Энэ пүрэв гарагт болох бүх нийтийн жагсаалын талаар УИХ-ын гишүүн Л.Болд, Т.Аюурсайхан, Ж.Батзандан, Л.Оюун-Эрдэнэ нар мэдээлэл хийлээ.
Энэ үеэр Л.Болд гишүүн “Одоогоор бидний тэмцлийг дэмжиж 200 гаруй хүн өсгөлөн зарлахаа мэдэгдээд байна. Бид ч гэсэн энэ тэмцлийг дэмжиж, өсгөлөн зарлана. Гэхдээ бид нэгдүгээр сарын 10-ны өдрийн жагсаалын үеэр өсгөлөн зарлахгүй. Жагсаалын гол зорилго, үр дүн бол МАНАН бүлэглэлийн удирдлагын нэг УИХ-ын дарга М.Энхболдыг албан тушаалаасаа нь огцруулж, шинэ удирдлагыг сонгож, шүүх, хуулийн байгууллагын цэвэрлэгээг эхлүүлж, шударга бусын хонгилыг нураана. Хоёрдугаарт, Монголын иргэд баялгийн эзэн байх ажлыг эхлүүлнэ. Стратегийн ордод иргэн бүр хувьцаа эзэмших эрх зүйн орчинг бий болгоно. Утаа, хөрсний бохирдол, газрын наймаа зэрэг олон шийдэх асуудал байна. Монгол ард түмний тэмцлийн үр дүнд УИХ-ын даргыг чөлөөлж, хүлээлэгдэж байгаа асуудлуудад шийдвэр, хууль тогтоомжоо батална. Цагаан сарын дараа ээлжит бус чуулган зарлах ёстой” хэмээн ярив.
Тэгвэл УИХ-ын гишүүн Ж.Батзандан “2018 оны тэмцэл 2019 онд амжилтад хүрнэ. Нохой жилийн тэмцэл гахай жилд хэрэгжинэ. Монголчуудын гахай жилд ялж ирсэн” гэсэн бол УИХ-ын гишүүн Т.Аюурсайхан “МАНАН гэх бүлгийг эсэргүүцэх нэгдүгээр сарын 10-ны жагсаалд 100 гаруй төрийн бус байгууллага нэгдэж, улс орон даяар нэгэн зэрэг жагсаалыг эхлүүлнэ. Жагсаалын дарааа шууд тараад явахгүй, жагсаалд оролцож байгаа төрийн бус байгууллагын төлөөллүүд Сүхбаатарын талбай дээр гэр барьж улс төрийн тэмцэл, суулт хийнэ. Холбогдох бүх зөвшөөрлөө авахаар байгууллагуудад хандсан. Жагсагчдын аюулгүй байдлыг хангах, үймээн самуунаас сэргийлэх талаар хүсэлтээ Ерөнхийлөгч, Ерөнхий сайдад хүргүүлсэн. Тиймээс нэгдүгээр сарын 10-ны цулаанд бүх аймгийн төв талбай дээр нэгдсэн уриа, нэг зорилгын дор бүх нийтээрээ тэмцэх учраас иргэддээ нэгдэхийг дахин уриалж байна. Тэмцлээ үр дүнд хүргэж, тодорхой шийдвэрүүдийг гаргана. Жагсаал, цуглаан, улс төрийн суулт зэргээр дараа дараагийн алхмыг хийх болно” гэв.
Р.Хишигжаргал
Сэтгэгдэл (55)