ЗТХЯ нь У.Хүрэлсүхийн Засгийн газрыг огцруулах зэвсэг луга болоод байна. Энэ удаад ч дахин шинэ “бактерлогийн зэвсэг” туршиж эхлээд байгаа бололтой. Учир нь тус яамны Төрийн нарийн бичгийн даргаар ЗТХЯ-ны Авто тээврийн бодлогын хэрэгжилтийг зохицуулах газрын дарга асан С.Батболдыг томилуулахаар  Төрийн албаны зөвлөлөөс 2018 оны арванхоёрдугаар сарын 28-нд ЗГХЭГ-т саналаа хүргүүлсэн аж. Гэтэл түүнийг тус албан тушаалд томилох асуудал энэ сарын 9-нд Засгийн газрын хуралдаанаар хэлэлцэгдэхээр болжээ. Энэ хооронд нэг том зөрчил “тааралдана”

Юу гэвэл шинэ оны эхний өдрөөс эхлэн Төрийн албаны тухай хуулийн шинэчилсэн найруулгыг дагаж мөрдөх ёстой. Энэ нөхцөлд оны өмнө тасалбар болсон хуучин хуулийг хэрэгжүүлж, хуучин хуулийн зүйл, заалтаар Төрийн албаны зөвлөлөөс санал болгосон хүнийг ЗГХЭГ хүлээн авч, Засгийн газрын хуралдаанаар томилж ажиллуулах нь хууль зөрчсөн хэрэг болно.

УИХ 2017 онд нэмэлт оруулахдаа оруулсан өөрчлөлтөөс хамгийн их шүүмжлэл дагуулж байгаа нь уг хуулийн 23.7 дахь заалт  буюу  “Нийтийн албанд томилогдохоор нэр дэвшсэн этгээд тухайн албан үүргийг гүйцэтгэхэд илт ашиг сонирхлын зөрчил үүсч болох нь тогтоогдсон бол Авлигатай тэмцэх газар илт ашиг сонирхлын зөрчил үүсч болзошгүй нөхцөл байдлын талаар энэ хуулийн 23.6-д заасан мэдэгдэлд тодорхой дурдана” гэсэн утгатай болсон.  Ингэснээрээ  илтэд ашиг сонирхлын зөрчилтэй хүнийг төрийн албанд томилж болохгүй шүү гээд үүрэг болгочихсон заалтыг сонирхлын зөрчил нь ил харагдаж байсан ч гэсэн томилж болно гэж өөрчилсөн нь авлигатай тэмцэх чадамжийг улам сулруулж Төрийн албаны зөвлөлөөс нэрийг нь бичгээр явуулаад Засгийн газрын хуралдаанаар шууд баталчихаж байгаагаас ялгаагүй болж байгаа юм.

Энэ мэтчлэн Төрийн албаны тухай хууль нэлээд өөрчлөлт орсон төдийгүй уг хууль 2019 оны нэгдүгээр сарын 1-нээс мөрдөгдөж байна. Гэтэл ЗТХЯ-ны Төрийн нарийн бичгийн даргад нэр дэвшигч С.Батболдыг 2018 оны арванхоёрдугаар сарын 28-нд Төрийн албаны зөвлөлд нэрийг нь явуулсан байдаг. Томилох Засгийн газрын хуралдаан нь ирэх долоо хоногт буюу 2019 оны нэгдүгээр сарын 9-нд болно гэхээр яах аргагүй хууль зөрчигдөж байна. Энэ асуудал Үндсэн хуулийн Цэц дээр очвол заавал буруутаж таарч байгаа юм. ЗТХЯ-ны Төрийн нарийн бичгийн даргаар томилогдохоор нэр дэвшсэн С.Батболд хэн байхаас эс хамааран томилох явцад хуулийн зөрчил гарна гэсэн үг.

Төрийн яаман дотор, төрийн албан хаагчид нэгнээ хөнөөсөн хэрэг У.Хүрэлсүхийн Засгийн газрын анхны том цохилт байсан. Одоо ч шарх нь аниагүй, хүнд, хар дурсамж үлдээж Монгол төрийн толбо болоод байгаа билээ. Дараа нь тухайн үеийн удирдлагуудада хариуцлага тооцож шинээр томилсон сайд нь “ЖДҮХС-аас хувийн компанидаа зээл авсан” гэх асуудалд нэр холбогдсон. Харин одоо Төрийн нарийн бичгийн даргаа хууль зөрчиж томилбол Зам тээврийн хөгжлийн яам яах аргагүй У.Хүрэлсүхийн Засгийн газрын “толгойг залгигч” мөн гэдгээ батлах болно. Ийм алдааг У.Хүрэлсүхийн Засгийн газрыг огцруулалгүй үлдсэнд “шүд зууж” үлдсэн, “60 тэрбумынхан” гэгдэх болсон “М.Энхболдын талынхан анхааралтай анаж байгаа. Хэрэв дээрх томилгоог хуулийн зөрчлийг үл арилган хийвэл яах аргагүй занганд орж таарна.  Тэр ч байтугай алдаа дутагдал “арвинтайгаар” нь ЗТХЯ-ыг онилж отож байгаа гэхэд хилсдэхгүй. Тиймээс ирэх долоо хоногийн Засгийн газрын хуралдаанаас өмнө амжиж Төрийн нарийн бичгийн даргад нэр дэвшигчээ “солихгүй” бол У.Хүрэлсүхийн Засгийн газрыг харлуулах, тэр тусмаа ЗТХЯ-тай холбоотой Засгийн газраа харлуулах үндэслэл нэгээр нэмэгдэх магадлалтай байна.

О.Балдан-очир