Нийслэлийн авто замын түгжрэлийг бууруулах ажлын хэсгийн хуралдаан өнөөдөр боллоо. Хуралдаанаар такси үйлчилгээг цэгцлэх зэрэг хэд хэдэн ажлыг хэлэлцлээ. Ингээд хуралдаанаас гарсан шийдвэр болон бусад холбогдох асуудлын талаар НИТХ-ын дарга С.Амарсайханаас тодрууллаа

-Өнөөдөр нийслэлийн замын түгжрэлийг бууруулах чиглэлээр ажлын хэсэг хуралдлаа. Хуралдаанаар юу ярив?

-Нийслэлийн замын түгжрэлийг бууруулах ажлын хэсэг байгуулагдаад хоёр ажил орчим болж байна. Энэ хугацаанд хийсэн, хэрэгжүүлсэн ажлууд бий. Гэхдээ цаг үеийн шаардлага, хийвэл зохих ажлыг хэмжээнд нь хийж байна уу гэвэл үгүй. Тиймээс ажлын хэсгийг хуралдуулж нийслэлийн замын ачааллыг бууруулах, нийттийн тээврийн үйлчилгээг сайжруулахтай холбоотойгоор өнгөрсөн оны аравдугаар сард зохион байгуулагдсан хэлэлцүүлгийн үеэр хөндөгдсөн асуудал, хуралдаанаас гарсан үүрэг даалгавар хангалтгүй байна.

Хоёрдугаарт, нийслэл хот замын хөдөлгөөний 1.5 сая гаруй хүн амтай, 500 орчим мянган авто машинтай мөртлөө авто замын төлөвлөлт, зохицуулалт, инженерчлэлийн зохион байгуулалт хийдэг мэргэжлийн байгууллагагүй. Тиймээс уг байгууллагын ажлыг эрчимжүүлэх шаардлагатай. Мөн нийтийн тээврийн шинэчлэлийг зохион байгуулах хэрэгтэй байна. Өөрөөр хэлбэл, хяналтгүй явж байгаа таксиг зохион байгуулалтад оруулна. Таксинд явъя гэсэн хүсэл эрмэлзэлтэй, техникийн аюулгүй байдал хангагдсан, хувь хүний ёс зүйтэй, иргэдийн итгэлийг авч чадах жолоочийг нэгтгээд нэгдсэн нэг өнгө, тоолуур, тэмдэг тэмдэглэгээтэй байлгах үүрэг даалгаврыг нийтийн тээврийн газарт өглөө. Энэ нь иргэн албан бус таксинд үйлчлүүлж байх үедээ халдлага, хүчин, дээрэм тонуулд өртөхөөс сэргийлэх юм. Учир нь сүүлийн үед энэ төрлийн халдлага ихсэх болсон.

Гуравдугаарт, нийслэлийн замын түгжрэлийг бууруулах ажлын хэсгийг шинэчлэн зохион байгуулна. Ажлын хэсэг нарийн бичгийн даргаасаа эхлээд юу хийснээ мэдэхгүй сууж байна. Ийм байдалтай ажлыг цааш явуулахгүй. Нөгөөтэйгүүр, бидэнд нэг дутагдалтай тал байна. Цаасан дээрээ бүх л юм болж байна гээд байдаг. Яг асуугаад үзэхээр болж байгаа юм байдаггүй.

-НИТХ-ын дараагийн хурал хэзээ зарлагдаж хотын даргын асуудлыг шийдэх бол. Их хүлээлт үүсгээд байгаа шүү дээ. Мөн нэрийг дэвшүүлсэн байсан?

-Уг нь бид хотын даргын асуудал болон нийслэлийн ногоон хөгжлийн мастер төлөвлөгөөг батлах, агаарын бохирдолтой холбоотой ажлын хэсгийн санал дүгнэлтийг сонсох зэрэг хэд хэдэн асуудлыг хэлэлцэхээр өнгөрсөн оны арванхоёдугаар сарын 28-ны өдөр хурал зарласан. Хуралдааныг НИТХ, намын бүлэг, МАН-ын хороо, удирдах зөвлөл хуралдаж, ажлын цагтаа асуудлаа шийдэж, хуралдаж чадаагүй гэх шалтгааны улмаас хурлыг хойшлуулсан. Түүнчлэн өнгөрсөн оны арванхоёрдугаар сарын 31-ний өдөр баярын өдөр таарсан. Мөн тухайн өдөр гадаад, дотоод айлчлал, арга хэмжээ давхацсан учраас уг хурлыг дахин хойшлуулсан юм. Хотын даргыг сонгох асуудлыг НИТХ-аар хэлэлцэн, хурал  зарлах өдрөө товлоно.

-Зарим ИТХ-ын төлөөлөгчид таныг дэмжихгүй байгаа нь ажиглагдсан?

-Энэ бол миний шийдвэр биш. Эрх барьж буй улс төрийн намын шийдвэр. Удирдах зөвлөл, нийслэлийн намын хорооны тэргүүлэгчдийн гишүүд олонхоороо шийдвэрлэсэн.

Б.Лхам