдээлэл хийхгүй бол зургаа дахь удаагаа УИХ-ын тухай хууль, УИХ-ын Дэгийн тухай хууль зөрчигдөх нөхцөл үүсч байна.

-УИХ-ын даргыг эсэргүүцэж буй 40 гишүүн УИХ-ын даргыг огцруулж болохуйц хууль санаачлаад өөрсдөө оруулж ирэх боломжгүй юм уу. 40 гишүүн гэдэг бол хангалттай тоо гэж зарим улс төр судлаачид үзэж байна. Ингэх хууль эрхзүйн орчин бий юу?

-УИХ-ын 75 гишүүнд Үндсэн хуулиар олгогдсон хууль санаачлах эрх байгаа шүү дээ. Өнөөдрийн үүссэн нөхцөл байдалд ойлголцол зөвшилцөл шийдлээр гарах ёстой. Түүнээс жагсаал цуглаанаар энэ нөхцөл байдлаас гарах боломжгүй. Жагсаал цуглаан зөв шийдэл биш. Яагаад гэвэл ард түмэн 75 гишүүнээр дэмжуулж төр барих эрхээ эдэлж байгаа. Өнөөдөр Сүхбаатарын талбай дээр жагсах бус УИХ-ын танхимд энэ асуудлыг ярьж шийдэх ёстой. Ийм хуулийн зохицуулалттай. 40 гишүүн гэдэг бол ямар ч хуулийг батлах боломжтой. Үнэхээр өнөөдрийн үүсч буй асуудал ирээдүйд үүсэхэд гарах гарц хуулийн зохицуулалт тодорхой байх учраас хэрэв хүсч байгаа бол үнэхээр хуулийн хүрээнд Монгол Улсад хуулийн засаглал бий бол бүх зүйлийг хууль дээдлэх зарчмаар шийдэхийг хүсч буй бол УИХ-ын дурийн гишүүн хууль санаачлах эрхтэй.

-Чуулганы хуралдаанд суухгүй байгаа гишүүдэд хариуцлага тооцож цалингаас нь хасна хэмээн өмнө та мэдэгдсэн?

-Зургаа дахь удаагийн хүндэтгэн үзэх шалтгаангүйгээр УИХ-ын чуулган болоод байнгын хороодын хуралд ирээгүй байгаа нэр бүхий гишүүдийн цалинг хасах чиглэлийг УИХ-ын Тамгын газарт өгсөн байгаа. Хэн хэний цалинг хэдэн хувиар хасах нь маргааш тодорхой болно.